އަންނަ އަހަރުގެ ބަޖެޓުގައި ގެދޮރުވެރިކަމުގެ މަޝްރޫއުތައް ހިންގުމަށް ހާއްސަ އިސްކަމެއް ދެވޭނެކަމަށް މާލީ ވަޒީރު މޫސާ ޒަމީރު ހާމަކޮށްފިއެވެ.
އެގޮތުން، ވަޒީރު ޒަމީރު ވިދާޅުވީ އަންނަ އަހަރަށް ލަފާކުރާ ދައުލަތުގެ ބަޖެޓަކީ ރާއްޖޭގެ ތާރީޚުގައި ގެދޮރުވެރިކަމަށް ޚާއްޞަކޮށްގެން ސަރުކާރަކުން އެންމެ ބޮޑު ހޭދައެއް ކުރުމަށް ހުށަހަޅާފައިވާ ބަޖެޓު ކަމަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި 2025 ވަނަ އަހަރަށް ލަފާކުރާ ދައުލަތުގެ ބަޖެޓު ހުށަހަޅުއްވަމުން ވަޒީރު ވިދާޅުވީ، ރާއްޖޭގެ އިޖުތިމާޢީ އެންމެ ބޮޑު އެއް މައްސަލައަކީ ގެދޮރުވެރިކަމާއި ބޯހިޔާވަހިކަމުގެ މައްސަލަ ކަމަށެވެ. އަދި ގެދޮރުވެރިކަމާއި ބޯހިޔާވަހިކަމަށް އެދެވޭ ޙައްލެއް ހޯދައިދީ، ދިވެހި އާބާދީގެ ބޮޑު ބަޔަކީ ގެދޮރުވެރި ބަޔަކަށް ހެދުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެންމެ ބޮޑު އެއް ތަޞައްވުރުކަމަށް ވަޒީރު ފާހަގަކުރެއްވިއެވެ.
އަންނަ އަހަރުގެ ބަޖެޓުގައި 5 ޕަސެންޓް އިންޓްރެސްޓުގައި ގެދޮރުވެރިކަމުގެ ލޯނު ދޫކުރުމަށް 1 ބިލިއަން ރުފިޔާ ހިމަނާފައިވާ ކަމަށް ވަޒީރު ވިދާޅުވިއެވެ. މި ފައިސާ ބޭނުންކޮށްގެން ރާއްޖޭގެ ބޭންކުތައް މެދުވެރިކޮށް މަދުވެގެން 2 ބިލިއަން ރުފިޔާގެ ހައުސިންގ ލޯނު ދެވޭނެ މަގު ފަހިވާނެ ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން، ގެދޮރުވެރިކަމުގެ އައު ޕީ.އެސް.އައި.ޕީ މަޝްރޫޢުތައް ހިންގުމަށް 1.8 ބިލިއަން ރުފިޔާ ކަނޑައަޅާފައިވާ ކަމަށް ވަޒީރު ޒަމީރު ހާމަކުރެއްވިއެވެ.
ފާއިތުވި އަހަރުތަކާ އަޅާބަލާއިރު، 2025 ވަނަ އަހަރުގެ ބަޖެޓުގައި ގެދޮރުވެރިކަމުގެ މަޝްރޫޢުތަކަށް ކަނޑައަޅާފައިވާ އަދަދަކީ ވަރަށް ބޮޑު އިތުރުވުމެކެވެ. 2024 ވަނަ އަހަރުގެ ބަޖެޓުގައި މި ބާވަތުގެ މަޝްރޫޢުތަކަށް ކަނޑައަޅާފައިވަނީ 452.8 މިލިއަން ރުފިޔާ ކަމަށްވާއިރު، އަންނަ އަހަރުގެ ބަޖެޓުގައި މި އަދަދު 231 އިންސައްތަ އިތުރުވެފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅަކީ އަންނަ އަހަރުން ފެށިގެން ކޮންމެ އަހަރެއްގެ ޕީ.އެސް.އައި.ޕީ ބަޖެޓުގެ ބޮޑު މިންވަރެއް ގެދޮރުވެރިކަމަށް ޚާއްޞަކޮށް، ފަސް އަހަރުގެ ދައުރުގެ ތެރޭގައި ގެދޮރުވެރިކަމުގެ މައްސަލައަށް އެކަށީގެންވާ ޙައްލެއް ހޯދައިދިނުމެވެ.
