ސަޔްހޫނީ އިޒްރޭލު ސިފައިން ގަސްދުގައި ބަޑިން ހަމަލާދީ ޣައްޒާއިން 95 މީހުން އިއްޔެ ޝަހީދު ކޮށްލާފައިވާ ކަމަށް އަލްޖަޒީރާއިން ރިޕޯޓް ކޮށްފިއެވެ.
ސަހްޔޫނީ އިޒްރޭލު ސިފައިން މި ޤަތުލް ޢާންމު ހިންގާފައި ވަނީ ޣައްޒާގެ އުތުރުގައި އޮންނަ ބެއިތު ލަހިޔާގައެވެ. އަލްޖަޒީރާއިން ރިޕޯޓު ކޮށްފައިވާ ގޮތުގައި ހައްދުފަހަނައެޅި އިޒްރޭލު ސިފައިން ގެންދަނީ ބެއިތު ލަހިޔާގެ ގެތަކަށް ވަދެ ބިރުދައްކައި ގެތަކުން އާންމުން ނެރެމުންނެވެ. އިޒްރޭލު ސިފައިންނަށް އަތުނުޖެހެން މަސައްކަތް ކުރާ ކޮންމެ މީހަކަށް ހަމަލާދޭ ކަމަށް އަލްޖަޒީރާއިން ބުނެއެވެ.
އިޒްރޭލުން ޝަހީދު ކޮށްލި މީހުންގެ ތެރޭގައި ސިއްހީ ދައިރާގައި މަސައްކަތް ކުރާ 4 މީހަކުވެސް ހިމެނޭ ކަމަށް އަލްޖަޒީރާއިން ބުނެއެވެ.
މިދިޔަ އަހަރުގެ އޮކްޓޫބަރު 8 ވަނަ ދުވަހުން ފެށިގެން ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުން އަންނަ ޤަތުލް އާންމުގައި 43،000 އެއްހައި މީހުން ޝަހީދު ކޮށްލާފައިވާއިރު، މުޅި ޣައްޒާ ސިޓީ ވަނީ ބިމާ ހަމަކޮށްފައެވެ.
އިޒްރޭލުގެ ޢުދުވާންތައް ހުއްޓުވުމަށް އދ. މެދުވެރިކޮށް ރަޝިޔާއިން މިހާތަނަށް 2 ފަހަރު މަސައްކަތް ކޮށްފައިވާއިރު މި ދެ ފަހަރުވެސް ވީޓޯގެ ބާރު ބޭނުންކޮށްގެން އެމެރިކާއިން ވަނީ މިކަމަށް ހުރަސްއަޅާފައެވެ.
