ސައުދީ ޕްރޯ ލީގުގައި މަޝްހޫރު ކްރިސްޓިއާނޯ ރޮނާލްޑޯ އާއި ސަޑިއޯ މާނޭ ކުޅެމުން އަންނަ އަލް ނަސްރާއި ވާދަވެރި އަލް ހިލާލް ރޭ ބައްދަލު ކުރި މެޗް 1-1 އިން އެއްވަރުވެއްޖެއެވެ.
އަލް ނަސްރުގެ ދަނޑުގައި ކުޅުނު މިމެޗުގެ ފުރަތަމަ މިނެޓުގައި ލަނޑު ޖަހައި ލީޑް ނެގީ ނަސްރުންނެވެ. މިލަނޑު ކާމިޔާބު ކޮށްދިނީ ބްރެޒިލްގެ ހުނަރުވެރި ފޯވާޑް ޓަލިސްކާއެވެ. އޭގެ ފަހުންވެސް ޓަލިސްކާ ދެ ލަނޑު ޖެހިއެވެ. އެކަމަކު ރެފްރީ ނިންމީ ދެ ލަނޑުވެސް އޮފްސައިޑު ކަމަށެވެ.
މެޗުގެ ނަތީޖާ ހިލާލުން އެއްވަރު ކުރީ 77 ވަނަ މިނެޓުގައި ސާގެޖް މިލިންކޮވިކް ކާމިޔާބު ކޮށްދިން ލަނޑުންނެވެ. މިމެޗުގައި ހިލާލްގެ ސުޕަރ ސްޓަރ ބްރެޒިލްގެ ނޭމާ ނުކުޅެއެވެ.
ލީގުގެ އެއްވަނައިގައި ހިލާލް 25 ޕޮއިންޓާއެކު އެއްވަނައިގައި އޮތްއިރު، 24 ޕޮއިންޓާއެކު ދެވަނައިގައި އޮތީ މަޝްހޫރު ކަރީމް ބެންޒީމާގެ އަލް އިއްތިހާދެވެ. އަލް ނަސްރު ތިންވަނައިގައި އޮތީ 19 ޕޮއިންޓާއެކުއެވެ.
ސައުދީ ލީގުގައި ރޮނާލްޑޯގެ އަލް ނަސްރަށް ތައްޓެއް ކާމިޔާބު ކުރުމަށް އެންމެ ބޮޑަށް އެޅިފައިވާ ހުރަހަކީ ހިލާލްއެވެ. މިދިޔަ ސީޒަނުގައި ސައުދީ ލީގު ކާމިޔާބު ކުރީވެސް ހިލާލްއެވެ. 2023 ވަނަ އަހަރުގެ ޖެނުއަރީ މަހު އަލް ނަސްރާ ގުޅުނު ފަހުން ރަސްމީ އެއްވެސް މުބާރާތެއްގެ ޗެމްޕިއަންކަން އަދި ރޮނާލްޑޯއަށް ހޯދިފައިވާ ނުވާކަން ފާހަގަ ކޮށްލެވެއެވެ.
