ރަޝިޔާގެ އަސްކަރީ ފައުޖުތައް ޔޫކްރައިން ސިފައިން ބަލިކޮށް ހަލުވި މިނުގައި ކުރިއަރަމުން އަންނާތީވެ، ޔޫކްރައިނުގެ އެންމެ ބޮޑު މަދަދުގާރު އެމެރިކާ ކަންބޮޑުވެއްޖެއެވެ.
ރަޝިޔާއިން ދަނީ ޔޫކްރައިނުގެ އިރުމަތީ އަވަށްތައް ހިފައި، އިރުމަތިން ވަރަށް ބޮޑަށް ޔޫކްރައިން ތެރެއަށް ވަންނަމުންނެވެ. އަދި މީގެ ތިން މަހެއްހައި ދުވަސް ކުރިން ރަޝިޔާގެ ކާސްކް ރީޖަންގެ ބައެއް އަވަށްތައް ހިފައިގެން ތިބި ޔޫކްރައިން ސިފައިންވެސް މިހާރު ވަނީ ވަރަށް ބޮޑުތަނުން ފަހަތަށް ޖައްސާފައެވެ. މިކަން ޔޫކްރޭނުގެ އަސްކަރިއްޔާއިންވެސް ވަނީ ކަށަވަރު ކޮށްދީފައެވެ.
އެމެރިކާގެ އިންޓަލެޖެންސް އޮފިޝަލުންނާ ހަވާލާދީ ނިއުޔޯކް ޓައިމްސްގައި ބުނެފައި ވަނީ ރަޝިޔާއިން މިހާރު ދަނީ އާދަޔާޚިލާފް ބާރު މިނެއްގައި ޔޫކްރަައިން ސިފައިންގެ މައްޗަށް ކުރި ހޯދަމުން ކަމަށެވެ. އަދި ރަޝިޔާގެ ހަމަލާތަކުގައި މިހާތަނަށް ޔޫކްރައިނުގެ 57،000 އަށްވުރެ ގިނަ ސިފައިން މަރުވެފައިވާ ކަމަށްވެސް ނިއުޔޯކް ޓައިމްސްއިން ބުނެއެވެ.
ޔޫކްރޭނުގެ އޮފިޝަލުން ވިދާޅުވަމުން ގެންދަވަނީ ހަތިޔާރާއި ސިފައިންގެ ގޮތުން ރަޝިޔާ އޮތީ މާކުރީގައި ކަމަށެވެ. ރަޝިޔާއާ ކުރިމަތިލާނެ ސިފައިންގެ ފައުޖުތަކަށް ވަންނާނެ ޔޫކްރައިން މީހުން ހޯދުމަށްވެސް ވަރަށް ބޮޑަށް އުނދަގޫވެފައިވާ ކަމަށް ޔޫކްރައިން އޮފިޝަލުން ވިދާޅުވެއެވެ.
ރަޝިޔާއާ ދެކޮޅަށް ހަނގުރާމަ ކުރުމުގައި ޔޫކްރައިނަށް ވާގިވެރިވަމުން ދަނީ އެމެރިކާ އާއި ހުޅަނގުގެ ގައުމުތަކުންނެވެ.
