ސްޕެއިންގެ ވެލެންސިއާއަށް އެރި ވަރުގަދަ ތޫފާނުގައި ހާލުގައި ޖެހުނު ފަރާތްތަކަށް ރެއާލް މެޑްރިޑުން 1 މިލިއަން ޔޫރޯ ހަދިޔާކޮށްފިއެވެ.
ރެއާލުގެ މި ދީލަތި އެހީއަކީ ވެލެންސިއާއަށް ކުރަމުން އަންނަ ބޯ ވާރޭގެ ސަބަބުން ގެދޮރު ހަލާކުވެ ވަންނާނެ ތަނެއް ނެތިފައިވާ ފަރާތްތަކަށާއި, މި ތޫފާނުގައި ނިޔާވި ފަރާތްތަކުގެ އާއިލާތަކަށް އެހީވުމަށް ބޭނުންކުރެވިގެންދާނެ ޑޮނޭޝަނެކެވެ.
މީގެ އިތުރުން ރެއާލުން ވަނީ އިއްޔެ އެ ޓީމުގެ ފަރިތަކުރުންތަކުގައި, ސްޕެއިންގެ އިރުމަތީ ދެކުނަށް އަރާފައިވާ ތޫފާނުގެ ސަބަބުން ފުރާނަ ގެއްލުނު ފަރާތްތަކުގެ ހަނދާނުގައި އެއް މިނެޓުގެ ސުކޫތެއް ބާއްވާފައެވެ.
މޫސުމީ މާހިރުން ލަފާ ކުރާ ގޮތުގައި ވެލެންސިއާއަށް އަރާފައިވާ ތޫފާނުގައި އެއް އަހަރު ދުވަހުގެ ވާރޭ ވަނީ އެންމެ 8 ގަޑިއިރު ތެރޭގައި އެ ސިޓީއަށް ވެހިފައެވެ.
މި ކާރިސާގައި 200 އަށްވުރެ ގިނަ މީހުން މަރުވެފައިވާ ކަމަށް ސްޕެނިޝް ޕޮލިހުން ރިޕޯޓު ކުރެއެވެ.
