މެންޗެސްޓާ ޔުނައިޓެޑުގެ ކޯޗުކަމުގެ މަގާމަށް, ކްލަބުގެ ވަރުގަދަ ލެޖެންޑެއް ކަމުގައިވާ ކްރިސްޓިއާނޯ ރޮނާލްޑޯގެ ކުރީގެ ޓީމް މޭޓު, ރުބެން އަމޮރިމް ހަމަޖައްސައިފިއެވެ.
39 އަހަރުގެ އަމޮރިމް ޔުނައިޓެޑުގެ ކޯޗުގެ ގޮތުގައި ހަމަޖައްސައިފިކަން އިޓަލީގެ މަޝްހޫރު ފުޓުބޯޅަ ޖާނަލިސްޓް ފަބްރީޒިއޯ ރޮމާނޯ ވަނީ ޔަގީން ކޮށްދީފައެވެ.
ފަބްރީޒިއޯ ހާމަކުރި ގޮތުގައި ޔުނައިޓެޑުން ވަނީ, އަމޮރިމް މިހާރު ކޯޗު ކުރަމުން އަންނަ ޕޯޗުގަލްގެ ސްޕޯޓިން ލިސްބަންއަށް 11 މިލިއަން ޑޮލަރުގެ ކޮމްޕެންސޭޝަން ފީއެއް ދައްކާ, އޭނާގެ ސޮއި ހޯދާފައި ކަމަށެވެ.
2027 ވަނަ އަހަރާ ހަމައަށް ދިގުދެމިގެންދާ ކޮންޓްރެކްޓެއްގެ މަތިން ޔުނައިޓެޑާ ގުޅުނު އަމޮރިމް, ރަސްމީކޮށް ޔުނައިޓެޑުގެ ކުޅުންތެރިންނާ ހަވާލުވާން ހަމަޖެހިފައިވަނީ 11 ނޮވެންބަރުގައެވެ. ޔުނައިޓެޑުގެ ކޯޗުގެ ގޮތުގައި އަމޮރިމް އެންމެ ފުރަތަމަ ކުރިމަތިލާން ޖެހެނީ, މި ސީޒަނުގައި ޕްރިމިއާ ލީގަށް ޕްރޮމޯޓްވި އިސްޕިޗް ޓައުންއާއެވެ.
އަމޮރިމްއަކީ, މި ވަގުތު ފުޓުބޯޅައިގެ ކޯޗިންގެ ދާއިރާގައި އެންމެ ނަން މަޝްހޫރު އެކަކެވެ. ފުޓުބޯޅައިގެ ގަދަ ބާރަކަށް ކޯޗުކަން ކޮށްދީފައި ނުވިޔަސް, އަމޮރިމް ސްޕޯޓިން ލިސްބަންއަށް ހޯދައިދީފައިވާ ކާމިޔާބީތަކުގެ ސަބަބުން އޭނާއަކީ އެތައް ކްލަބެއްގެ ޝައުގުވެރިކަން ހޯދާފައިވާ ފަރާތެކެވެ.
އަމޮރިމް, ސްޕޯޓިންގައި 4 އަހަރު ހޭދަކޮށްފައިވާ އިރު, އެ 4 އަހަރުގެ ތެރޭގައި ޔޫރަޕުގެ އެންމެ ވަރުގަދަ 7 ލީގުގައި ނިސްބަތުން އެންމެ ގިނަ މެޗު ކާމިޔާބު ކޮށްފައިވަނީ އޭނާގެ ސްޕޯޓިންއެވެ. ވަރުގަދަ ރެކޯޑުތަކަކާއެކީ ޔުނައިޓެޑުގެ ހުންގާނުގައި ހިފާއިރު, އެ ކްލަބުގެ ސަޕޯޓަރުންގެ ތަރުހީބާއި ރުހުން މިހާރު ވެސް އޭނާއަށް އަންނަނީ ލިބެމުންނެވެ.
