ދުނިޔޭގެ ޓެކްސްޓައިލް ދާއިރާގައި ބާރުގަދަ ޤައުމެއްކަމުގައިވާ ބަންގްލަދޭޝްއިން، އެޤައުމުގެ އަންނައުނު އެކްސްޕޯޓްކުރުމުގައި އިންޑިއާ ދޫކޮށް ދިވެހިރާއްޖެ މެދުވެރިކުރަން ނިންމާފައިވާކަމަށް އިންޑިއާގެ މީޑިއާ އައުޓްލެޓް "މިންޓް" އިން ރިޕޯޓުކޮށްފިއެވެ.
މި ބަދަލުގެ ސަބަބުން އިންޑިއާގެ ބަނދަރުތަކާއި އެއާޕޯޓުތަކަށް ލިބޭ އާމްދަނީއަށް އަސަރުކުރާނެކަމަށާއި، އަދި މި ދެ އަވައްޓެރި ޤައުމުގެ ވިޔަފާރީގެ ގުޅުމަށް އިތުރު ބުރޫއަރާފާނެކަމަށް ބެލެވެއެވެ.
ކުރިން ބަންގްލަދޭޝްގެ ޓެކްސްޓައިލް އުފެއްދުންތައް ދުނިޔޭގެ އެކި ކަންކޮޅުތަކަށް ފޮނުވަމުން ގެންގޮސްފައިވަނީ އިންޑިއާގެ ވަސީލަތްތައް މެދުވެރިކޮށެވެ. ނަމަވެސް މިހާރު ބަންގްލަދޭޝްއިން މުދާ ކަނޑުމަގުން ދިވެހިރާއްޖެއަށް ގެނެސް، ރާއްޖެއިން ވައިގެ މަގުން އެޗް އެންޑް އެމް އަދި ޒާރާ ފަދަ ބޮޑެތި ބްރޭންޑްތަކަށް ފޮނުވަމުންދެއެވެ.
ވިޔަފާރީގެ ދާއިރާގެ މާހިރުން ދެކޭގޮތުގައި ބަންގްލަދޭޝްއިން މިގޮތަށް ޢަމަލުކުރަން ނިންމީ އިންޑިއާގެ ބަނދަރުތަކުގައި ދިމާވާ ލަސްވުންތައް ހުއްޓުވުމަށާއި، ސަޕްލައި ޗެއިން އިތުރަށް ކޮންޓްރޯލްކުރުމަށެވެ. މިއީ މޫސުމީ ފެޝަންގެ ތަކެތި ވަގުތަށް ފޯރުކޮށްދިނުމަށް ވަރަށް މުހިންމު ކަމެކެވެ.
މި ބަދަލުގެ ސަބަބުން އިންޑިއާއާއި ބަންގްލަދޭޝްއާ ދެމެދު ލޮޖިސްޓިކްސް އަދި އިންފްރާސްޓްރަކްޗަރ މަޝްރޫޢުތަކުގައި އެއްބާރުލުން ދިނުމުގެ ފުރުޞަތުތައް މަދުވެ، އަދި ޓްރާންސިޓް މުދަލުން އިންޑިއާއަށް ލިބޭ އާމްދަނީ ދަށްވެގެންދާނެއެވެ. ނަމަވެސް އިންޑިއާގެ ވިޔަފާރީގެ ދާއިރާގެ އިސްވެރިން މިކަމާމެދު މާބޮޑު ކަންބޮޑުވުމެއް ފާޅުކޮށްފައެއް ނުވެއެވެ. އެއީ އިންޑިއާގެ ވައިގެ ބަނދަރުތަކުގައި ކުރިމަތިވެފައިވާ ތޮއްޖެހުމުގެ ސަބަބުން ބަންގްލަދޭޝްގެ ކާގޯ މަދުކުރުމަށް ކުރިން ވެސް ގޮވާލާފައިވާތީއެވެ.
2024 ގެ ކުރީކޮޅު މޯލްޑީވްސް ޕޯޓްސް ލިމިޓެޑް (އެމްޕީއެލް) އިން ތަޢާރަފުާރަފުކުރި ކަނޑުން-ވައިގެ މަގަށް ޓްރާންސްޝިޕްމަންޓް ޚިދުމަތުގެ ސަބަބުން ބަންގްލަދޭޝްއަށް އެހެން ގޮތްތަކެއް ބަލައިލުމުގެ ފުރުޞަތު ލިބިފައިވެއެވެ. މިގޮތުން ޤަތަރު އެއަރވޭޒް އަދި އެމިރޭޓްސް ފަދަ ބޮޑެތި އެއަރލައިންތަކުން ވައިގެ ދަތުރުފަތުރުގެ ޚިދުމަތް ފޯރުކޮށްދެމުންދެއެވެ.
އެމްޕީއެލްގެ މި ޙިދުމަތުން މާރޗް މަހުން ފެށިގެން އޮކްޓޯބަރު މަހާ ހަމައަށް 715 ޓަނަށްވުރެ ގިނަ މުދާ ބަލަހައްޓައި، 147 ޓީއީޔޫ (ޓްވެންޓީ-ފުޓް އިކުއިވެލެންޓް ޔުނިޓްސް) ޕްރޮސެސްކޮށް، ދުނިޔޭގެ 12 ޤައުމަކާ 8 މައި އެއަރލައިނެއް ވަނީ ގުޅުވާލާފައެވެ.
މި ޚިދުމަތުގެ ސަބަބުން ދިވެހިރާއްޖެއަށް ލިބޭނެ މައިގަނޑު ފައިދާއަކީ، އެކްސްޕޯޓް ކުރުމުގެ މަސައްކަތް އަވަސްކުރުމަށް އާންމުކޮށް ބޭރު ޤައުމުތަކުން ފޯރުކޮށްދޭ މި ޚިދުމަތުގެ ސަބަބުން އެކި ޤައުމުތަކަށް، ޚާއްޞަކޮށް ޔޫރަޕުގެ މަންޒިލްތަކަށް ދަތުރުކުރާ ފްލައިޓްތަކުގެ އަދަދު އިތުރުވުމެވެ.
