މިއަދު ފާހަގަ ކުރާ ރާއްޖޭގެ 36 ވަނަ ނަޞްރުގެ ދުވަހުގެ މުނާސަބަތުގައި ގިނަ ހަރަކާތްތަކެއް ބާއްވަން ހަމަޖެހިފައިވާ ކަމަށް ޤައުމީ ދިފާއީ ބާރު މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
މި އަހަރުގެ ނަޞްރުގެ ދުވަސް ދިވެހި ދައުލަތުން ކުލަގަދަކޮށް ފާހަގަކުރަން ނިންމުމުން، އެމްއެންޑީއެފުން މި އަހަރުގެ ނަޞްރުގެ ދުވަހުގެ މުނާސަބަތުގައި ކުރިއަށް ގެންދާ ހަރަކާތްތައް ފެށުމަށް ހަމަޖެހިފައިވަނީ ނޮވެންބަރު 3 ވަނަ ދުވަހު ސިފައިން ބައިވެރިވެގެން ޖަމާޢަތުގައި ކުރެވޭ ފަތިސް ނަމާދުންނެވެ.
އިސްލާމީ މަރުކަޒުގައި ޖަމާޢަތުގައި ކުރެވޭ ފަތިސް ނަމާދަށް ފަހު، އެ ދުވަހު ހެނދުނު، ތިނެއް ނޮވެންބަރުގެ ހަނދާނީ ބިނާގައި ދިދަ ޖެހުމާއި، ގާޑް މައުންޓް ކުރުމުގެ ރަސްމިއްޔާތު އޮންނާނެއެވެ. އެއަށްފަހު އެ ދުވަހު ހެނދުނުގެ އެންމެ ފަހު ހަރަކާތެއްގެ ގޮތުގައި އޮންނާނީ "ނަޞްރު ދުވަހުގެ ސިފައިންގެ މައުރަޒު" ހުޅުވުމެވެ. މިއަހަރުގެ "ސިފައިންގެ މައުރަޒު" ބޭއްވުމަށް ހަމަޖެހިފައިވަނީ ނޭޝަނަލް އާޓް ގެލަރީގައެވެ. ނަޞްރުގެ ދުވަސް ފާހަގަކުރުމުގެ ގޮތުން އެ ދުވަހުގެ ހަވީރު އެމްއެންޑީއެފުން ޖުމްހޫރީ މައިދާނުގައި ޚާއްޞަ މިލިޓަރީ ޑިސްޕްލޭއެއް އާއްމުންނަށް ހުޅުވާލައިގެން ކުރިއަށް ގެންދިއުމަށް ވަނީ ހަމަޖެހިފައެވެ. އަދި، އެ ދުވަހުގެ ރޭ ބާއްވާ ނަޞްރު ދުވަހުގެ ޚާއްޞަ ޖަލްސާ އޮންނާނީ ދަރުބާރުގޭގައެވެ.
މި އަހަރުގެ ނަޞްރުގެ ދުވަހުގެ މުނާޞަބަތުގައި އެމްއެންޑީއެފް އޭރިއާ ކޮމާންޑްތަކުގައި ވެސް ގިނަ ހަރަކާތްތަކެއް ބޭއްވުމަށް ވަނީ ހަމަޖެހިފައެވެ.
19 ދިވެހިން ގެ ފުރާނަ ގަސްތުގައި ދުއްވާލައި ގައުމުގެ މިނިވަންކަން ނަގާލަން މަސައްކަތް ކުރި މީހުންނާއި ސޭމްޕު ފުޅި ވަގައްނެގި ފަރާތާއި އަދަބު އެއްވަރު. ވަރައް ނަސްރެއްނު މީ