ނަޞްރުގެ ދުވަހާ ގުޅިގެން، ކުރީގެ ރައީސް އަލްއުސްތާޛު މައުމޫން އަބްދުލްޤައްޔޫމް ދިވެހި ރައްޔިތުންނަށް ތަހުނިޔާ ފޮނުއްވައިފިއެވެ.
މި ތަހުނިޔާ ފޮނުއްވާފައިވަނީ އެމަނިކުފާނުގެ ސޯޝަލް މީޑިއާ އެކައުންޓް މެދުވެރިކޮށެވެ.
ރައީސް މައުމޫން ފޮނުއްވި މެސެޖުގައި ދިވެހިރާއްޖޭގެ ފަޚުރުވެރި ނަޞްރުގެދުވަހުގެ އިޚްލާޞްތެރި ތަހުނިޔާއާއި ހެޔޮއެދުންތައް ރާއްޖޭގެ އެންމެހާ ލޮބުވެތިރައްޔިތުންނަށް ފޮނުވާފައިވެއެވެ. އަދި މާތް ﷲ ދިވެހިރާއްޖޭގެ ނަޞްރާއިނަޞީބު އަބަދަށްޓަކާ ދެމެހެއްޓެވުން އެދި ދުޢާކުރައްވާފައިވެއެވެ.
އަލްއުސްތާޛު މައުމޫން އަބްދުލްޤައްޔޫމަކީ 1988 ވަނަ އަހަރުގެ ނޮވެމްބަރު 3 ވަނަ ދުވަހު ރާއްޖެއަށް އުދުވާނީ ހަމަލާ ދިން އިރު ރާއްޖޭގެ ރައީސްކަމުގައި ހުންނެވި ބޭފުޅާއެވެ. އެ ދުވަހު ދިވެހިރާއްޖެއަށް ދިމާވި ނުރައްކާތެރި ހާދިސާގައި، ރައީސް މައުމޫން ވަނީ ދިވެހި ރައްޔިތުންނާއި ޤައުމުގެ ރައްކާތެރިކަން ކަށަވަރުކުރެއްވުމަށްޓަކައި ވަގުތުން ފިޔަވަޅުތަކެއް އަޅުއްވާފައިއެވެ. މީގެ ތެރޭގައި ބޭރުގެ އެކި ފަރާތްތަކުގެ އެހީތެރިކަމަށް އެދިވަޑައިގަތުން ހިމެނެއެވެ. އެ ދުވަހު ރައީސް މައުމޫން އެޅުއްވި ފިޔަވަޅުތަކުގެ ސަބަބުން، އެމަނިކުފާނުގެ ނަން ވަނީ ބަޠަލެއްގެ ގޮތުގައި ތާރީޚުގައި ރަން އަކުރުން ލިޔެވިފައެވެ.
