ޖަރުމަނުގެ ކޯޗް ހަންސީ ފްލިކުގެ އިރުޝާދުގެ ދަށުން މިސީޒަނުގައި ވަރަށް ރަނގަޅު ފޯމެއްގައި ކުޅެމުން އަންނަ ބާސެލޯނާ ވާދަވެރި އެސްޕަނިޔޯލްގެ މައްޗަށް މިރޭ 3-1 އިން ކުރި ހޯދައިފިއެވެ.
ބާސެލޯނާއިން ތިން ލަނޑުވެސް ޖެހީ ފުރަތަމަ ހާފުގެ 30 މިނެޓުގެ ތެރޭގައެވެ. ފުރަތަމަ ލަނޑު 12 ވަނަ މިނެޓުގައި ކާމިޔާބު ކޮށްދިނީ މިސީޒަނުގައި އެކްލަބާ ގުޅުނު ހުނަރުވެރި މިޑްފީލްޑަރު ޑަނީ އޮލްމޯއެވެ. ދެވަނަ ލަނޑު 23 ވަނަ މިނެޓުގައި ކާމިޔާބު ކޮށްދިނީ މިސީޒަނުގައި ތަފާތު މޮޅު ކުޅުމެއް ދައްކަމުން އަންނަ ބްރެޒިލްގެ ފޯވާޑް ރަފީނާއެވެ. މިއީ މިސީޒަނުގައި ބާސެލޯނާއަށް އޭނާ ކާމިޔާބު ކޮށްދިން 11 ވަނަ ލަނޑެވެ. ބާސެލޯނާގެ ތިންވަނަ ލަނޑު 31 ވަނަ މިނެޓުގައި ކާމިޔާބު ކޮށްދިނީ އޮލްމޯ (ފޮޓޯ) އެވެ. އެސްޕަނިޔޯލްގެ ހަމައެކަނި ލަނޑު 63 ވަނަ މިނެޓުގައި ކާމިޔާބު ކޮށްދިނީ ހަވީ ޕުއާޑޯއެވެ.
މެޗުގެ އުސްއަލިތައް:
https://wsc.googlesearch.laliga.com/games/67279509f36a0dee74aa1ac9.html
މިމެޗުން ލިބުނު 3 ޕޮއިންޓާއެކު ތާވަލުގެ ކުރީގައި ބާސެލޯނާ އޮތީ 33 ޕޮއިންޓާއެކުއެވެ. ދެވަނައިގައި 24 ޕޮއިންޓާއެކު އޮތީ ވާދަވެރި ރެއާލް މެޑްރިޑެވެ. ރެއާލް މެޑްރިޑާއި ވެލެންސިޔާ މިހަފްތާގައި ބައްދަލު ކުރަން އޮތް މެޗް، ވެލެންސިޔާގައި ފެންބޮޑުވެ ގިނަ އަދަދެއްގެ މީހުން މަރުވުމާއި ގުޅިގެން ވަނީ ފަސްކޮށްފައެވެ.
