ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، ނިޝާން އަސްކަރީގެ ވެރިކަމުގެ އިއްޒަތް، މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލަށް މިރޭ އެރުވިއިރު، އެބޭފުޅާއަށް ފުން އަސަރުތަކެއް ކުރުވައިފިއެވެ.
މީގެ 36 އަހަރު ކުރިން، 3 ނޮވެމްބަރު 1988 ގައި ސްރީލަންކާގެ ޕްލޯޓު ޖަމާއަތުގެ ޓެރަރިސްޓުން މާލެ އަރައި ރާއްޖޭގެ ޤާނޫނީ ވެރިކަން ފުރޮޅާލުމަށް ހަމަލާދިނުމުން، އެދުވަހު ސިފައިންގެ ތެރެއިން އެންމެ ޖެހިލުން ކުޑަ ހިތްވަރެއް ކުރެއްވި އެއްބޭފުޅަކީ މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލެވެ. ސިފައިންގެއަށް އޮހެމުންދިޔަ ވަޒަންތަކުގެ ތެރެއިން، ދުޝްމިނުންގެ ހަރަކާތްތައް ހުރިނެތްގޮތް ބެލުމަށް ސިފައިންގެ ތެރެއިން ޓީމެއް މާލެ ތެރެއަށް ނެރުމަށް ނިންމަވައި، އެޓީމުގެ އިސް ކޮމާންޑަރަކަށް ހުންނެވީވެސް އޭރު އުމުރުން 28 އަހަރުގެ މޫސާ އަލީ ޖަލީލެވެ. އެކުގައި ސިފައިންގެ ތެރެއިން ނިކުންނެވި ބައެއް ބޭފުޅުން ދުޝްމިނުންގެ ހަމަލާތަކުގައި ޝަހީދުވިއެވެ. މާލެ ތެރޭގައި ދުޝްމިނުންގެ ކަންކަން ހުރި ގޮތް ބެލުމަށްފަހު، ދުޝްމިނުންގެ އުންޑަތަކުގެ ތެރެއިން މޫސާ އަލީ ޖަލީލު އެނބުރި ސިފައިންގެއަށް ވަޑައިގަތެވެ. މިއީ މިޒަމާނުގެ އަސްކަރީ ނަޒަރުން ބަލާއިރުވެސް އާދަޔާޚިލާފް ހިތްވަރުގަދަ، ކެރުންތެރިކަމެކެވެ.
3 ނޮވެމްބަރުގައި ކުރެއްވި އާދަޔާޚިލާފް ހިތްވަރުފުޅުގެ ސަބަބުން، މޫސާ އަލީ ޖަލީލު ވެވަޑައިގެންފައިވަނީ ދިވެހި ރައްޔިތުންގެ ލޯތްބާއި އިހްތިރާމް ވަރަށް ބޮޑަށް ލިބިވަޑައިގެންނެވި ބޭފުޅަކަށެވެ.
އެކަމަކު މިރެޔާ ހަމައަށް މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލަށް އޮތީ ރާއްޖެ ދިފާއުކޮށް ކުރެއްވި މަސައްކަތްޕުޅަށް ނިޝާން އަސްކަރީ ވެރިކަމުގެ އިއްޒަތް ނުލިބިއެވެ.
ދިވެހި އަސްކަރީ ޝަރަފުގެ އެންމެ މަތީ އިއްޒަތް މިރޭ މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލަށް އެރުވުމުގެ ކުރިން، ރައީސް ޑރ. މުހައްމަދު މުއިއްޒު ނެރުއްވި ގަރާރު، ރައީސް އޮފީހުގެ ކޯޕަރޭޓް އެފެެއާޒް ސެކްރެޓަރީ ހަސަން އާމިރު ކިޔުއްވަމުން ގެންދެވި ވަގުތަކީ މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލުގެ ލޯފުޅުން ކަރުނަ ހިލިގެން ދިޔަ ވަގުތެކެވެ. މޫނުފުޅުން، 3 ނޮވެމްބަރުގެ އަސަރުތައް ސާފުކޮށް ފެންނަން ހުއްޓެވެ. ނިޝާން އަސްކަރީ ވެރިކަމުގެ އިއްޒަތުގެ ވެރިޔާ، މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލަށް ކޮށްފައިވާ އަސަރު އެހައިވެސް ބޮޑެވެ.
މި އިއްޒަތް، ނ.ޢ.ވ. މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލަށް އެރުވުމަށް ރައީސުލްޖުމްހޫރިއްޔާ ކަނޑައެޅުއްވީ، ދިވެހި ގައުމާއި ރައްޔިތުންގެ ސަލާމަތަށްޓަކައި ޢަސްކަރީ ގޮތުން ކުރެއްވި އަގުހުރި ހިދުމަތްތަކާއި، ގައުމުގެ އިސްތިގްލާލާއި ސިޔާދަތު ރައްކާތެރިކޮށް ދެމެހެއްޓުމަށްޓަކައި ކޮށްދެއްވި މަސައްކަތްޕުޅުތަކާއި، ހާއްސަކޮށް، 1988 ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ނުރައްކާތެރި އުދުވާނީ ހަމަލާއާ ގުޅިގެން، ދިވެހި ގައުމާއި ރައްޔިތުންގެ ދިފާއުގައި އެމަނިކުފާނު ކުރެއްވި މަތިވެރި ޖިހާދުގެ އަގު ވަޒަންކުރެއްވުމުގެ ގޮތުންނެވެ.
ނ.ޢ.ވ. މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލު ސިފައިންގެ ހިދުމަތާ ގުޅިވަޑައިގެންނެވީ، 1980 ވަނަ އަހަރުގެ ޖުލައި މަހުގެ 3 ވަނަ ދުވަހުއެވެ. އެމަނިކުފާނު ދިވެހި ޢަސްކަރިއްޔާގައި އިހްލާސްތެރިކަމާ އެކުގައި އަދާކުރެއްވި ގައުމީ ހިދުމަތާއި، ދެއްކެވި މަތިވެރި އަހުލާގުގެ ސަބަބުން، ޝަރަފުގެ ނިޝާނުގެ ގޮތުގައި، 9 ކުލައާއި، 11 މެޑެލް ލިބިވަޑައިގެންފައިވެއެވެ. އެގޮތުން ލިބިވަޑައިގެންފައިވާ ބައެއް ކުލަތަކުގެ ތެރޭގައި އިހުލާސްތެރި ހިދުމަތުގެ ކުލައާއި، ސިފައިންގެ ހިދުމަތުގެ ކުލަ، އަދި އަހްލާގީ ކުލަ ހިމެނެއެވެ.
މީގެއިތުރުން އެމަނިކުފާނަށް ލިބިވަޑައިގެންނެވި ބައެއް މެޑެލްތަކުގެ ތެރޭގައި، 3 ނޮވެންބަރުގެ މެޑެލް، ޖިހާދުގެ ރަތް މެޑެލް، ހުރަވީ ރަން މެޑެލް، ނަމޫނާ ޢަސްކަރީ އިސް ހިދުމަތްތެރިންގެ މެޑެލް، މަތިވެރި ހިދުމަތުގެ މެޑެލް އަދި ރައިސުލްޖުމްހޫރިއްޔާގެ މެޑެލް ހިމެނެއެވެ.
ނ.ޢ.ވ. މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލަކީ ދިވެހި ޢަސްކަރިއްޔާގެ އިސް މަގާމުތަކެއް އަދާކުރައްވާފައިވާ ބޭފުޅެކެވެ. އެގޮތުން ދިވެހި އަސްކަރިއްޔާގެ އަސްކަރީ އެންމެ އިސް ކޮމާންޑަރެއްގެ މަގާމާއި އެމް.އެން.ޑީ.އެފްގެ ޗީފް އޮފް ޑިފެންސް ފޯސްގެ މަގާމު ހިމެނެއެވެ. އަދި މިނިސްޓްރ އޮފް ޑިފެންސް ނޭޝަނަލް ސެކިއުރިޓީގެ މަގާމުވެސް އެމަނިކުފާނު ފުރުއްވާފައިވެއެވެ.
ރައީސުލްޖުމްހޫރިއްޔާ މި އިއްޒަތް ނ.ޢ.ވ. މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލަށް އެރުވީ ގާނޫނު ނަންބަރު 97/1 (ދިވެހިރާއްޖޭގެ ޢިއްޒަތުގެ ގާނޫނު)ގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިހުތިޔާރުގެ ދަށުންނެވެ.
