ކުރިއަށް އޮތް 2025 ވަނަ އަހަރުން ފެށިގެން ކޮންމެ އަހަރަކުވެސް، ދިވެހިރާއްޖޭގެ ގައުމީ ހިދުމަތުގެ ޕްރޮގްރާމުގެ ނަމުގައި ދިވެހި އަސްކަރިއްޔާއާއި ފުލުހުންގެ ހިދުމަތަށް އޮފިސަރުން ރެކްރޫޓުކުރުމުގެ ގައުމީ ޕްރޮގްރާމެއް ހިންގަމުންދާނެކަން، ރައީސުލްޖުމްހޫރިއްޔާ ޑރ މުހައްމަދު މުއިއްޒު އިއުލާން ކުރައްވައިފިއެވެ.
އެމަނިކުފާނު މިކަން އިއުލާން ކުރައްވާފައި ވަނީ، މިރޭ ބޭއްވެވި ނަސްރުގެ ދުވަހުގެ ރަސްމީ ޖަލްސާ ޝަރަފުވެރިކޮށްދެއްވައި، ގައުމާ މުހާތަބުކުރައްވައި ވާހަކަފުޅުދައްކަވަމުންނެވެ.
ނަސްރުގެ ދުވަސް ފަދަ މުނާސަބާތައް ފާހަގަކުރަމުން ދާއިރު، މުސްތަގުބަލަށް ފޯރުކޮށްދެވޭ ދިވެހި ގައުމަކީ، ސަލާމަތާއި މިނިވަންކަން ލިބިގެންވާ ގައުމަކަށް ހެދުމަށްޓަކައި ކުރަންޖެހޭ ކަންތައްތަކެއް އެބަހުރިކަން ފާހަގަކުރައްވައި، ވާހަކަފުޅު ކުރިއަށް ގެންދަވަމުން ރައީސް ވަނީ، ދިވެހިރާއްޖޭގެ ގައުމީ ހިދުމަތުގެ ޕްރޮގްރާމް ކުރިއަށް ގެންދަވާނެ ގޮތުގެ މައްޗަށް އަލިއަޅުއްވާލައްވާފައެވެ.
އެގޮތުން، ސާނަވީ ތައުލީމު ނިންމުމަށްފަހު އެކި ސަބަބުތައް މެދުވެރިވެގެން ތައުލީމީ ހަޔާތް ކުރިއަށް ގެންދެވެން ނެތް، އަދި ވަޒީފާގެ ފުރުސަތުވެސް ތަނަވަސްވެފައި ނެތް، 16 އަހަރުން މަތީގެ ދިވެހި ދަރީން، ދިވެހިރާއްޖޭގެ ގައުމީ ހިދުމަތުގެ ޕްރޮގްރާމުގައި ބައިވެރިކޮށް، ދިވެހި އަސްކަރިއްޔާ ނުވަތަ ފުލުހުންގެ ހިދުމަތަށް ރެކްރޫޓް ކުރެވޭނެކަމަށް ރައީސް ވިދާޅުވިއެވެ.
އަދުގެ ތަފާސް ހިސާބުތަކަށް ބަލާއިރު ކޮންމެ އަހަރަކުވެސް އޯލެވެލް ސަނަދު ފުރިހަމަ ކުރުމަށްފަހު އެއަށްވުރެ މަތީ ފާހަކަށް ނުކިޔެވި، ނުވަތަ ވަޒީފާއެއް ނެތިފައި ތިބުމަށް 500 އާއި 1000 އާއި ދެމެދުގެ އަދަދެއްގެ ކުދިންނަށް މަޖުބޫރުވާ ކަމަށާއި، ނަމަވެސް ދިވެހިރާއްޖޭގެ ގައުމީ ހިދުމަތުގެ ޕްރޮގްރާމުގެ ސަބަބުން އެކަން ބަދަލުވެގެންދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ޢިލްމާއި ވަޒީފާގެ ފުރުސަތުތަކުން މަހްރޫމުވުމުގެ ނަތީޖާއަކަށް ވަނީ މަސްތުގެ ވަބާގެ ތެރެއަށް ވަދެގެންދާ މީހުންގެ އަދަދު އިތުރުވުން ކަމަށާއި، އެކަމުގެ ނަތީޖާއަކަށް ވަނީ ސަރުކާރާއި، މުޖުތަމަޢު އަދި އާއިލާތަކުން އުފުލަންޖެހޭ ބުރަ ބޮޑުވުން ކަމުގައި ރައީސް ވިދާޅުވިއެވެ. އަދި އެކަމުގެ ނޭދެވޭ އަސަރު، އިގްތިސާދަށްވެސް ފޯރާކަން ފާހަގަކުރައްވަމުން އެމަނިކުފާނު ވަނީ، ދިވެހިރާއްޖޭގެ ގައުމީ ހިދުމަތުގެ ޕްރޮގްރާމުގެ ތެރެއިން، އަސްކަރިއްޔާއާއި ފުލުހުންގެ ހިދުމަތަށް، ކުރިއަށް އޮތް 4 ވަރަކަށް އަހަރު ދުވަހުގެ ތެރޭގައި 5000 ޒުވާނުން ރެކްރޭޓުކުރެވޭނެކަމަށް ވިދާޅުވެފައެވެ. އޭގެ ތެރޭގައި ހިމެނެނީ އަސްކަރީ ހިދުމަތަށް ރެކްރޭޓު ކުރާ ހަތަރުހާހެއްހާ ސިފައިންނާއި، ފުލުހުންގެ ހިދުމަތަށް ރެކްރޫޓުކުރާ ހާހެއްހާ އޮފިސަރުންކަމުގައި އެމަނިކުފާނު ވިދާޅުވިއެވެ.
ދިވެހިރާއްޖޭގެ ގައުމީ ހިދުމަތުގެ ޕްރޮގްރާމަކީ ގާނޫނުން ބާރު ލިބިގެން ހިންގާނެ ޕްރޮގްރާމެއްކަން ރައީސް ވަނީ ފާހަގަކުރައްވާފައެވެ. އަދި، މި ގައުމީ ޕްރޮގްރާމް ހިންގުމަށްޓަކައި މާލީ ގޮތުން ކަނޑައަޅާފައިވާ ބައެއް ކަންކަންވެސް ރައީސް މިރޭ ވަނީ ދިވެހި ޤައުމާ ހިއްސާކުރައްވާފައެވެ. އެގޮތުން 2025 ވަނަ އަހަރަށް ކަނޑައަޅާފައިވާ ދައުލަތުގެ ބަޖެޓުގައި ނިއު ޕޮލިސީ އިނިޝިއޭޓިވްސް (އެންޕީއައި)ގެ ތެރެއިން 400 މިލިއަން ރުފިޔާ، ދިވެހިރާއްޖޭގެ ގައުމީ ހިދުމަތުގެ ޕްރޮގްރާމަށް ހާއްސަ ކުރެވޭނެ ކަމަށް ރައީސް ވިދާޅުވިއެވެ. އަދި ކޮންމެ އަހަރަކު، އިތުރު 400 މިލިއަން ރުފިޔާ އެ ޕާރޮގްރާމަށް އިތުރު ކުރެވޭނެކަން އެމަނިކުފާނު ފާހަގަކުރެއްވިއެވެ.
ރައީސްގެ ވާހަކަފުޅު ނިންމަވާލައްވާފައި ވަނީ، ގައުމަކަށް ބޭނުންވަނީ، އެތެރެއާއި ބޭރުން އަންނަ ދުޝްމަނުންގެ ކިބައިން ގައުމު ދިފާއު ކުރުމަށްޓަކައި ގުރުބާން ވާންކެރޭ ރައްޔިތުންތަކެއް އެ ގައުމެއްގައި ތިބުންކަން ފާހަގަކުރައްވަމުންނެވެ.
ޚަބަރު: ރައީސް އޮފިސް
