ރާއްޖެއިން މަހަކު 400 އަށްވުރެ ގިނަ ކޮންޓެއިނަރުގެ މުދާ ސީޓު-އެއާ ކާގޯ ހިދުމަތް މެދުވެރިކޮށް ބޭރުކުރުމުގެ ފުރުސަތު އެބައޮތް ކަމަށާއި، މިއީ ރާއްޖޭގެ އިޤްތިޞާދަށް އާ ދިރުމެއް ގެނެސްދޭނެ ސިނާޢަތެއްކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ މުޙައްމަދު ވަޖީޙް ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމަށް އަހަރެއް ނުވަނީސް، "ސީޓު އެއަރ ކާގޯ" ގެ ނަމުގައި މި އާ ވިޔަފާރި ފެށި، ތަރައްޤީވަމުން އަންނަ ކަމަށް ވަޖީޙް ވިދާޅުވިއެވެ. މި ޚިދުމަތަކީ ކަނޑު މަގުން އަންނަ މުދާ ޓްރާންސިޓްކޮށް ވައިގެ މަގުން ދުނިޔޭގެ އެހެން ޤައުމުތަކަށް ފޮނުވުމެވެ.
މި އަހަރުގެ މާރޗް މަހު ޓަރކިޝް އެއަރލައިންސްއާއެކު ފުރަތަމަ އެއްބަސްވުމުގައި ސޮއިކުރެވުނު ކަމަށާއި، މޭ މަހު ފުރަތަމަ ކާގޯ ޝިޕްމަންޓް ފޮނުވާލެވުނު ކަމަށް ވަޖީޙް ވިދާޅުވިއެވެ. މިހާރު މައިގަނޑު ގޮތެއްގައި ބޭރުކުރެވެނީ ބަންގްލަދޭޝްގައި އުފައްދާ އަންނައުނުގެ ބާވަތްތަކެވެ.
އޮކްޓޯބަރު މަހު އެކަނި 96 ކޮންޓެއިނަރު (418 ޓަނުގެ މުދާ 34946/ދާގީނާ) ވައިގެ މަގުން ބޭރުކުރެވުނު ކަމަށް ވަޖީޙް ހާމަކުރެއްވިއެވެ. މިހާރު 7 އެއަރލައިނަކުން މި މަސައްކަތުގައި ބައިވެރިވެއެވެ.
މި ޚިދުމަތް އިތުރަށް ފުޅާކުރުމަށް އެމްޕީއެލްގެ ޓީމަކާއި އިނަރ މޯލްޑިވްސްގެ ވެރިޔާ މުޙައްމަދު ފިރާޤް ބަންގްލަދޭޝްގެ ޗިޓަގޮންގއަށް ޒިޔާރަތްކޮށް، އެ ޤައުމުގެ ގާމެންޓް ފެކްޓަރީތަކުގެ ވެރިންނާ މަޝްވަރާކުރެއްވި ކަމަށްވެސް ވަޖީޙް ވިދާޅުވިއެވެ. މީގެ އިތުރުން. ރައީސް ޑރ. މުޢިއްޒު ވަނީ މި މަސައްކަތުގައި އެމްޕީއެލްެމްޕީއެލްއާއި އެމްއޭސީއެލް ގުޅިގެން މަސައްކަތްކުރުމަށް އިރުޝާދު ދެއްވާފައިވާ ކަމަށްވެސް ވަޖީޙް ފާހަގަކުރެއްވިއެވެ.
މި މަސައްކަތް ރަނގަޅަށް ކުރެއްވިއްޖެނަމަ މަހެއްގެ މައްޗަށް 400 އަށްވުރެގިނަ ކޮންޓެއިނަރުގެ މުދާ ކަނޑުމަގުން ރާއްޖެ ގެނެސް، ވައިގެ މަގުން ދުނިޔޭގެ އެކި ގައުމުތަކަށް ފޮނުވުމުގެ ފުރުސަތު އެބަ އޮތްކަމަށް ވަޖީޙް ފާހަގަކުރެއްވިއެވެ. މިކަމަށްޓަކައި، (ކޮންޓއިނަރ ތައް ރާއްޖެ ގެނައުމަށްޓަކައި) ރާއްޖެއަށް ދަތުރު ކުރާ ޝިޕިންގ ލައިންތަކާއެކު ވާހަކަ ދެކެވެމުންދާ ކަމަށާއި، މިމަސައްކަތަށް ބޭނުންވާ، މެޝިނަރީތަކާއި އިކުއިޕްމަންޓުތައް ހަމަކޮށް، ކަސްޓަމަރުން ހިތްހަމަ ޖެހޭފަދަ ޚިދުމަތްތަކެއް ފޯރު ކޮށްދެވޭތޯ މަސައްކަތްކުރަމުންދާ ކަމަށް ވަޖީޙް ވިދާޅުވިއެވެ.
