ލ. އަތޮޅުގައި ސްކޫލް ދަރިވަރުންނަށް އަމާޒުކޮށްގެން ޓްރެފިކް މޮނީޓާސް ޕްރޮގްރާމެއް ފަށައިފިއެވެ.
މި ޕްރޮގްރާމަކީ ދިވެހި ފުލުހުންގެ ޚިދުމަތުގެ އެވެއާނަސް އެންޑް ޕްރިވެންޝަން ޔުނިޓާއި ލ. އަތޮޅު ފުލުހުން ގުޅިގެން ކުރިއަށްގެންދާ ހަރަކާތެކެވެ. މި ޕްރޮގްރާމް ކުރިއަށްދަނީ ނޮވެންބަރު މަހުގެ 2 އިން 7 އަށް ލ. އަތޮޅު ތައުލީމީ މަރުކަޒުގައެވެ.
މި ޕްރޮގްރާމުގެ މައިގަނޑު މަޤްޞަދަކީ އެއްގަމު ދަތުރުފަތުރުގެ ޤާނޫނާއި ގަވާއިދުތަކަށް ދަރިވަރުން އަހުލުވެރިކުރުވުމާއި، ސްކޫލު ސަރަހައްދުގައި ޓްރެފިކް ބެލެހެއްޓުމަށް ދަރިވަރުން ތަމްރީނުކުރުމެވެ.
މީގެ އިތުރުން، މި ޕްރޮގްރާމުގައި ރިވެތި ބަހުން މުއާމަލާތުކުރުމުގެ ހުނަރުތައް ދަސްކޮށްދިނުމާއެކު، އަމިއްލަ ސަލާމަތާއި ރައްކާތެރިކަމަށް ސެލްފް ޑިފެންސް ކުލާސްތަކެއްވެސް ކުރިއަށްގެންދާނެއެވެ.
މި ޕްރޮގްރާމުގައި ބައިވެރިވާ ދަރިވަރުންގެ ތެރޭގައި ލ. އަތޮޅު ތައުލީމީ މަރުކަޒުގެ 29 ދަރިވަރުންނާއި، ހަމަދުބިން ޚަލީފާ އާލްޘާނީ ސްކޫލްގެ 35 ދަރިވަރުންނާއި، އަދި އިހައްދޫ ސްކޫލްގެ 36 ދަރިވަރުން ހިމެނެއެވެ. މި ހުރިހާ ދަރިވަރުންވެސް ޓްރެފިކް މޮނީޓަރުންގެ ގޮތުގައި ތަމްރީނުކުރެވޭނެއެވެ.
އަދި މި ހަފުތާގެ ތެރޭގައި ލ. އަތޮޅުގެ އެކި ރަށްރަށުގައި ޓްރެފިކް އެވެއާނަސް ސެޝަންތަކާއި ފަހި ރާސްތާ ޕްރޮގްރާމްވެސް ކުރިއަށްގެންދާނެކަމަށް ދިވެހި ފުލުހުންގެ ޚިދުމަތުން މަޢުލޫމާތު ދެއްވާފައިވެއެވެ.
މި ޕްރޮގްރާމަކީ ދަރިވަރުންގެ މެދުގައި ޓްރެފިކް ސަލާމަތާއި ރައްކާތެރިކަމުގެ ހޭލުންތެރިކަން އިތުރުކޮށް، އެކަމަށް އަހުލުވެރި ޖީލެއް ބިނާކުރުމަށް އެޅޭ މުހިންމު ފިޔަވަޅެއްކަމުގައި ބެލެވެއެވެ.
