ބ. ހިތާދޫގައި ކުރިއަށް ގެންދެވުނު "ފަހިރައްކާ" ޕްރޮގްރާމް ކާމިޔާބުކަމާއެކު ނިންމާލައިފިއެވެ.
މި ޕްރޮގްރާމަކީ ދިވެހި ފުލުހުންގެ ޚިދުމަތާއި، ހިތާދޫ ކައުންސިލް، އަންހެނުންގެ ކޮމިޓީ އަދި ސްކޫލު ގުޅިގެން ކުރިއަށް ގެންދިޔަ ޕްރޮގްރާމެކެވެ. އޮކްޓޫބަރު 15 އިން ނޮވެމްބަރު 3 އަށް ކުރިއަށް ގެންދެވުނު މި ޕްރޮގްރާމަކީ 7 ސްޓްރެޓެޖީއެއްގެ މައްޗަށް ބިނާކޮށް ރޭވިފައިވާ ޕްރޮގްރާމެކެވެ. މި ޕްރޮގްރާމުގެ މައިގަނޑު މަޤްޞަދަކީ އަމާން މުޖުތަމަޢުއެއް ބިނާކުރުމެވެ.
"ފަހިރައްކާ" ޕްރޮގްރާމުގެ ދަށުން ހިންގުނު ހަރަކާތްތަކުގެ ތެރޭގައި ޤާނޫނާއި ގަވާއިދަށް ހޭލުންތެރިކުރުމުގެ ސެޝަންތަކާއި، ގެވެށި އަނިޔާއާއި ސައިބަރ ކުށްތަކަށް ހޭލުންތެރިކުރުމުގެ ޕްރޮގްރާމްތައް ހިމެނެއެވެ. މީގެ އިތުރުން، ކަސްރަތު ޕްރޮގްރާމްތަކާއި، ބެލެނިވެރިންނަށް ޚާއްޞަ ސެޝަންތަކާއި، ލީޑަރޝިޕް އަދި ޓީމް ބިލްޑިންގ ސެޝަންތައްވެސް ވަނީ ކުރިއަށް ގެންގޮސްފައެވެ.
ދިވެހި ފުލުހުންގެ ޚިދުމަތުން މަޢުލޫމާތު ދެއްވިގޮތުގައި، މި ޕްރޮގްރާމުގައި ރަށުގެ އެކި އުމުރުފުރާގެ ގިނަ ބައިވެރިން ބައިވެރިވެ، ޕްރޮގްރާމުގެ މަޤްޞަދު ޙާޞިލުކުރުމަށް އެހީތެރިވެދީފައިވެއެވެ. އަދި މިފަދަ ޕްރޮގްރާމްތައް އެހެން ރަށްރަށުގައިވެސް ކުރިއަށް ގެންދިއުމަށް ރޭވިފައިވާކަމަށް ފުލުހުން ވަނީ ހާމަކުރައްވާފައެވެ.
