އއ. ބޮޑުފޮޅަދޫ އަދި އއ. ފެރިދޫގައި ބޭންކް އޮފް މޯލްޑިވްސް (ބީއެމްއެލް)ގެ ސެލްފްސާރވިސް އޭޓީއެމްގެ ޚިދުމަތް މިއަދު ފަށައިފިއެވެ.
މި ޚިދުމަތް ފެށުނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މެނިފެސްޓޯއާ އެއްގޮތަށް، އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާ، ބީއެމްއެލް އަދި ސްޓެލްކޯއާ އެކު ވެވުނު އެއްބަސްވުމެއްގެ ދަށުންނެވެ. އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން މަޢުލޫމާތު ދެއްވިގޮތުގައި، ސަރުކާރުން އަތޮޅުތެރޭގައި އޭޓީއެމް ޚިދުމަތް ފުޅާކުރުމަށް މަސައްކަތްކުރަމުންދާކަމަށާއި، ކުރިއަށް އޮތް ދުވަސްތަކުގައި އިތުރު އޭޓީއެމްތަކެއްގެ ޚިދުމަތް ފެށިގެންދާނެއެވެ. މީގެ އިތުރުން، ބޭންކް އޮފް މޯލްޑިވްސް ފިޔަވައި އެހެން ބޭންކުތަކުގެ ޚިދުމަތްވެސް އަތޮޅުތެރެއަށް ފުޅާކުރުމަށް ސަރުކާރުން މަސައްކަތްކުރަމުންދާކަމަށް އެ ވުޒާރާއިން ވަނީ ފާހަގަކުރައްވާފައެވެ.
މި މަޝްރޫޢުގެ މަޤްޞަދަކީ އަތޮޅުތެރޭގެ ރަށްތަކުގެ ތެރެއިން އޭޓީއެމް ޚިދުމަތް ނުލިބޭ ރަށްރަށަށް މި ޚިދުމަތް ފޯރުކޮށްދިނުމެވެ. މިއީ ރައްޔިތުންނަށް ފަސޭހަކަމާއެކު ބޭންކިންގ ޚިދުމަތްތައް ލިބިގަތުމަށް މަގުފަހިކޮށްދޭނެ މުހިންމު ފިޔަވަޅެއް ކަމުގައި ބެލެވެއެވެ.
ސަރުކާރުގެ މި މަސައްކަތުގެ ސަބަބުން، އަތޮޅުތެރޭގެ ރަށްރަށުގެ އިޤްތިޞާދީ ޙަރަކާތްތައް އިތުރުވެ، ވިޔަފާރިތަކަށް ފަސޭހަވެގެންދާނެ ކަމަށް އުންމީދުކުރެވެއެވެ. އަދި މި ޚިދުމަތުގެ ސަބަބުން ރަށްރަށުގެ ރައްޔިތުންނަށް ފައިސާ ނެގުމާއި ޖަމާކުރުމުގެ ޚިދުމަތް ލިބުމުގައި ދިމާވާ ދަތިތައް ޙައްލުވެގެންދާނެ ކަމަށްވެސް ބެލެވެއެވެ.
