ބޮލީވުޑްގެ ނަން މަޝްހޫރު ފިލްމު ތަރި ޝާރުހާން, ސިނގިރޭޓު ބުއިން ހުއްޓާލިކަން އިއުލާނުކޮށްފިއެވެ.

ޝާރުހާން މި ހަބަރު އިއުލާނުކުރީ, އޭނާގެ އުފަންދުވަހުގެ މުނާސަބަތުގައި މި ދިޔަ ހޮނިހިރު ދުވަހު ފޭނުންނާ ބޭއްވި 'މީޓް އެންޑް ގްރީޓް' އިވެންޓެއްގައެވެ.

"ވަރަށް އުފާވެރި ހަބަރެއް އެބައޮތް ހުރިހާ އެންމެންނަށް ހިއްސާކޮށްލަން. އަހަރެން މިހާރު ސިނގިރޭޓު ބުއިމުގެ އާދަ ދޫކޮށްލައިފިން. އަދި ވެސް ނޭވާ ލުމުގަ ކުޑަ އުނދަގޫ ކަމެއް ހުރޭ އެކަމަކު އިރާދަކުރެއްވިއްޔާ އެކަން ވެސް ރަނގަޅުވާނެ" ސިނގިރޭޓު ބުއިން ހުއްޓާލިކަން އިއުލާނުކުރަމުން ޝާރުހާން ބުންޏެވެ.

ޝާރުހާން ވަނީ މީގެ ކުރިން ވަރަށް ހާމަ ގޮތެއްގައި ސިނގިރޭޓު ބުއިމަށް އޭނާގެ ގައިގަ ހިފާފައި ހުރި ނުބައި އާދައާ ބެހޭ ގޮތުން ވާހަކަދައްކާފައެވެ. ސިނގިރޭޓަށް އެންމެ ގަދަޔަށް ދެވި ހިފާފައި ހުރި ދުވަސްކޮޅު ދުވާލަކު 100 ސިނގިރޭޓު ބޯ ކަމަށް ޝާރުހާން ވަނީ ހާމަކޮށްފައެވެ.

ދުނިޔޭގެ އެކިކަންކޮޅުން އެތައް ބަޔެއްގެ ލޯބި ހޯދާފައިވާ 59 އަހަރުގެ ޝާރުހާން, ސިނގިރޭޓު ބުއިމުގެ ނުރައްކާތެރި އާދަ ދޫކޮށްލިކަން އިއުލާނުކުރުމާއެކު އޭނާގެ ފޭނުން ވަނީ އެކަމާ އުފާފާޅުކޮށް އޭނާގެ ނިންމުމަށް ތައުރީފު ކޮށްފައެވެ.

އިތުރު ލިޔުންތައް ބޮލީވުޑް