އާސެނަލްގެ ސްޕޯޓިން ޑިރެކްޓަރު, އެޑޫ ގެސްޕާ މަގާމުން އިސްތިއުފާ ދިނުމަށް ނިންމައިފިއެވެ.
އެޑޫ, އާސެނަލްގެ މެނޭޖްމަންޓް ޓީމާ އެންމެ ފުރަތަމަ ގުޅުނީ 2019 ވަނަ އަހަރުގައެވެ. އޭނާ އޭރު އާސެނަލްގައި މަސައްކަތް ކުރަމުން އައީ ކްލަބުގެ ޓެކްނިކަލް ޑިރެކްޓަރުތެ ގޮތުގައެވެ.
އާސެނަލްއަށް އެތައް ކުރިއެރުމެއް ހޯދައިދެމުން އަންނަ މިކެލް އާޓެޓާ އެ ކްލަބަށް ގެނައުމަށް އެންމެ ބުރަ މަސައްކަތެއް ކުރި އެއް ފަރާތަކީ އެޑޫއެވެ.
އާސެނަލްއަށް އެޑޫ ގެނެސްދިން ކުރިއެރުންތަކުގެ ސަބަބުން 2022 ވަނަ އަހަރުގެ ނޮވެންބަރު މަހު އޭނާ ވަނީ އެ ކްލަބުގެ ސްޕޯޓިން ޑިރެކްޓަރުގެ މަގާމަށް އައްޔަނު ކޮށްފައެވެ. މިއަދާ ހަމައަށް އޭނާ ވަނީ މި މަގާމުގައި ހުރެ, އާސެނަލްގެ ސްކޮޑަށް އެތައް ޒުވާން ހުނަރުވެރި ކުޅުންތެރިންނެއް އިތުރުކޮށްފައެވެ.
އާސެނަލްގައި 5 ކާމިޔާބު އަހަރު ހޭދަކުރުމަށް ފަހު އެޑޫ އެ ކްލަބު ދޫކޮށްލަން ނިންމާފައިވާ ސަބަބެއް އަދި ރަސްމީކޮށް އޭނާ އެ މަގާމުގެ މަސައްކަތްތައް ހުއްޓާލާނެ އިރެއް އަދި ހާމަކޮށްފައެއް ނުވެއެވެ.
