ރ. ހުޅުދުއްފާރުގައި ޒަމާނީ ފެންވަރަށް ތަރައްގީ ކުރަމުން އަންނަ މަގުތަކުގައި ތާރު އެޅުމުގެ މަސައްކަތް ފެށުމުގެ ކުރިން، އެންމެ ފަހުގެ ތައްޔާރީތައް މިހާރު ވަނީ ފުރިހަމަ ކުރެވިފަކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ވިދާޅުވެއްޖެއެވެ.
މިގޮތުން، އާރްޑީސީއިން މިއަދު ހުޅުދުއްފާރުގެ އަމީނީމަގުގެ 60 މީޓަރުގައި ތާރު އެޅުމަށް ތައްޔާރު ވުމުގެ ގޮތުން ތާރުގެ ޓްރަޔަލް ފަށަލައެއް އަޅައި ނިންމާފައިވާކަމަށް އެ ކުންފުނިން މައުލޫމާތު ދީފައިވެއެވެ.
މި މަޝްރޫއުގެ ދަށުން ހުޅުދުއްފާރުގެ ޖުމްލަ 6 މަގެއްގައި ތާރު އެޅުމަށް ވަނީ ހަމަޖެހިފައެވެ. މި މަޝްރޫއުގެ ތެރޭގައި އައު އަސްފަލްޓް މަގުތައް ހެދުމާއި، ސައިޑް ވޯކް ޑިޒައިންކޮށް އެޅުމާއި، މަގުގެ ދެފަރާތުގައި ސްޓޯމް ވޯޓަރ ޑްރެއިނެޖް ނިޒާމެއް ޤާއިމްކުރުން ހިމެނެއެވެ.
މީގެ އިތުރުން، މަގުތަކުގައި ސްޕީޑް ބްރޭކަރުތަކާއި މަގުބައްތިތައް ހަރުކުރުމާއި، މިހާރު ހުރި މަގުތަކުގައިވެސް މަގުބައްތި ޖެހުމާއި، ސްޕީޑް ބްރޭކަރު އެޅުމާއި، ކަފި ހުރަސް ކުރެހުން ހިމެނެއެވެ.
މި މަޝްރޫއަކީ 88,912,040.55 ރުފިޔާގެ މަޝްރޫއެކެވެ.
