ދިވެހިރާއްޖެ އާއި ތުރުކީވިލާތުން ވިޔަފާރީގެ ގުޅުން ބަދަހިކުރުމަށްޓަކައި މިނިވަން ވިޔަފާރީގެ އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކުރެއްވީ އިޤުތިޞާދީ ތަރައްޤީއާއި ވިޔަފާރީގެ ވަޒީރު މުޙައްމަދު ސަޢީދު އާއި ތުރުކީގެ ވިޔަފާރީގެ ވަޒީރު ޕްރޮފެސަރ ޑރ. އޯމަރ ބޯލަޓްއެވެ.
މި އެއްބަސްވުމުގެ ސަބަބުން ތުރުކީއަށް މަސް އެކްސްޕޯޓްކުރުން ފަސޭހަވުމުގެ އިތުރުން، ވިޔަފާރީގެ ހުރަސްތައް މަދުކޮށް، ދެ ޤައުމުގެ ވިޔަފާރީގެ ގުޅުން ވަރުގަދަކޮށް، އަދި ދެ ޤައުމުގެ ދެމެދުގައި ކުރެވޭ ވިޔަފާރި އިތުރުކުރުމަށް މަގުފަހިވެގެންދާނެއެވެ.
ދިވެހި މަސް އެކްސްޕޯޓަރުންނަށް ތުރުކީގެ މާރކެޓްގައި އެމީހުންގެ ވިޔަފާރި ފުޅާކުރުމުގެ ފުރުޞަތު ލިބޭނެއެވެ. އަދި ދިވެހި ކަސްޓަމަރުންނާއި ވިޔަފާރިތަކަށް ތުރުކީގެ އުފެއްދުންތައް ކުޑަ އަގެއްގައި ލިބުމުގެ ފުރުޞަތު ހުޅުވިގެންދާނެއެވެ.
މި އެއްބަސްވުމާ ބެހޭގޮތުން މަޝްވަރާކުރެވިފައިވަނީ ފާއިތުވި އަހަރުގެ ނޮވެމްބަރު މަހު ރައީސުލްޖުމްހޫރިއްޔާ ތުރުކީއަށް ކުރެއްވި ދަތުރުފުޅުގައި، ތުރުކީގެ ރައީސް ރެސެޕް ޠައްޔިބް އަރްދޯއާން އާއެކު ބައްދަލުކުރައްވައި ދެ ޤައުމުގެ ގުޅުން އިތުރަށް ބަދަހިކުރެއްވުމާ ބެހޭގޮތުން މަޝްވަރާކުރެއްވި ދަނޑިވަޅުގައެވެ.
ދެ ޤައުމުގެ ވެރިން ވިޔަފާރި، އިންވެސްޓްމަންޓް، އިއާދަކުރަނިވި ހަކަތަ އަދި މަތީ ތަޢުލީމުގެ ދާއިރާތަކުން އެއްބާރުލުން ދިނުން ހިމެނޭގޮތަށް އިޤްތިޞާދީ ގުޅުން ވަރުގަދަކުރުމާ ބެހޭގޮތުން ފުޅާ ދާއިރާއެއްގައި މަޝްވަރާކުރެއްވިއެވެ.
