ކަނބަލުންގެ ނަފުސާނީ ދެޅަހެއޮކަން އިތުރުކުރުމަށާއި ދަރިން ތަރުބިއްޔަތު ކުރުމުގައި އަމަލުކުރަންޖެހޭ ކަންކަމަށް ހޭލުންތެރިކަން އިތުރު ކުރުމުގެ މަޤްސަދުގައި ހއ. އިހަވަންދޫ ވިމެންސް ކޮމިޔުނިޓީއިން އެކަމަށް ހާއްސަ ޕްރޮގްރާމެއް ކުރިޔަށް ގެންދިމަށް ނިންމައިފިއެވެ.
އިހަވަންދޫ ވިމެންސް ކޮމިޔުނިޓީއިން މި ޕްރޮގްރާމް ކުރިޔަށްދަން ރާވާފައި ވަނީ މިމަހުގެ 9 ވަނަ ދުވަހާއި 11 ދުވަހުއެވެ.
9 ވަނަ ދުވަހު ކުރިޔަށް ގެންދާނީ ނަފްސާނީ ގޮތުން ކަނބަލުންނަށް ދިމާވާ ގޮންޖެހުންތަކުން އަރައިގަންނާނެ ގޮތާއި ނަފްސާނީ ދުޅަހެއޮކަން އިތުރު ކުރުމަށް ކުރެވިދާނެ ކަންކަމާ ގުޅޭ މައުލޫމާތު ފޯރުކޮށްދިނުމުގެ ސެޝަނެކެވެ.
އެއަށްފަހު މިމަހުގެ 11 ވަނަ ދުވަހު ކުރިޔަށް ގެންދަން ހަމަޖެހިފައި ވަނީ ދަރިން ތަރުބިއްޔަތުކުރުމުގައި މައިންބަފައިން އަމަލުކުރަންޖެހޭ ގޮތްތަކާ ގުޅޭ ސެޝަނެކެވެ. މި ސެޝަނުގައި ދަރިފުޅު ދުޅަހެއޮކުއްޖެއްގެ ގޮތުގައި ތަރުބިއްޔަތު ކުރުމަށް އަމަލު ކުރާނެ ގޮތުގެ ހުނަރުތައް ދަސްކޮށްދިނުން ހިމެނެއެވެ.
މި ސެޝަންތަކުގައި ބައިވެރިވުމުގެ ފުރުސަތު މަންމައިންގެ އިތުރުން ބައްޕައިންނަށްވެސް ހުޅުވާލާފައިވާނެ ކަމަށް އިހަވަންދޫ ވިމެންސް ކޮމިޔުނިޓީއިން މައުލޫމާތު ދެއްވައެވެ.
އިހަވަންދޫ ވިމެންސް ކޮމިޔުނިޓީގެ ރައީސާ ފާތިމަތު ޝާއިރާ ވިދާޅުވީ އިޖުތިމާއި ގޮތުން މިފަދަ ހަރަކާތްތައް އެންޖީއޯތަކާ މުއައްސަސާތައް ގުޅިގެން ހިންގުމަކީ ވަރަށް މުހިއްމު ކަމެއްކަމުގައެވެ.
އެގޮތުން މިއިވެންޓްގައި އިހަވަންދޫ ވިމެންސް ކޮމިޔުނިޓީ އާއި އެކު އިހަވަންދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީ، މަސްވެރި އިހަވަންދޫ، އިހަވަންދޫ ކައުންސިލް، އިހަވަންދޫ ޕޮލިސް، އިހަވަންދޫ ސްކޫލް އަދި އިހަވަންދޫ ކޮމިއުނިޓީ ސެންޓަރު ބައިވެރިވާކަން ފާހަގަކުރެއްވިއެވެ. “އެބޭފުޅުން އަޅުގަނޑުމެންނާއިއެކު ބައިވެރިވުމަކީ، އަޅުގަނޑުމެންނަށް ލިބުނު ވަރަށްބޮޑު ހިތްވަރެއް. ޝުކުރު ވެރިކަމާއިއެކު އެބޭފުޅުންގެ އެހީތެރިކަން ފާހަގަކުރަން” ޝާއިރާ ވިދާޅުވިއެވެ. މިއިވެންޓާއި ރަށުގައި ބޭއްވޭ އެހެން އިވެންޓްތަކާއި އެންމެ ބޮޑު ތަފާތަކަށް ޝާއިރާ ފާހަގަކުރެއްވީ، މިއިވެންޓްގައި ދާއިރާގެ ރަށެއްކަމަށްވާ މާރަންދޫ ބައިވެރިވުމެވެ. އަދި އިހަވަންދޫ ވިމެންސް ކޮމިޔުނިޓީން ވަނީ، މިއިވެންޓްގެ ފެސިލިޓޭޓަރ މައިމޫނާ ސަލީމް، ހއ ބާރަށް އަދި މޮޅަދޫގައި މިސެޝަންތައް ކުރިޔަށް ގެންދިއުމަށް ފުރުސަތު ފަހިކޮށްދީފައެވެ.މިހަރަކާތްތަކުގައި ބައިވެރިވުމުގެ ފުރުސަތު މިމަހުގެ 6 ވަނަ ދުވަހުގެ 14:00 އާއި ހަމަޔަށްވަނީ ހުޅުވާލާފައެވެ. އެހަރަކާތްތަކުގައި ބައިވެރިވާން ބޭނުންވާ ބޭފުޅުން، ފުރިހަމަނަން އަދި ގުޅޭނެ ނަންބަރ ޖައްސަވާފަ 9829919 ވައިބަރ ކޮއްލުމުން ނުވަތަ ގޫގަލްފޯމެއް ފުރުއްވައިގެން ބައިވެރިވެވޭނެއެވެ.
އިހަވަންދޫ ވިމެންސް ކޮމިޔުނިޓީ އަކީ ހޭލުންތެރި މުޖުތަމަޢުއެއް ބިނާކުރުމާއި، އަންހެނުންގެ ހިއްސާ މުޖުތަމަޢުގައި އިތުރުކުރުމާއި، ދުޅަހެޔޮ ޖީލެއް ބިނާކުރުމަށްޓަކައި އަންހެނުންގެ ދައުރު ފުޅާކުރުމާއި، އެކިއެކި ދާއިރާތަކުން ލިބެންހުރި ފުރުޞަތުތައް ހޯދައިދިނުމަށް މަސައްކަތް ކުރުމާއި، ފުދުންތެރި ދިރިއުޅުމަކަށް ބޭނުންވާނެ ހުނަރާއި ޤާބިލުކަން އިތުރުކުރުމަށްޓަކައި ތަފާތު ޕްރޮގްރާމުތައް ހިންގުމުގެ، މަގުސަދުގައި ތަފާތު ހަރަކާތްތައް ހިންގަމުންއަންނަ ޖަމިއްޔާއެވެ. އެޖަމިއްޔާ ރަޖިސްޓްރީ ކޮށްފައިވަނީ 2021 ވަނަ އަހަރުގެ އޮކްޓޯބަރު މަހުގެ 25 ވަނަ ދުވަހުއެވެ.
މައުލޫމާތު: އިހަވަންދޫ އިހަވަންދޫ.ކޮމް
