"ހިޔާވެހި ފައިނޭންސް ސްކީމް" އަކީ ދާއިމަށް ކޮންމެ އަހަރަކުވެސް ކުރިއަށްގެންދާނެ މަޝްރޫއެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ "ހިޔާވެހި ފައިނޭންސް ސްކީމް" އިފްތިތާހުކޮށްދެއްވާ ދެއްކެވި ވާހަކަފުޅުގައެވެ.
މި ސްކީމްގައި މާލެ ސަރަހަދު، އަރބަން ސެންޓަރުތައް އަދި ވަކިވަކި ރަށްތަކަށް ދޫކުރާ ލޯނު ހިމެނެއެވެ. އެއީ އަތޮޅުތަކުގެ ރަށްތަކަށް 1 މިލިޔަން ރުފިޔާގެ ކެޕްގެ ލޯނު، އަރބަން ސެންޓަރުތަކަށް ހާއްސަކޮށް 3 މިލިޔަން ރުފިޔާގެ ކެޕްގެ ލޯނު އަދި މާލެ ސަރަހައްދުން 6 މިލިޔަން ރުފިޔާއާއި ހަމައަށް ލޯނު ދޫކުރާނެއެވެ.
މީގެއިތުރުން ރައީސް ވިދާޅުވީ އެމަނިކުފާނު ވައުދުވެވަޑައިގެންނެވި ފަދައިން މިއަދު ފެށިގެން އެދަނީ މެނިފެސްޓޯގައިވެސް ހިމަނާފައިވާ ފަސް ޕަސެންޓްގެ އިންޓްރެސްޓްގައި ހިމެނޭ، އެއަށްވުރެ ބޮޑު ނުވާނެ އިންޓްރެސްޓްގެ ލޯނު ސްކީމް ދޫކުރާނެ ކަމަށް ވީ ވައުދު ފުއްދުން ކަމަށެވެ.
އަދި އެމަނިކުފާނު އަބަދުވެސް ވިދާޅުވާގޮތަށް، މިނިވަންކަމާ ގުޅޭ ސިޔާސަތުތައް ފިޔަވާ ދެން އަބަދުވެސް އެންމެ އިސްކަން ދެއްވާނެ ދާއިރާއަކީ ރައްޔިތުން ގެދޮރުވެރިކުރުމާއި ބޯހިޔާވަހިކަމުގެ ދާއިރާކަމަށާއި އެގޮތުން އަންނަ އަހަރުގެ ބަޖެޓު އެކުލަވާލުމަށް ހުށައަޅާފައިވަނީވެސް، ބޯހިޔާވަހިކަމުގެ މައްސަލައަށް ހައްލު ގެންނާނެ ބަޖެޓެއްގެ ގޮތުގައިކަން އެމަނިކުފާނު ފާހަގަކުރެއްވިއެވެ.
މީގެއިތުރުން އެމަނިކުފާނު ވިދަޅުވީ މި ސްކީމް ވެގެންދާނީ ދާއިމީކޮށް ކޮންމެ އަހަރަކުވެސް ހުޅުވާލާ ފުރުސަތަކަށްކަށާއި އެކަމަށް ބޭނުންވާ ފައިސާ ކޮންމެ އަހަރެއްގެ ބަޖެޓުގައި ހިމަނުއްވާނެކަމަށެވެ.
ހަމައެއާއެކު އެމަނިކުފާނު ވިދާޅުވީ މި ސަރުކާރުން އަބަދުވެސް އެންމެ ބޮޑު އިސްކަމެއް ދޭނީ ރައްޔިތުނަށް އޮތް އެންމެ ބޮޑެތި މައްސަލަތަކަށް ރިއާރަތްކުރުމަށްކަމަށެވެ. އަދި ސަރުކާރުގެ ފުރަތަމަ ދުވަހުން ފެށިގެންވެސް ބޯހިޔާވަހިކަމަށް މަސައްކަތް ފަށާފައިވާކަމަށާއ މި ސަރުކާރުގެ މެނިފެސްޓޯއާއި އެއްގޮތަށް، 2028 ވަނަ އަހަރު ނިމޭއިރު، ބޯހިޔާވަހިކަމުގެ މަޝްރޫއުއަކުން ފުރުސަތު ނުލިބޭނެ އެއްވެސް ރައްޔިތަކު ނުހުންނާނެކަމުގެ ޔަގީންކަން ރައީސް ޑރ.މުއިއްޒު ވަނީ ދެއްވާފައެވެ.
