އެއް ރިވާޔަތެއްގައިވާ ގޮތުގައި ރަސޫލުﷲ ޞައްލަﷲ ޢަލައިހި ވަސައްލަމް ޙަދީޘްކުރެއްވިއެވެ. ތިމަންކަލޭގެފާނުގެ އަޞްޙާބުންނަށް ބަދުބަސް ނުބުނާށެވެ. އެފަރާތެއްގެ ބާރުފުޅުގެ ދަށުގައި ތިމަންކަލޭގެފާނުގެ ފުރާނަފުޅުވާ ފަރާތް ގަންދެއްވައި ވިދާޅުވަމެވެ. ތިޔައިގެ ތެރެއިން މީހަކު އުޙުދުފަރުބަދައިގެ ބޮޑުމިނުގެ ރަނުން ޞަދަޤާތް ކުރިކަމުގައި ވިޔަސް، (އެއިން ބޭކަލެއްގެ ނުވަތަ ބޭކަނބަލެއްގެ) ޞަދަޤާތުގެ މުއްދެއްގެ މިންވަރާހަމައަށް ނުވަތަ އޭގެ ދެބައިކުޅަ އެއްބައިގެ މިންވަރާ ހަމައަށްވެސް ނުދެވޭނެއެވެ. (اصحابى فوالذى نفسى بيده لوان احدكم انفق مثل احد ذهبا مابلغ مدّ احدهم ولا نصيفه – متفق عليه)
ރަސޫލުﷲ ޞައްލަﷲ ޢަލައިހި ވަސައްލަމްގެ ޞަޙާބީންގެ މިމަތިވެރި ދަރަޖައަކީ ގޮތްނޭނގޭ ގޮތަކަށް ކުއްލިއަކަށް އުފެދުނު މަތިވެރިކަމެއް ނޫނެވެ. އެމަތިވެރިކަމުގެ އެއް ސަބަބަކީ ކީރިތި ޤުރްއާނުގައި ބަޔާންކުރައްވައިފައިވާ ސަބަބެކެވެ. އެއީ “ފަތަޙަ”އިގެ ކުރީން އީމާންވެވަޑައިގަތުމާއި ޤުރްބާންވެވަޑައިގަތުމެވެ. (الحديد 10)
އިސްލާމްދީނުގެ ބާރުގަދަވުމުގެ ކުރީން ނުވަތަ ފަތަޙަ ލިބިވަޑައިގަތުމުގެ ކުރިން ރަސޫލުﷲ ޞައްލަﷲ ޢަލައިހި ވަސައްލަމްގެ ޙައިސިއްޔަތަކީ އާދައިގެ އިންސާނެއްގެ ޙައިސިއްޔަތެވެ. ރަސޫލުކަން ބާވައިލައްވައި، ރަސޫލުކަމުގެ ވާޖިބުގެ ތެރެއިން ކާމިޔަބީތަކެއް ހޯއްދެވުމުގެ ކުރީން އެކަލޭގެފާނަކީ ތާރީޚީ ގޮތުން ފާހަގަ ކުރެވޭފަދަ މަތިވެރި ބޭކަލަކަށް ވެވަޑައެއް ނުގަނެއެވެ. އެފަދަ ދުވަސްވަރެއްގައި އެކަލޭގެފާނުގެ ތެދުވެރިކަމާއި، މަތިވެރިކަން ފާހަގަކޮށް، އެކަލޭގެފާނަށްޓަކައި ފިދާވާން ތައްޔާރުވެވޭނީ މަތިމަތީން ބަލައިލުމަށްފަހު ޖަވާހިރުގެ އަގު ދެނެގަންނަ މީހަކަށެވެ. އެފަދަ ވަގުތެއްގައި އެކަލޭގެފާނުގެ ކޮޅަށް ޖެހި، މުޅި މުޖުތަމަޢުގެ ނުރުހުމާއި، ނަފްރަތާ ކުރިމަތިލާން ކެރޭނީ ވަރަށް ހިތްވަރުގަދަ މީހަކަށެވެ. އެފަދަ ވަގުތެއްގައި ޞަޙާބީން ޤުރްބާންވެވަޑައިގަތީ، ޤުރްބާނީގެ އަގެއް ލިބިވަޑައިގަތީމައެއް ނޫނެވެ.
هود ސޫރަތުގައި ބަޔާންކުރައްވާފައިވާ ނަބީކަމަށް އިންކާރުކުރާ މީހުން ބުނެއެވެ. (މިއީ ނޫޙް ޢަލައިހިއްސަލާމްގެ ޤައުމުގެ މީހުން އެކަލޭގެފާނަށް ދެންނެވި ވާހަކައެވެ.) ތިމަންމެންގެ މައްޗަށް އެއްވެސް މޮޅުކަމެއް ތިޔަބައިމީހުންނަށް ލިބިގެންވާ ކަމަކަށް ތިމަންމެން ނުދެކެމުއެވެ. (ދެން އެކަލޭގެފާނު ވިދާޅުވިއެވެ.) ތިމަންކަލޭގެފާނުގެ ކިބައިގައި ފާޅުވެގެންވާ ތެދުމަގެއް ވަނިކޮށް ތިޔަބައިމީހުންނަށް ނުފެނަނީ ހެއްޔެވެ؟ ކޮންމެ ދައުރަކަށް ނުވަތަ ކޮންމެ ޒަމާނަކަށް ބެލިނަމަވެސް ޙައްޤު ގޮތުގައި ދެމިތިބޭ ދާޢީންގެ މަގަށް އޮންނަ ހުރަހަކީ ކޮބައިކަން މި ވާހަކައިން ވަރަށް ރަނގަޅަށް އެނގެއެވެ. ގިނަ މީހުން ތިބެނީ އެބަޔަކު ޤަބޫލުކުރާ ބޭރުފުށުގެ “ތެދުމަގެ”އްގެ ސަބަބުން ޙައްޤު ގޮތުގައި ދެމިތިބޭ ދާޢީންގެ ކިބައިންވެސް ދުނިޔަވީ މަތިވެރިކަމަކަށް އުއްމީދުކޮށްގެންނެވެ. އެފަދަ މީސްމީހުން ދެކެން ބޭނުންވަނީ ދުނިޔޭގެ ޢިއްޒަތާއި ޖާހް ލިބިފައިވާ މަތިވެރި މީހެކެވެ. އެހެންނަމަވެސް ދާޢީންނަކީ މިފަދަ ބައެއް ނޫނެވެ. ދާޢީންގެ މަސައްކަތް އޮންނަނީ ދަލީލުގެ މައްޗަށެވެ. ރަސޫލުﷲ ޞައްލަﷲ ޢަލައިހި ވަސައްލަމްގެ ޞަޙާބީން އެކަލޭގެފާނަށް ތަބާވެވަޑައިގަތީ، އެކަލޭގެފާނުގެ ތެދުވެރިކަން ސާބިތުކޮށްދެއްވާން ދައްކަވާނޭ ދަލީލިތަކެއް ނޫން އެހްން އެއްވެސް އެއްޗެއް ނެތް ދުވަސްވަރެއްގައެވެ. އެބޭކަލުންނަށް ތާރީޚުން އިމްތިޔަޒީ ޙައިސިއްޔަތެއް ލިބިވަޑައިގެންފައިވަނީ، އެބޭކަލުންގެ މިދެންނެވި އިމްތިޔާޒީ ސިފަފުޅުތަކުގެ ސަބަބުންނެވެ.
