މޯލްޑިވްސް ޕޯޓްސް ލިމިޓެޑުން 25 އޮކްޓޯބަރު އިން 31 އޮކްޓޯބަރާ ދޭތެރޭ ޖުމްލަ 1485 ޓްވެންޓީ-ފޫޓް އެކުއިވަލެންޓް ޔުނިޓްސް (ޓީއީޔޫ) ކްލިއަރކޮށްފައިވާކަމަށް އެކުންފުނިން ރިޕޯޓުކޮށްފިއެވެ.
މީގެ ތެރޭގައި 575 ވިހި ފޫޓުގެ ކޮންޓެއިނަރާއި 455 ސާޅީސް ފޫޓުގެ ކޮންޓެއިނަރު ހިމެނެއެވެ. މިއީ ގިނަ އަދަދެއްގެ މުދާ ހަލުވިކަމާއެކު ބެލެހެއްޓުމުގެ ޤާބިލުކަން ބަނދަރަށް ލިބިފައިވާކަން ދައްކުވައިދޭ ކަމެކެވެ.
މި މުއްދަތުގެ ތެރޭގައި، ބަނދަރުން 9 ކޮންޓެއިނަރު އުޅަނދާއި 4 އާންމު ނުވަތަ ޕެރިޝަބަލް (ކުނިވާ ޒާތުގެ) މުދާ އުފުލާ އުޅަނދު ބަލަހައްޓައި، 21،918 ޕެކޭޖުގެ ޕެރިޝަބަލް ޒާތުގެ ތަކެތި ކްލިއަރކޮށްފައިވާކަމަށް އެމްޕީއެލްއިން ހާމަކުރިއެވެ. މުހިންމު މުދަލުގެ ތެރޭގައި ފިޔާ (12،619 ޕެކޭޖު)، ދޮންކެޔޮ (3،193 ޕެކޭޖު)، އަދި ކަރާ (7،502 ޕެކޭޖު) ހިމެނެއެވެ.
ޓީއީޔޫ ބެލެހެއްޓުމުގެ އިތުރުން، 2،068 ޓީއީޔޫ މުދާ އަރުވައި ބޭލުމުގެ މަސައްކަތުގައި ބަލަހައްޓައި، އަދި 862 ޓީއީޔޫ ކޮންޓެއިނަރު ޝިޕްޓުކުރުމުގެ މަސައްކަތްވެސް ކުރެވިފައިވާކަމަށް އެކުންފުނިން މަޢުލޫމާތުދެއެވެ. މި އަދަދުތަކުން ދައްކުވައިދެނީ ޤައުމުގެ ސަޕްލައި ޗެއިން ދެމެހެއްޓުމާއި ރާއްޖޭގެ އިޤްތިޞާދަށް އެހީތެރިވުމުގައި މޯލްޑިވްސް ޕޯޓްސް ލިމިޓެޑުގެ މުހިންމު ދައުރެވެ.
