"ހަށިހެޔޮ ރާއްޖެ" ޕްރޮގްރާމު ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުޙައްމަދު ލަޠީފް އާއި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު މިއަދު ކުޅުދުއްފުށި ސިޓީގައި އިފްތިތާހްކޮށްދެއްވައިފިއެވެ.
މި ޕްރޮގްރާމް އިފްތިތާހްކޮށްދެއްވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ޢަބްދުﷲ ރާފިޢު ވިދާޅުވީ މިއީ ކުޅިވަރުގެ ހަރަކާތްތައް ދެމެހެއްޓެނިވި ގޮތަކަށް ކުރިއަށްގެންދިޔުމަށް ފެށި މުހިންމު މަސައްކަތެއް ކަމަށާއި، ސިއްޙަތާއި ދުޅަހެޔޮކަމަށް މުހިންމު ފިޔަވަޅުތަކެއް އެޅޭނެ ޕްރޮގްރާމެއް ކަމަށެވެ.
ވަޒީރު ރާފިޢު ވިދާޅުވި ގޮތިގައި، ސަރުކާރުގެ އަމާޒަކީ ކޮންމެ ރަށެއްގައިވެސް ކުރިއަށްގެންދާ ކުޅިވަރުގެ ހަރަކާތްތަކަކީ އެކަމަށް ފަންނީ މީހުންނާއެކު ހިންގޭ ހަރަކާތްތަކެއް ހެދުންމާއި، ކުޅިވަރާއި ކަސްރަތުން ފަންނީ ހުނަރުވެރިކަން ފުޅާކުރުމަށްޓަކައި އެ ދާއިރާއިން ޒުވާނުން ތަމްރީންކޮށް އާމްދަނީ ހޯދޭނެ ގޮތް ތަނަވަސްކޮށްދިނުމެވެ.
ވަޒީރު ރާފިޢު އިތުރަށް ވިދާޅުވީ މި ޕްރޮގްރާމް ހުރިހާ އަތޮޅުތަކަށް ކުރިއަށް ގެންގޮސް، ޑިސެމްބަރު މަހުގެ 26 ގެ ނިޔަލަށް ނިންމާލެވޭނެ ކަމަށް އުއްމީދުކުރައްވާ ކަމަށެވެ.
މި ޕްރޮގްރާމްގެ ދަށުން ރާއްޖޭގެ އަތޮޅުތައް 6 ޒޯނަކަށް ބަހާލައިގެން ލީޑަރުން ތަމްރީންކުރުމުގެ މަސައްކަތް މި މަހު 4 ވަނަ ދުވަހު ވަނީ ފަށާފައިއެވެ. އެގޮތުން ޒޯން 1 ގައި ހިމެނޭ ހއ، ހދ. އަދި ށ. އަތޮޅުގެ ރަށްރަށުގެ ސްޕޯޓްސް ކައުންސިލަރުންނާއި ޔޫތު އެސޯސިއޭޓުން ތަމްރީން ކުރުމަށް ހަމަޖެހިފައިވެއެވެ. މި ތަމްރީން ޕްރޮގްރާމްގެ ތެރެއިން ފިޒިކަލް އެކްޓިވިޓީސްތަކާއި ތިޔަރީ ކްލާސްތައް ހިމެނޭގޮތަށް ލީޑަރޝިޕް ސްކިލްސްއާއި މެނޭޖްމަންޓް ސްކިލްސް އުގަންނައިދިނުމަށް ހަމަޖެހިފައިވެއެވެ.
"ހަށިހެޔޮ ރާއްޖެ" ޕްރޮގްރާމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މީހުން ބިނާކުރުމާއި ތަމްރީނުކުރުމަށް ގެންގުޅުއްވާ ހަރުދަނާ ސިޔާސަތުގެ ދަށުން ކުރިއަށްގެންދާ ޕްރޮގްރާމެކެވެ. މިއީ ސަރުކާރުގެ ހަފުތާ 14ގެ ވަޢުދުތަކުގައި ހިމެނޭ، މޮޅެތި އެތުލީޓުން އުފެއްދުމާބެހޭ ދިގު ރާސްތާގެ ޕްރޮގްރާމް ފަރުމާކުރުމުގެ ސިޔާސަތުގެ ތެރެއިން މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންގެ ފަރާތުން ކުރިއަށް ގެންދަވާ ހަރަކާތެކެވެ.
ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުޙައްމަދު ލަޠީފް މިއަދު ކުޅުދުއްފުއްޓަށް ކުރެއްވި ރަސްމީ ދަތުރުފުޅުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގެންނެވިއެވެ. މި ދަތުރުފުޅުގެ މައިގަނޑު މަޤްޞަދަކީ "ހަށިހެޔޮ ރާއްޖެ" ޕްރޮގްރާމް އިފްތިތާޙުކޮށްދެއްވުމެވެ.
