އަސްދާނު ފާނައަކީ ރާއްޖޭގެ ފަރުފަޅުތަކުގައްޔާއި ހާހަލާއި ތިލަތިލައިގައި ގިނައިން އުޅޭ މަހެކެވެ. މިއީ ދިވެހިން ދުވާލުކުރާ ކެޔޮޅުކަމުގައި ވަރަށް ގިނައިން ބޭނޭ މަހެކެވެ. އަދި މިއީ ފާނައިގެ މަސްވެރިކަމުގައި ގިނައިން ބާނާ، ރާއްޖެއިން ގިނަ ޢަދަދަކަށް ބޭރުކުރެވޭ ފާނައެކެވެ. މިމަސް ގިނައިން ބޭނިފައި ހުންނަނީ އިރުއޮއްސޭ ދަޅަމަތީގައެވެ. މިއީ ދިވެހިން ކެއުމަށް ބޭނުންކުރާ މީރު މަހެކެވެ. މަހުގެ ކަރުތާފަތުގެ ކުރީބައި ހުންނަނީ ކުޑަކޮށް ވަށްކޮށެވެ. އަދި މިބައިގެ ތިރީކައިރިފަށް ހުންނަނީ ކަށިކޮށް ރާޅުކޮށެވެ. މިމަސް އެންމެ ބޮޑުވަނީ 31 ސެންޓިމީޓަރަށެވެ.
މަހުގެ ބުރަކަށިމަތީ ކޮތަރިބައިގައި 11 ހަރުކަށްޓާއެކު 14 އާއި 16 އާ ދެމެދުގެ ޢަދަދަކަށް މަޑުކަށިހުރެއެވެ. ބަނޑުދަށްފަރާތު ކޮތަރިބައިގައި ތިން ހަރުކަށްޓާއެކު އަށް މަޑުކަށިހުރެއެވެ. މަހުގެ ކަންފަތްގަޑުގައި 17 އާއި 19 އާ ދެމެދުގެ ޢަދަދަކަށް މަޑުކަށިހުރެއެވެ. ނިފަތުގެ ކޮޅު ހުންނަނީ ވަށްކޮށެވެ.
މަހުގެ ކުލައަކީ މަޑުމުށިކުލައެވެ. މަހުގައި މުށިކުލައިގެ ލައްތަކެއް ފިތްތަކެއްގެ ސިފައަށް ހުރެއެވެ. މަހުގެ ބޮލުގެ ކުރީކޮޅުގައި ކަޅުކުލައިގެ ތިކިތަކެއް ހުރެއެވެ. މަހުގެ ބުރަކަށިމަތީގައި ކަޅުކުލައިގެ ލައްތަކެއް އަންދާނެއް ހުންނަހެން މަހުގެ ދެފަރާތަށްވާގޮތަށް ހުރެއެވެ. މިމަހަށް "އަސްދާނުފާނަ" ކިޔާފައިވަނީ މަހުގައި މިދެންނެވި ސިފަހުރުމާއެކު މަހަށްކިޔާ އިގިރޭސިނަމާ ގުޅުވައިގެންނެވެ.
މަސްދަރު: ފިޝަސް އޮފް ދަ މޯލްޑިވްސް، މޯލްޑިވްސް މެރިން ރިސާޗް ސެންޓަރ، 2003
