ކުރީގެ މަޝްހޫރު ވިޔަފާރިވެރިޔާ މުހައްމަދު ޔޫސުފް (ކުވާ މޮހޮދޭ) އަވަހާރަވެއްޖެއެވެ.
ކުވާ މޮހެދޭ އަވަހާރަވެފައިވަނީ މިއަދުގެ ވަގުތެއްގައި އައިޖީއެމްއެޗްގެ އައިސީޔޫގައި ފަރުވާދެމުން ދަނިކޮށެވެ.
ކުވާ މޮހޮދޭއަކީ މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީ ކުރުމާއި ބެހޭ ވަޒީރު ޑރ. މަރިޔަމް މާރިޔާ އާއި ކުރީގެ ކޮމިޝަނާ ޖެނެރަލް އޮފް ކަސްޓަމްސް މާނިއު ޔޫސުފް އަދި ކުރީގެ އިމިގްރޭޝަން ކޮންޓްރޯލަރ، ޑރ. އިބްރާހިމް ޝާފިއުގެ ބައްޕާފުޅެވެ.
މީގެއިތުރުން އޭނާއަކީ ކުރީގެ ރައީސް ނާސިރުގެ ދުވަސްވަރު ރާއްޖޭގެ ސިޔާސީ މައިދާނުގައި ފާހަގަކޮށްލެވުނު ވަރުގަދަ ޝަހުސިއްޔަތެކެވެ. އަދި ފުޅާދާއިރާއެއްގައި ޝިފިންގެ ވިޔަފާރި ކުރެއްވުމުގެ އިތުރުން މޮހޮދޭ ވަނީ ރާއްޖޭގައި 1970 ގެ އަހަރުތަކުގައި ރާއްޖޭގައި ކޮލެރާ ފެތުރެމުން ދިޔައިރު އަމިއްލަ ހަރަދުގައި ރާއްޖެއިން ބޭރުން ޑޮކްޓަރުންނާއި ބޭސް ގެނެސްގެން ދިވެހިންނަށް ފަރުވާ ދިނުމުގައި ބޮޑު ހޭދައެއްވެސް ކޮށްފައެވެ.
މުހައްމަދު ޔޫސުފް (ކުވާ މޮހޮދޭ) އަވަހާރަވުމާއި ގުޅިގެން ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ވަނީ މޮހޮދޭ ގެ އާއިލާއަށް ތައުޒީޔާ ވިދާޅުވެފައެވެ. އެމަނިކުފާނު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ހަޔަރ އެޑިޔުކޭޝަން މިނިސްޓަރު، ޑރ. މަރްޔަމް މާރިޔާގެ ލޮބުވެތި ބައްޕާފުޅު މުޙައްމަދު ޔޫސުފް އަވަހާރަވި ހަބަރު އަޑުއެހީ ފުން ހިތާމައާއިއެކުގައިކަމަށެވެ.
އަދި މަރްޙޫމް މުޙައްމަދު ޔޫސުފް (ކުވާ މޮހޮދޭ) އަކީ، ވިޔަފާރީގެ ދާއިރާއިން ބޮޑެތި ހިދުމަތްތަކެއް ގައުމަށް ކޮށްދެއްވާފައިވާ، ދަރުމަވެރި އެތައް އެހީތަކެއް ވަކިވަކި ފަރުދުންނަށާއި ޖަމާޢަތްތަކަށް ފޯރުކޮށްދެއްވާފައިވާ އިހުސާންތެރިއެއް ކަމަށާއި ގިނަ ބަޔަކު ދަންނަ ރަޙްމަތްތެރި ސާދާ މިޒާޖެއްގެ ވެރިއެއްގެ އިތުރުން ހިދުމަތްތެރި ދަރީންތަކެއްގެ ބައްޕައެއް ކަމަށްވެސް ރައީސް ވިދާޅުވިއެވެ.
މޮހޮދޭގެ ކަށުނަމާދު އޮންނާނީ މިރޭ އިޝާނަމާދަށްފަހު އިސްލާމީ މަރުކަޒުގައެވެ.
