މަގު ބޭނުންކުރާ ފަރާތްތައް އެއްގަމު ދަތުރުފަތުރުގެ ގާނޫނާއި ގަވާއިދުތަކަށް އަހުލުވެރިކުރުވުމަށާއި، މަގުމަތީގެ ސަލަމަތާއި ރައްކާތެރިކަން ކަށަވަރުކުރުމަށް ކުރިއަށްގެންދާ “ފަހިރާސްތާ” ޕްރޮގްރާމް ލ. އަތޮޅުގައި ފަށައިގެން ކުރިއަށް ދާ ކަމަށް ފުލުހުން ބުނެފިއެވެ.
ފުލުހުން ބުނީ މިމަހު 3 ވަނަ ދުވަހުން ފެށިގެން 7 ވަނަ ދުވަހުގެ ނިޔަލަށް މާމެންދޫ، ކުނަހަންދޫ އަދި ހިތަދޫގެ އިތުރުން ލ. އަތޮޅުގެ ގުޅިފައިވާ ރަށްރަށުގައި ކުރިއަށްގެންދާ މި ޕްރޮގްރާމަކީ ޓްރެފިކް ޕޮލިސް އެންޑް ރޯޑް ޕޮލިސް މެނޭޖްމަންޓް އާއި ލ. އަތޮޅު ޕޮލިސް ގުޅިގެން ކުރިއަށް ގެންދާ ޕްރޮގްރާމެއް ކަމަށެވެ.
އެގޮތުން މި ރަށްރަށުގައި ވަކިވަކިން ކުރިއަށް ގެންދިޔަ ސެޝަންތަކުގެ ތެރެއިން ސްކޫލު ދަރިވަރުންނަށާއި ބެލެނިވެރިން އަދި މުއައްސަސާތަކުގެ މުވައްޒަފުންނަށް މައުލޫމާތު ހިއްސާކޮށްފައިވެއެވެ. އެގޮތުން، އެއްގަމު ދަތުރުފަތުރުގެ ގާނޫނަށް އަހުލުވެރިކޮށް މަގުމަތީގެ ސަލަމާތާއި ރައްކާތެރިކަމަށް ކުރެވޭނެ ކަންކަމުގެ މައުލޫމާތު ހިއްސާކޮށްފައިވާ ކަމަށާއި އަދި މަގުމަތީގައި ހަރަކާތްތެރިވާއިރު ތިމާ އާއި އަނެކުންގެ ސަލާމަތަށް ވިސްނައިގެން ހަރަކާތްތެރިވުމަށާއި މަގުމަތީގައި ހިނގާ އެކްސިޑެންޓުތައް މަދުކުރުމާ ގުޅޭގޮތުން މައުލޫމާތު ހިއްސާކޮށްފައިވާ ކަމާށްވެސް ފުލުހުން ބުންޏެވެ.
އަދި ފުލުހުން ބުނީ ބައެއް މަގުތަކުގައި އުޅަނދު ދުއްވުމަށް ތާރު އަޅާފައި ވީނަމަވެސް ކަނޑައެޅިފައިވާ ސްޕީޑު ލިމިޓަށް ވުރެ ބާރަށް ނުދުއްވުމަށާއި ތިމާ ފަދައިން އަނެއްމީހާ އަކީ ނުފަރިތަ މީހަކަށް ވެދާނެކަމަށް ވިސްނައިގެން އުޅަނދު ދުއްވުމަށާއި ހައިވޭ ފަދަ ބޮޑެތި މަގުތަކުގައި އުޅަނދު ދުއްވާއިރު ވިސްނަންޖެހޭ ކަންކަމުގެ މައުލޫމާތު ހިއްސާކޮށްފައިވާ ކަމަށެވެ.
ހަމައެއާއެކު މަގުމަތީގެ ސަލާމަތާއި ރައްކާތެރިކަން ދެމެހެއްޓޭނީ އެންމެން ގުޅިގެން މަސައްކަތްކޮށްގެން ކޮންމެ މީހަކު ވެސް އެ މީހެއްގެ ފަރުދީ ޒިންމާ އަދާކޮށްގެން ކަމަށްވާއިރު ތިމާގެ ގާތްމީހުން، ރަހުމަތްތެރިން އަދި ދަރިންނަށް ވެސް މިފަދަ މައުލޫމާތު ހިއްސާކޮށްދިނުމަކީ މުހިންމުކަމެއްގެ ގޮތުގައި ފާހަގަކޮށް، އެކަމުން މުޅި މުޖުތަމައަށް ކުރާނެ ފައިދާތަކާ ގުޅޭގޮތުންވެސް މައުލޫމާތާއި އަދި މަގުމަތީގެ ސަލާމަތަށްޓަކައި ހެދިފައިވާ ގާނޫނުތަކަށް ބޯލަނބައި ކަފިހި ހުރަސްތައް ހެދިފައިވާ ބޭނުންތައް ހިއްސާކޮށްފައިވެއެވެ. އަދި މަގުމަތީގެ ސަލަމަތާއި ރައްކާތެރިކަމަށްޓަކައި ރަށުތެރޭގައި ވީސީޕީ ޖަހައިގެން ފުލުހުން ކުރަމުންގެންދާ މަސައްކަތްތަކުގެ މައުލޫމާތު ހިއްސާކޮށްފައިވާ ކަމަށް ފުލުހުން ބުންޏެވެ.
އަދި މަގުމަތިން މީހުންނާ ބައްދަލުކޮށް މަގުމަތީގެ ސަލަމާތާއި ރައްކާތެރިކަމާ ގުޅޭގޮތުން މައުލޫމާތު ހިއްސާކޮށްފައިވާއިރު މިފަދަ މައުލޫމާތުތައް ހިމެނޭ ލިޔުންތައް ބަހާފައިވެއެވެ.
ސްކޫލު ދަރިވަރުންނަށް މައުލޫމާތުދިނުމަށް ކުރިއަށް ގެންދިޔަ ސެޝަނުގައި ކޮންމެ ކުއްޖަކުވެސް މަގުމަތީގައި އުޅޭއިރު ސަމާލުކަންދޭންޖެހޭ ކަންކަމާއި، އެކުއްޖެއްގެ ސަލާމަތަށް ކުރެވޭނެ ކަންކަމުގެ މައުލޫމާތުގެ އިތުރުން ޓްރެފިކް ނިޝާންތަކުން ދޭހަވަނީ ކޮންކަމެއްކަން ދަރިވަރުންގެ އުމުރާ ގުޅޭގޮތަށް ހިއްސާކޮށްފައިވެއެވެ. އަދި ޓްރެފިކް މޮނީޓަރުން މަގުމަތީގައި ހަރަކާތްތެރިވާއިރު އަންގާ އެންގުންތަކާ އެއްގޮތަށް އަމަލުކުރުމަށް ދަރިވަރުންނަށް ނަސޭހަތްތެރިވެފައިވެއެވެ.
މި ޕްރޮގްރާމުގެ ތެރެއިން ގިނަ އަދަދެއްގެ ރައްޔިތުންނަށާއި މުއައްސަސާތަކުގެ މުވައްޒަފުންގެ އިތުރުން 300 އަށް ވުރެ ގިނަ ދަރިވަރުންނަށް މައުލޫމާތުދީފައިވެއެވެ.
