2025 ވަނަ އަހަރު ބޭއްވުމަށް ހަމަޖެހިފައިވާ ފުޓުބޯޅަ ކްލަބު ވޯލްޑް ކަޕުގެ ފުރަތަމަ މެޗުގެ 3 ނުވަތަ 5 ދުވަސް ކުރިން މުބާރާތް ބާއްވާ ގައުމު ކަމުގައިވާ އެމެރިކާއަށް ހުރިހާ ކުޅުންތެރިން ދަތުރުކުރަން ޖެހޭނެ ކަމަށް ފީފާއިން އިއުލާނުކޮށްފިއެވެ.
15 ޖޫން 2025 ވަނަ އަހަރު ކްލަބު ވޯލްޑް ކަޕު ފަށާއިރު, 6 ޖޫން އިން ފެށިގެން 10 ޖޫންގެ ނިޔަލަށް ވޯލްޑް ކަޕް ކޮލިފައިއާސްގެ ބައެއް މެޗުތައް އޮވެއެވެ. އެހެންކަމުން 10 ޖޫން ވާ ދުވަހު ކޮލިފައިއާސްގެ މެޗު ކުޅޭ ކުޅުންތެރިން އެމެރިކާއަށް ދަތުރުކުރަން ޖެހޭނީ އެއް ވެސް 'ރެސްޓް ޑޭ' އެއް ނުނަގައެވެ.
އޭގެ އިތުރުން ޗެމްޕިއަންސް ލީގުގެ ފައިނަލް އޮންނަނީ 31 މެއިގައި ކަމަށްވާތީ, ބޮޑެތި ޓީމުތަކުގެ ކުޅުންތެރިންނަށް ފީފާގެ ނިންމުމުގެ ސަބަބުން ކުރިމަތިވާ އުނދަގޫ އަދި މާ ބޮޑެވެ.
ކްލަބު ވޯލްޑް ކަޕުގައި ކުޅޭ ޓީމުތަކުގެ ސްކޮޑުގައި މަދުވެގެން 26 ކުޅުންތެރިން ހިމަނަން ޖެހޭތީ, ޓީމުގެ ކުޅުންތެރިޔަކަށް ރެސްޓް ދިނުމުގެ ގޮތުން ސްކޮޑުގައި ނުހިމެނުމުގެ ފުރުސަތު ވެސް ކޯޗުންނަކަށް ނެތެވެ.
ފީފާ, ކްލަބު ވޯލްޑް ކަޕަށް ކަނޑައަޅާފައިވާ ގަވާއިދުތަކުގެ ސަބަބުން ކްލަބުތަކާ ގައުމީ ޓީމުތަކާ މައްސަލަ ޖެހުން ވެސް އެކަށީގެންވެއެވެ. ސަބަބަކީ އިންޓަނޭޝަނަލް މެޗުތައް ނިމޭތާ އެންމެ ފަސް ދުވަސް ފަހުން ކްލަބުގެ މެޗެއް ކުޅެން ޖެހޭތީ, ކުޅުންތެރިޔާ ގައުމީ ޓީމަށް ދޫކުރަން ކްލަބުން ދެކޮޅު ހަދާފާނައެވެ. މިއީ, މިހާރު ވެސް ޖެހިފައިވާ މައްސަލައަކަށް ވާއިރު, ފީފާ ގެ ނިންމުންތަކުން މި ކަންތައް ދާނީ އިތުރަށް ގޯސްވެގެންނެވެ.
ކުޅެން ޖެހޭ މެޗުތައް ގިނަ ކަމުން އެތައް ކުޅުންތެރިންނެއް ޝަކުވާ ކުރަމުން އަންނައިރު, ފީފާއިން އަންނަނީ މި ކަންތަކަށް ހައްލެއް ގެނައުމުގެ ބަދަލުގައި މެޗުތައް އިތުރުކޮށް, ކުޅުންތެރިންގެ ސިއްހަތަކަށް ބަލާލުމެއްނެތި ގަވާއިދުތައް ހަދަމުންނެވެ.
ފީފާގެ އަމަލުތައް ހުންނަ ގޮތުން ކްލަބު ވޯލްޑް ކަޕު ބޭއްވުމުގައި އެ ފެޑެރޭޝަނުގެ ހަމަައެކަނި ބޭނުމަކީ ޖީބަށް ފައިސާ ވެއްދުން ކަމަށް ބުނާ ފަރާތްތަކުގެ ބަސްތައް ދުވަހުން ދުވަހަކަށް އަންނަނީ ތެދުވަމުންނެވެ.
