ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ރާއްޖޭގެ ސެންޓްރަލް ރީޖަންގެ ރަށްރަށުގެ މަގުތައް ޒަމާނީ ފެންވަރަށް ތަރައްގީކޮށް، ރަށުގެ ރައްޔިތުންނަށް ކަނެކްޓިވިޓީ އާއި އިންފްރާސްޓްރަކްޗާ ހަރުދަނާ ކުރުމުގެ މަސައްކަތް މިހާރުވެސް ދަނީ މެދު ނުކެނޑި ކުރަމުންނެވެ.
މިގޮތުން، ނ. ހޮޅުދޫ، ނ. ވެލިދޫގެ އަދި އދ. މާމަގިލީގެ މަގުތައް ތަރައްގީކުރުމުގެ މަޝްރޫޢުތައް ބާރު ސްޕީޑުގައި މިހާރު އެބަ ކުރިއައްދެއެވެ.
ނ. ހޮޅުދޫގައި އާރްޑީސީއިން ދަނީ އަމީރު އަމީން މަގުގައި ސްޓޮރމް ވޯޓަރ ނެޓުވޯރކް އެޅުމުގެ މަސައްކަތާއި އެ މަގު ސްޓޯރމް ވޯޓަރ ހޮޅި އެޅުމުގެ މަސައްކަތް ކުރަމުންނެވެ.
ނ. ވެލިދޫއަށް ބަލާލާއިރު، މިވަގުތު އާރްޑީސީއިން ދަނީ އެރަށު ދޭލިޔާ މަގުގައި ކާރބް ސްޓޯން ޖެހުމުގެ މަސައްކަތާއި އޯޝަން މަގުގައި ކީވޯލްގެ މަސައްކަތް ކުރަމުންނެވެ.
އދ. މާމަގިލީ މަގުތައް ތަރައްޤީކުރުމުގެ ގޮތުން މިވަގުތު އެ ކުންފުނިން ދަނީ އެރަށު އަމީނީމަގުގައި ކާރބް ސްޓޯން ޖެހުމުގެ މަސައްކަތާއި ޖަވާހިރު މަގުގައި ސްޓޯރމް ވޯޓަރ އަދި ބެކް ފިލިންގގެ މަސައްކަތް ކުރަމުންނެވެ.
އާރްޑީސީން އަންނަނީ މާލެގެ އިތުރުން ރާއްޖޭގެ އެކި ރަށްރަށުގައިވެސް އެކި މަސައްކަތްތައްކޮށް މަގުތައް ޒަމާނީ ފެންވަރަށް ތަރައްގީކުރަމުންނެވެ.
