ޕެންޝަން އޮފީހާއި މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއާ ދެމެދު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގެ މައިގަނޑު މަޤްޞަދަކީ ވަޒީފާގެ ފުރުޞަތުތައް އިތުރުކޮށް، ދިވެހި ޒުވާނުންނަށް ބޭނުންވާ ހުނަރުތައް ތަރައްޤީކުރުމަށް ދެ މުއައްސަސާ ގުޅިގެން މަސައްކަތްކުރުމެވެ.
މި އެއްބަސްވުމުގައި ޕެންޝަން އޮފީހުގެ ފަރާތުން ސޮއިކުރެއްވީ އެ އޮފީހުގެ ޗީފް އެގްޒެކެޓިވް އޮފިސަރ، ސުޖާތާ ޙަލީމެވެ. އަދި މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ ޑރ. އަޙްމަދު ޝަފީޢުއެވެ.
މި އެއްބަސްވުމުގެ ދަށުން، މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ހިންގާ ސްކިލްސް ޑިވެލޮޕްމަންޓް ޕްރޮގްރާމުތަކުގެ ތެރެއިން ވަޒީފާގެ ފުރުޞަތުތައް އިތުރުކުރުމަށް ދެފަރާތުން ގުޅިގެން މަސައްކަތްކުރާނެކަމަށް ޕެންޝަން އޮފީހުން މަޢުލޫމާތުދެއެވެ.
މީގެ ތެރޭގައި އެ ވުޒާރާއިން ހިންގާ އަޕްސްކިލިންގ، ރީސްކިލިންގ އަދި ކެރިއަރ ގައިޑެންސް ފަދަ ޕްރޮގްރާމުތަކުގައި ބައިވެރިވާ ފަރާތްތަކަށާއި ނޭޝަނަލް ކެރިއަރސް ސަރވިސް (އެން.ސީ.އެސް) ޕޯޓަލްގައި ރަޖިސްޓްރީކޮށްފައިވާ ފަރާތްތަކަށް ވަޒީފާ ލިބޭ މިންވަރު ވަޒަންކޮށް، އިތުރު ފުރުޞަތުތައް ހޯދައިދިނުމަށް މަސައްކަތްކުރުން ހިމެނޭކަމަށްވެސް ޕެންޝަން އޮފީހުން ފާހަގަކުރެއްވިއެވެ.
