އެމެރިކާގެ އަލަށް އިންތިޚާބުވި ރައީސް ޑޮނަލްޑް ޓްރަމްޕަށް ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މަރުހަބާ ވިދާޅުވެއްޖެއެވެ.
ރައީސް މުޢިއްޒު މަރުހަބާ ވިދާޅުވެފައިވަނީ މިއަދު އެކްސްއިން ކުރެއްވި ޕޯސްޓަކުންނެވެ.
ރައީސް މުޢިއްޒުގެ ޕޯސްޓްގައި ވިދާޅުވެފައިވަނީ ދިވެހިރާއްޖެއާއި އެމެރިކާއާ ދެމެދު އޮތީ އެއްގައުމުން އަނެއް ގައުމަށް ކުރާ އިޙްތިރާމާ، ހެޔޮ އެދުމާއި، އަމިއްލަ ވިސްނުމެއްގެ މައްޗަށް ބިނާވެފައިވާ ވަރުގަދަ ގުޅުމެއްކަމަށެވެ.
ރައީސް މުޢިއްޒު އިތުރަށް ވިދާޅުވީ، ދެ ގައުމު ދެމެދު އޮންނަ އެއްބާރުލުން އިތުރަށް ވަރުގަދަކޮށް، އެކުގައި ކުރިމަތިވާ ގޮންޖެހުންތަކަށް ޙައްލު ހޯދައި، ދުނިޔޭގެ ސުލްޙައާއި ކުރިއެރުން އިތުރުކުރުމަށް މަސައްކަތްކުރުމަށް އުންމީދުކުރާކަމަށެވެ.
ޓްރަމްޕަކީ މީގެ ކުރިން އެމެރިކާގެ ރައީސްކަން ކުރައްވާފައިވާ ބޭފުޅެކެވެ. ޓްރަމްޕް ވަނީ 2017 އިން 2021 އަށް އެމެރިކާގެ 45 ވަނަ ރައީސްގެ ގޮތުގައި ޚިދުމަތް ކުރައްވާފައެވެ. މިފަހަރު އޭނާ ވަނީ އެމެރިކާގެ 47 ވަނަ ރައީސްގެ ގޮތުގައި އިންތިޚާބުވެފައެވެ.
ޓްރަމްޕްގެ މި ކާމިޔާބީއާ ގުޅިގެން ދުނިޔޭގެ އެކި ގައުމުތަކުގެ ވެރިން މިހާރު ގެންދަނީ އޭނާއަށް މަރުހަބާ ދަންނަވަމުންނެވެ. ރާއްޖޭގެ ރައީސް މުއިއްޒުގެ މަރުހަބާ ވެސް މި ގޮތުން ފާހަގަކޮށްލެވެއެވެ.
