ހއ. އަތޮޅު ކައުންސިލުން އިންތިޒާމުކޮށްގެން، ހއ. ކެލާގައި މިހާރު ކުރިއަށްދާ 3 ވަނަ ތިލައުތުރު ފުޓްސަލް މުބާރާތުގައި ވާދަކުރާ އިހަވަންދޫ ޓީމުގެ އަމާޒަކީ ސީދާ ތަށި ކަމަށް އިހަވަންދޫ ޓީމުގެ ކެޕްޓަން މުޙައްމަދު މަދީޙް ބުނެފިއެވެ.
ކުޅުނު ދެ މެޗުން މޮޅުވެ ގްރޫޕު 2 ގެ އެއްވަނައިގައި މިވަގަތު އޮތް އިހަވަންދޫ ޓީމު މިފަހަރުގެ މުބާރާތައް ނުކުތީ މަސް ދުވަހުގެ ޕްރެކްޓިސްއާއިއެކު، މުބާރާތައް ވަރަށް ބޮޑަށް ތައްޔާރުވެގެންނެވެ.
ފުރަތަމަ މެޗުގެ މޮޅު ކުޅުންތެރިޔާގެ މަގާމު ހޯދި މަދީޙް ބުނީ، މި އަހަރުގެ ފުރަތަމަ މެޗު ކާމިޔާބުވުމަކީ މުބާރާތުގައި ކުރިއަށް ދިޔުމަށް ލިބުނު ވަރަށް ބޮޑު ހިތްހަމަޖެހުމެއް ކަމަށެވެ. "މި ގްރޫޕްގައި މި ތިބީ ވަރަށް ވަރުގަދަ ޓީމުތައް، ކޯޗުންނާއި، މެނޭޖްމަންޓް އަދި ކުޅުންތެރިން މި ތިބީ މުބާރާތައް ވަރަށް ބޮޑަށް ތައްޔާރުވެގެން. މެޗަކަށްފަހު މެޗެއް" ކުރިއަށް އޮތް މެޗުގެ ކުރިން މަދީޙް ބުންޏެވެ. "ވޭތުވެދިޔަ ދެ އަހަރުވެސް އަހަރުމެން ދިޔައީ ގްރޫޕް ސްޓޭޖުން ކަޓައިގެން. އެހެންވެ، މި އަހަރު މި ނުކުންނަނީ ވަރަށް ވަރުގަދަ ސްކޮޑަކާއެކު. އަންޑަރ-19 ގެ މޮޅެތި ކުޅުންތެރިންވެސް ޓީމުގައި ތިބޭނެ. އިތުބާރު އެބައޮތް" މަދީޙް ފާހަގަ ކުރިއެވެ. "ސަޕޯޓަރުންގެ ފަރާތުން ވަރަށް ބޮޑު އެއްބާރުލުމެއް އެބަ ލިބޭ. މި ތަނަށް އައިސް ސަޕޯޓް ކުރުމަކީ އުނދަގޫ ކަމެއް. އެހެން ނަމަވެސް، ލައިވް ބަލައި އެ ދެއްވަމުން ގެންދަވާ ސަޕޯޓަކީ ވަރަށް ބޮޑު ހިތްހަމަޖެހުމެއް" ސަޕޯޓަރުންނަށް ޝުކުރު އަދާކުރަމުން މަދީޙް ބުންޏެވެ. މަދީޙް އިތުރަށް ބުނީ ޓީމުގެ ހުރިހާ އިންތިޒާމްތަކެއްވެސް ކުރިއަށް ދަނީ ވަރަށް ރަނގަޅަށް ކަމަށާއި، އެކަމަށްޓަކައި އިހަވަންދޫ ކައުންސިލަށް ވަރަށް ބޮޑަށް ޝުކުރު އަދާކުރާ ކަމަށެވެ.
އިހަވަންދޫ ޓީމުގެ ކޯޗު ނޫޝާންގެ އުއްމީދު ޓީމާއި ދޭތެރޭ ވަރަށް ބޮޑެވެ. ކުޅުންތެރިއެއްގެ ހައިސިއްޔަތުން މިދިޔަ ދެ އަހަރު ޓީމުގައި ހިމެނުނު ނޫޝާން މި އަހަރުގެ މުބާރާތުގައި އިންޖަރީގެ ސަބަބުން ނުކުޅެއެވެ. މިއީ ނޫޝާން ކޯޗެއްގެ ގޮތުގައި ފެނިގެންދާ ފުރަތަމަ މުބާރާތެވެ. މިވަރުގެ ބޮޑު މުބާރާތަކަށް މުޅިން އަލަށް ކޯޗެއްގެ ގޮތުގައި ހަރަކާތްތެރިވާއިރު އޮތް އެންމެ ބޮޑު ޔަގީންކަމަކީ ޓީމުގައި ތިބި ކުޅުންތެރިންނަކީ އެކީ އުޅެމުންދާ، އެއްކޮށް ކުޅުނު، ގޮތް އެނގޭ ކުޅުންތެރިންތަކަކަށްވުންކަން ނޫޝާން ފާހަގަކުރިއެވެ. "މުބާރާތުގައި ވާދަކުރާ ޓީމުތައް އަސްލު ޗެލެންޖަކީ. މިދިޔަ ދެ އަހަރު ކަޓައިގެންދިޔަ ނަމަވެސް މި އަހަރުގެ މުބާރާތައް މި ނުކުތީ ވަރަށް ގިނަ ޕްރެކްޓިސްތަކަކާއިއެކު. މުޅި ޓީމު މި ތިބީ ކެލާގައި ސްޓޭ ކޮށްގެން. ހުރިހާކަމެއްވެސް ކޮށްދެނީ ކައުންސިލުން. ހުރިހާ އިންތިޒާމެއްވެސް ވަރަށް ފުރިހަމަ" ނޫޝާން ބުންޏެވެ. "މެޗަކަށްފަހު މެޗެއް ޓާގެޓަކީ. އެންމެ ބޮޑު ހިތްވަރަކީ ސޯޝަލް މީޑިއާގައި ސަޕޯޓަރުން ދެއްވަމުން ގެންދަވާ ތަރުހީބު. ކާމިޔާބު ވާނެ އިންޝާ ﷲ" ނޫޝާން އިތުރަށް ފާހަގަކުރިއެވެ.
އިހަވަންދޫ ޓީމުގެ 3 ވަނަ މެޗުގައި މިރޭ އެ ޓީމު ބައްދަލުކުރާނީ ތުރާކުނާއެވެ. މި މެޗު ފެށުމަށް ހަމަޖެހިފައިވަނީ 20:00 ގައެވެ. މުބާރާތުގެ ހުރިހާ މެޗެއްވެސް ޔެސް ޓީވީ އިން ލައިވް ކުރާނެއެވެ. މި މެޗުން މޮޅުވެއްޖެ ނަމަ އިހަވަންދޫއަށް ސެމީ ފައިނަލްގެ ޖާގައެއް ކަށަވަރުވާނެއެވެ. އިހަވަންދޫ އަކީ ގޯލްޑަން ފުޓްސަލް ޗެލެންޖް 2022 ގެ ހއ. އަތޮޅު އަދި ޒޯން 1 ގެ ޗެމްޕިއަން ޓީމުކަންވެސް ފާހަގަ ކޮށްލެވެ.
ތިލައުތުރު ފުޓްސަލް މުބާރާތުގައި މިފަހަރު 10 ރަށަކުން ވާދަކުރެއެވެ. އެއީ، އިހަވަންދޫ، ތުރާކުނު، އުލިގަން، އުތީމު، ދިއްދޫ، ބާރަށް، ވަށަފަރު، މުރައިދޫ، ފިއްލަދޫ އަދި މުބާރާތް ކުރިއަށްދާ ރަށް ހއ. ކެލާއެވެ. މ މުބާރާތް ކުރިއަށް ދަނީ ދެ ގްރޫޕްކަށް ބަހާލައިގެންނެވެ. މި މުބާރާތުގެ މިދިޔަ އަހަރުގެ ޗެމްޕިއަނުންނަކީ ހއ. ވަށަފަރެވެ.
