ޑިމޮކްރެޓިކް ވެށީގެ މިނިވަންކަން ދަމަހައްޓައި، މީޑިއާއަށް އަހުލުވެރި މުޖުތަމައެއް ބިނާކުރުމަށް، މީޑިއާއަކީ ސްކޫލުގައި ކިޔަވައިދޭ މާއްދާއެއްގެ ގޮތުގައި ހަމަޖެއްސުމަށް ރައްޔިތުންގެ މަޖިލީހުގެ ނާއިބް ރައީސް އަޙުމަދު ނާޡިމް ގޮވާލައްވައިފިއެވެ. ކޮމަންވެލްތު ޕާލަމެންޓަރީ އެސޯސިއޭޝަންގެ ކޮންފަރެންސްގައި ތަޤްރީރުކުރައްވަމުން، ނާޘިމް ވަނީ މީޑިއާއަށް އަހުލުވެރި މުޖުތަމަޢެއް ބިނާ ކުރުމުގެ މުހިންމު ކަމާ ބެހޭ ގޮތުން ވާހަކަފުޅު ދައްކަވާފައެވެ.
"މިޒަމާނުގައި މިޑިއާއަށް މުޖުތަމަޢު އަހުލުވެރި ކުރުމަކީ އިޚުތިޔާރީ ހުނަރެއް ނޫން. އެއީ ޑިމޮކްރެޓިކް ވެށްޓެއްގައި ފަރުދުންނާއި ޖަމާޢަތް ބައިވެރިވެ ބިނާކުރަނިވި މަސައްކަތެއް ކުރުމަށްޓަކައި ހޭލުންތެރި ރައްޔިތެއް ބިނާ ކުރުމަށް ކޮންމެހެން ބޭނުންވާ އަސާސީ ހުނަރެއް" ނާޡިމް ވިދާޅުވިއެވެ.
އޮސްޓްރޭލިއާގެ ސިޑްނީގައި ބާއްވާފައިވާ، ކޮމަންވެލްތު ޕާލަމެންޓްރީ ކޮންފަރެންސްގައި މިއަހަރު، ބަހުސްކޮށްފައިވާ މައުޟޫޢަކީ، "ފޭކް މިޑިއާއާއި މަސްނޫޢީ މީޑިއާގެ އުފެއްދުމުގެ ޒަމާނުގައި، މީސްމީޑިއާގެ ޕޯސްޓްތަކަށް ލައިކު ޖެހުމާއި، ވޯޓު ދޭއިރު، ޑިމޮކްރެސީގެ މިނިވަން ވެށި ޙިމާޔަތްކޮށް ހަރުދަނާ ކުރުމުގައި ކޮމަންވެލްތުގެ ޕާލަމެންޓުތަކަށް އަދާކުރެވިދާނެ ދައުރާ" ބެހޭ ގޮތުންނެވެ.
މިމައުޞޫއުގައި ތަޤްރީރު ކުރައްވަމުން، ރައްޔިތުންގެ މަޖިލީހުގެ ނައިބު ރައީސް އަޙުމަދު ނާޡިމް ވަނީ، ފޭކް ނިއުސްއާއި ސިންތެޓިކް މީޑިއާގެ ސަބަބުން، ޚިޔާލު ފާޅުކުރުމުގެ މިނިވަންކަމަށާއި ޑިމޮކްރަސީއަށް ކުރިމަތިވާ ނުރައްކާތަކަށް އަލިއަޅުއްވާލައްވާފައެވެ.
ނާޘިމް ވިދާޅުވީ، މީޑިއާގެ މިނިވަންކަން ދެމެހެއްޓޭނީ، މިއަދުގެ ސުމޭކް ވެށީގައި ކުރިމަތިވަމުންދާ، ފޭކް ނިއުސްއާއި މަޞްނޫޢީ މީޑިއާއަށް މުޖުތަމައު އަހުލުވެރިކޮށް، ކޮމަންވެލްތުގެ ޤައުމުތަކުން ޢާންމުންގެ ހޭލުންތެރިކަމަށް މަސައްކަތް ކުރުމުންނެވެ.
ޤައުމީ މުހިންމު މައްސަލަތަކަށް ސްކޫލު ނިޒާމުގެ ތެރެއިން، ދަރިވަރުން މެދުވެރިކޮށް ބެލެނިވެރިންނާއި ޖަމާޢަތް ހޭލުންތެރިކުރުމުގައި ކާމިޔާބު މަސައްކަތެއް ކުރެވިދާނެ ކަމަށް ވިދާޅުވެ، ރާއްޖެއިން ހިންގާފައިވާ ސްކޫލު ހެލްތުގެ ކާމިޔާބު ޕްރޮގްރާމަށް ނާޘިމް އަލިއަޅުއްވާލެއްވިއެވެ. އެރޮނގުން ރާއްޖޭން ގައިންގަޔަށް އަރާބަލިތައް ކޮންޓްރޯލުކޮށް ޕަބްލިކް ހެލްތުގެ ދާއިރާއިން ހޯދި ކާމިޔާބީއަކީ ސްކޫލު ހެލްތުގެ މަޢުލޫމާތު ދަރިވަރުން މެދުވެރިކޮށް ބެލެނިވެރިންނާއި ގޭބިސީތަކަށް ފޯރައި ޖަމާޢަތުގެ ފެންވަރުގައި އެމަޢުލޫމާތު ފެތުރުމުން ލިބުނު ކާމިޔާބީއެއްކަމަށް ނާޡިމު ވިދާޅުވެދެއްވިއެވެ.
ނާޘިމް ވިދާޅުވީ މީޑިއާއަށް މުޖުތަމަޢު ހޭލުންތެރި ކުރުމުގައި ރާއްޖޭގެ މިކާމިޔާބީ ނަމޫނާއަކަށް ބެލެވިދާނެ ކަމަށެވެ. އެގޮތުން އެމަނިކުފާނު ހުށަހެޅުއްވީ، "ކޮންމެ ގޭބިސީއެއްގައި މަޢުލޫތަށް ފާރަވެރިއެއް" ބެހެއްޓުމަށެވެ. އެމަނިކުފާނު ހުށަހެޅުއްވި "ހައުސްހޯލްޑް އިންފޮމޭޝަން ގަރޑިއަން" މޮޑެލްއަކީ މީޑިއާއަށް ހޭލުންތެރިވެފައިވާ ދަރިވަރުން، އެ ދަރިވަރުންގެ މީޑިއާ ލިޓެރެސީގެ ހުނަރުތައް ބެލެނިވެރިންނާއި ޖަމާޢަތާއެކު ޙިއްޞާކުރުމުން ޖަމާޢަތުގެ ފެންވަރުގައި މީޑިއާއަށް ހޭލުންތެރި މުޖުތަޢެއް ބިނާކުރުމަށް ހުށަހެޅުއްވި މޮޑެލްއެކެވެ.
އެމަނިކުފާނުގެ ވާހަކަފުޅު ކުރިއަށް ގެންދަވަމުން، ކޮމަންވެލްތުގެ ޤައުމުތަކުން، ތަޢުލީމީ ނިޒާމުގައި ބޭނުންކުރުމަށް މީޑިއާ ލިޓެރެސީ ކަރިކިއުލަމެއް އެކުލަވާލުމަށް ގޮވައިލެއްވިއެވެ. އަދި އެކަރިކިއުލަމަކީ، ޕްރައިމަރީ ސްކޫލުން ފެށިގެން މަތީ ސާނަވީ ތަޢުލީމާ ހަމައަށް ހުރިހައި ޢުމުރުފުރައަކާ ގުޅޭ މަންހަޖެއްކަމުގައި ހަދައި، އެމަސައްކަތް ތަޖުރިބާކާރުންނާއެކު ވިލަރެސްކުރުމަށް، ކޮމަންވެލްތު ޕާލަމެންޓަރީ އެސޯސިއޭޝަނުން ވޯކިން ގްރޫޕެއް އެކުލަވާލުމަށް އެދިވަޑައިގަތެވެ. އަދި އެފަދަ ވޯކިން ގްރޫޕެއްގައި ރާއްޖެ ތަޖުރިބާކާރިން ފުރިހަމައަށް ބައިވެރިވާނެ ކަމުގެ ޔަޤީންކަންވެސް ނާޡިމް ދެއްވިއެވެ.
"ފޭކް ނިއުސްއާއި މަޞްނޫޢީ މީޑިއާއިން އަޅުގަނޑުމެންގެ ޑިމޮކްރެޓިކް މުއައްސަސާތައް ޙިމާޔަތްކުރެވޭނީ ޖަމާޢަތުގެ ދިފާއުގެ ފުރަތަމަ އައްޑަނަ ކަމަށްވާ، އަޅުގަނޑުމެންގެ ތަޢުލީމީ ނިޒާމު ހަރުދަނާކޮށްގެން،" އޮނަރަބަލް ނާޡިމް ވިދާޅުވިއެވެ.
އޭގެ އިތުރުން، އެމަނިކުފާނު ހުށަހެޅުއްވީ، ކޮމަންވެލްތުގެ ޤައުމުތަކުގެ ސްކޫލްތަކުގައި މީޑިއާ ލިޓެރެސީގެ މާއްދާ ކިޔަވައި ދިނުމަށް ބޭނުންވާ ޓީޗަރުން ތަމްރީނުކޮށް ވަސީލަތްތައް ކަނޑައެޅުމުގައި ޤައުމުތަކުގެ ޕާލަމެންޓުން އެހީތެރިވެ ދިނުމަށެވެ.
"ޤާނޫނު ހަދާ މަޖިލީހުގެ މެންބަރުންގެ ގޮތުގައި ތިބެ، އަޅުގަނޑުމެނަށް އަތް އުރާލައިގެން ތިބެވޭކަށެއް ނެތް. މީޑިއާގެ މިނިވަންކަމާއި ޑިމޮކްރެޓިކް ވެށީގެ މިނިވަންކަމާއި ނަޒާހަތްތެރިކަން ދަމަހައްޓައި، ހިމާޔަތްކޮށް، ކޮންމެ ރައްޔިތަކަށް ވެސް ހަޤީޤަތާއި ޚިޔާލީ ވާހަކަތައް ވަކިކުރެވޭނެ ގޮތް ހަދައިދީ، އެކަން ކަށަވަރުކުރުމަކީ އަޅުގަނޑުމެންގެ ކޮނޑުގައި އެޅިފައިވާ މަސްއޫލިއްޔަތެއް! ވާޖިބެއް!" އޮނަރަބަލް ނާޡިމް ވިދާޅުވިއެވެ.
ސިޑްނީގެ އިންޓަނޭޝަނަލް ކޮންވެންޝަން ސެންޓަރުގައި ބާއްވާފައިވާ 67 ވަނަ ކޮމަންވެލްތު ޕާލަމެންޓްރީ ކޮންފަރެންސްގައި 56 ގައުމެއްގެ މަންދޫބުންވަނީ، ފުޅާވަމުންދާ ޑިޖިޓަލް ލޭންޑްސްކޭޕްގައި ޑިމޮކްރެސީ ރައްކާތެރިކުރުމުގެ ސްޓްރެޓެޖީތަކާ ބެހޭ ގޮތުން ފުޅާ ދާއިރާއެއްގައި މަޝްވަރާކުރައްވާފައެވެ.
