ހަލި ސުފުރާގައި މިއަދު ކިޔުންތެރިންނާ ހަަމއަށް މި ގެނެސްދެނީ "ޕީނަޓް ބަޓަރ ޗިކަން" ތައްޔާރު ކޮށްލާނެ ގޮތެވެ.
ޕީނަޓް ބަޓަރ ޗިކަންއަކީ އޭޝިއާގެ މީހުން އާންމުކޮށް ބޭނުންކުރާ ސޯޔާ ސޯސް، ވިނެގަރ، އަދި ޗިލީ ޕޭސްޓް ބޭނުންކޮށްގެން ތައްޔާރުކުރާ އެއްޗެކެވެ. މިއީ ބަތް، ރޮށި އަދި ފަރާޓާއާ އެކީ ކާލަން ވަރަށް މީރު އެއްޗެކެވެ.
މި ރެސިޕީއިން ތައްޔާރު ކުރެވޭނީ: 2 ނުވަތަ 3 މީހުންނަށް ކެވޭވަރަށެވެ.
ބޭނުންވާ ތަކެތި:
ސޯސް ތައްޔާރުކުރުމަށް
¼ ޖޯޑު ނަޓް ބެރީ ޕީނަޓް ބަޓަރ ކްރަންޗީ
1 މޭޒުމަތީ ސަމުސާ ލައިޓް ސޯޔާ ސޯސް
½ މޭޒުމަތީ ސަމުސާ މާމުއި
2 ސައިސަމުސާ ޗިލީ ޕޭސްޓް
1 ސައިސަމުސާ ވިނެގަރ
ކުކުޅު ހެދުމަށް:
300 ގްރާމް ބޯންލެސް ކުކުޅު
1.5 މޭޒުމަތީ ސަމުސާ ތެޔޮ
3/1 ސައިސަމުސާ ލޮނު
½ ސައިސަމުސާ މުގުރި އަސޭމިރުސް
½ ސައިސަމުސާ މުގުރި ދިރި
3 އިންޗީގެ ލީކްސް
½ މެދު މިނުގެ ފިޔާ
½ މޭޒިމަތީ ސަމުސާ ޖިންޖަރ ގާލިކް ޕޭސްޓް
½ ޖޯޑު ކާށި ކިރު
ކުކުޅުގެ މައްޗަށް އެޅުމަށް:
½ ސައިސަމުސާ ސެސަމީ ސީޑް
1 މޭޒުމަތީ ސަމުސާ ކުދިކޮށް ކޮށާފައި ހުރި ކޮތަނބިރި ފަތް
ހަދާނެ ގޮތް:
1. ޕީނަޓް ބަޓަރ ސޯސް ތައްޔާރުކުރުމަށްޓަކައި އެންމެ ފުރަތަމަ ¼ ޖޯޑު ނަޓްބެރީ ޕީނަޓް ބަޓަރ ކްރަންޗީ، 1 މޭޒުމަތީ ސަމުސާ ލައިޓް ސޯޔާ ސޯސް، ½ މޭޒުމަތީ ސަމުސާ މާމުއި، 2 ސައިސަމުސާ ޗިލީ ޕޭސްޓް، އަދި 1 ސައިސަމުސާ ވިނެގަރ ކުޑަ ބޯތަށްޓަކަށް އަޅާލާށެވެ.
2. ދެން ސަމުސަލެއް ބޭނުންކޮށްގެން ތަންކޮޅެއް އޮލަ ޕޭސްޓެއް ހެދެންދެން ހުރިހާ އެއްޗެއް ރަނގަޅަށް އެއްކޮށްލާށެވެ.
3. އެއަށްފަހު 300 ގްރާމް ބޯންލެސް ކުކުޅު ގަނޑުފިލުވާލުމަށް ފަހު، ގާތްގަނޑަކަށް ½ 1 އިންޗި ހުންނަ ވަރަށް ކުދިކޮށް ކޮށާލާށެވެ.
4. ދެން މެދު މިނުގެ ފިޔަލެއްގެ އެއްބަޔާއި 3 އިންޗީގެ ލީކްސް ތުނިކޮށް ކޮށާލާފައި ބަހައްޓާށެވެ.
5. ތަވަޔަކަށް 1.5 މޭޒުމަތީ ސަމުސާ ތެޔޮ އަޅާލުމަށް ފަހު މެދުގިނީގައި ހޫނުކޮށްލާށެވެ.
6. ދެން ކޮށާލި ކުކުޅުކޮޅާއި، 3/1 ސައިސަމުސާ ލޮނު، ½ ސައިސަމުސާ މުގުރި އަސޭމިރުސް، އަދި ½ ސައިސަމުސާ މުގުރި ދިރި ތެޔޮގަނޑު ތެރެއަށް އަޅާލާށެވެ. އަދި ހުރިހާ އެއްޗެއް އެއްކޮށްލުމަށް ހަލާލާށެވެ.
7. ކުކުޅުކޮޅު ހަލަމުން 10-8 މިނެޓް ވަންދެން ނުވަތަ އެއަށް މަޑު ރަން މުށި ކުލައެއް އަރަންދެން ކައްކާލާށެވެ. އެއަށްފަހު ވަކިން ތަށްޓަކަށް ނަގާލާށެވެ.
8. ދެން ހަމަ އެތަވަޔަށް ކުރިން ކޮށާލި ފިޔާ އަދި ލީކްސް އަޅާލުމަށް ފަހު މަޑުގިނީގައި 2 މިނެޓް ވަންދެން ނުވަތަ ފިޔާކޮޅު މަޑު ވަންދެން ހަލާލާށެވެ.
9. އެއަށްފަހު ½ ސައިސަމުސާ ޖިންޖަރ ގާލިކް ޕޭސްޓް އަޅާލުމަށް ފަހު ފިޔާކޮޅު ރަތްވަންދެން އިތުރު 1.5 މިނެޓް ނުވަތަ 2 މިނެޓް ވަންދެން ހަލާލާށެވެ.
10. ދެން ކުރިން ރޯފިލުވާލި ކުކުޅުކޮޅު ތަވަޔަށް އަޅާލުމަށް ފަހު ރަނގަޅަށް އެއްކޮށްލަމުން އިތުރު 1 މިނެޓަށް ކައްކާލާށެވެ.
11. އެއަށްފަހު ކުރިން ތައްޔާރުކޮށްލި ޕީނަޓް ބަޓަރ ސޯސް އާއި ½ ޖޯޑު ކާށި ކިރު މީގެ ތެރެއަށް އަޅާލާށެވެ.
12. ދެން ކާށި ކިރު ރަނގަޅަށް ޕީނަޓް ބަޓަރ ސޯސްއާއި އެއްވެ، އޮލަވަންދެން ދެތިން މިނެޓަށް ހަލަމުން ކައްކާށެވެ. މާގިނައިރު ވަންދެން ކައްކައިފިނަމަ ޕީނަޓް ބަޓަރގައި އެކުލެވޭ ތެޔޮ ވަކިވެ، ސޯސްގަނޑުގައި ތެޔޮ ފަށަލައެއް ހެދިދާނެއެވެ.
13. އުނދުން ނިވާލުމުގެ ކުރިން ½ ސައިސަމުސާ ސެސަމީ ސީޑް އާއި 1 މޭޒުމަތީ ސަމުސާ ކުދިކޮށް ކޮށާފައި ހުރި ކޮތަނބިރި ފަތް ކުކުޅުގެ މައްޗަށް އަޅާލާށެވެ. ޕީނަޓް ބަޓަރ ޗިކަން މިހާރު މިހިރީ ބަތް ނުވަތަ ރޮއްޓާ އެކީ ކާލުމަށް ތައްޔާރުވެފައެވެ.
މައުލޫމާތު: ލޮނުމެދު.ކޮމް ، ދިވެހި ރެސިޕީ، ދި ބިގްމޭންސް ވަރލްޑް.ކޮމް
