ވާދަވެރި ބާސެލޯނާ އާއި އޭސީ މިލާން އަތުން ތަފާތު ބޮޑުކޮށް އަމިއްލަ ދަނޑުގައި ބަލިވި ރެއާލް މެޑްރިޑުން ކުރިއަށް އޮތް ޖެނުއަރީ ޓްރާންސްފާގައި ޑިފެންޑަރުން ގަންނަން ނިންމައިފިއެވެ.
ރެއާލް މެޑްރިޑުން ޑިފެންޑަރުން ގަންނަން މަސައްކަތް ކުރާނެކަން ހާމަކުރީ މަޝްހޫރު ކުޅިވަރު ނޫސްވެރިޔާ ފެބްރީޒިއޯ ރޮމާނޯއެވެ. ރެއާލްގެ ރައީސް ފްލޮރެންޓީނޯ ޕެރޭޒް ބޭނުން ވަނީ ސެންޓްރަލް ޑިފެންޑަރަކާއި ކަނާތު ބެކެއް ގަންނަން ކަމަށްވެއެވެ.
މީގެ ތިން ހަފްތާއެއްހައި ދުވަސް ކުރިން ރެއާލްގެ ސެންތިއާގޯ ބެރްނަބާއޫ ސްޓޭޑިއަމްގައި އަމިއްލަ ސަޕޯޓަރުން ކުރިމަތީ ބާސެލޯނާ އަތުން ރެއާލް ބަލިވީ 4-0 އިންނެވެ. އަދި މިދިޔަ ހަފްތާގައި އަމިއްލަ ސަޕޯޓަރުން ކުރިމަތީ މިލާން އަތުން ރެއާލް ބަލިވީ 3-1 އިންނެވެ.
ސީޒަން ފެށުމުގެ ކުރިން، ކިލިއަން އެމްބައްޕޭ އާއި ވިނީޝިއަސް، އެންޑްރިކް، ރޮޑްރީގޯ އަދި ބެލިންގހަމްގެ ނުރައްކަލުން އެހެން ޓީމުތައް ރެއާލް ކައިރިން ސަލާމަތް ނުވާނެކަމަށް އެކްލަބުގެ ސަޕޯޓަރުންނާއި ބައެއް ތަޖުރިބާކާރުން ދިޔައީ ބުނަމުންނެވެ. އެކަމަކު ބާސެލޯނާ އާއި މިލާން އަތުންވީ ބައްޔާއެކު މިހުރިހާ ކަމެއް ވަނީ ބަދަލުވެފައެވެ.
