ބ. އޭދަފުށީ ބަނދަރު ތަރައްޤީކުރުމުގެ މަޝްރޫޢުގެ މަސައްކަތް ވަރަށް ބާރު ސްޕީޑެއްގައި ކުރިއަށްދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.
މިގޮތުން، ވޭތުވެދިޔަ އަހަރުގެ ތެރޭގައި މިހާރު ހުރި ބަނދަރު ފުންކުރުމުގެ މަސައްކަތުގެ 94 އިންސައްތަ ނިމިފައިވާއިރު، ބަނދަރުގެ ޗެނަލް ފުންކުރުމުގެ މަސައްކަތުގެ 92 އިންސައްތަ ވަނީ ނިމިފައިވާކަމަށް އެމްޓީސީއިން ހާމަކުރިއެވެ. އަދި ކީވޯލް ބްލޮކްތައް އެޅުމުގެ މަސައްކަތްވެސް ކުރިއަށްދާކަމަށް އެކުންފުނިން ބުނެފައިވެއެވެ.
މި މަޝްރޫޢުގެ ދަށުން ކުރެވޭ މަސައްކަތްތަކުގެ ތެރޭގައި މިހާރު ހުރި ބަނދަރު 28,304 ކިއުބިކް މީޓަރަށް ފުންކުރުމާއި، ބަނދަރުގެ ޗެނަލް 3,354 ކިއުބިކް މީޓަރަށް ފުންކުރުން ހިމެނެއެވެ. އަދި 402 މީޓަރުގެ ކީވޯލެއް، 170 މީޓަރުގެ ބްރޭކްވޯޓަރެއް، 383 މީޓަރުގެ ރިވެޓްމަންޓެއް، 11x11 މީޓަރުގެ ކޮންކްރީޓް ރޭމްޕެއް، އަދި 18x2 މީޓަރުގެ ކޮންކްރީޓް ބްރިޖެއް ހެދުން ހިމެނެއެވެ. މީގެ އިތުރުން، 1,814 އަކަ މީޓަރުގެ ބަނދަރު ޕޭވްމަންޓް އެޅުމާއި، ބަނދަރު ބައްތިތަކާއި، މޫރިންގ ބޮއިތައް ހަރުކުރުމާއި، ހައިސްޕީޑް ފެރީ ނެޓްވޯކަށް އެކްސެސް ޕްލެޓްފޯމެއް ހެދުން ހިމެނެއެވެ.
މި މަޝްރޫޢުއަކީ 64.67 މިލިއަން ރުފިޔާގެ މަޝްރޫއުއެކެވެ.
