ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދު ކަމުގައިވާ ޤައުމުގެ ހަކަތައިގެ 33 އިންސައްތަ އިއާދަކުރަނިވި ހަކަތައިން އުފެއްދުމުގެ ލަނޑުދަނޑިއަށް ވާސިލްވުމަށްޓަކައި، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ކަނޑުގެ ރާޅުން ހަކަތަ އުފެއްދުމުގެ ދިރާސާއެއް ފަށައިފިއެވެ.
ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ ވިދާޅުވި ގޮތުގައި، މި މަޝްރޫޢުގެ ދަށުން ކަނޑުގެ ރާޅުތަކުގެ ހަރަކާތްތައް ދެނެގަތުމަށް ޚާއްޞަ ޓެކްނޮލޮޖީއެއް ބޭނުންކުރެވޭނެއެވެ. މިއީ ދިވެހިރާއްޖޭގައި އިއާދަކުރަނިވި ހަކަތަ އުފެއްދުމުގައި އިތުރު ކުރިއެރުމެއް ކަމުގައި އޭނާ ފާހަގަކުރެއްވިއެވެ.
މި ދިރާސާގެ ތެރެއިން ބަލާނީ ކަނޑުގެ ރާޅުތަކުން ހަކަތަ އުފެއްދުމުގެ ފުރުޞަތުތަކާއި، އޭގެ ފައިދާތަކާއި އަދި މިހާރު ބޭނުންކުރަމުންދާ އިއާދަކުރަނިވި ހަކަތައިގެ ވަސީލަތްތަކާއެކު މި ނިޒާމު ގުޅުވާލެވިދާނެ ގޮތްތައް ދެނެގަތުން ކަމަށް ފަހުމީ ވިދާޅުވިއެވެ.
ކަނޑުގެ ރާޅުތަކުން ހަކަތަ އުފެއްދުމަކީ އިރުގެ އަލިން ހަކަތަ އުފެއްދުމަށްވުރެ ގިނަ ފައިދާތަކެއް ލިބިދާނެ ކަމެއް ކަމަށް ފަހުމީ ފާހަގަކުރެއްވިއެވެ. އޭގެ ތެރޭގައި މޫސުމަށް އަންނަ ބަދަލުތަކުގެ އަސަރު ކުޑަވުމާއި، އެއް ހަމައެއްގައި ހަކަތަ އުފެއްދުމުގެ ފުރުޞަތު އޮތުން ހިމެނެއެވެ.
މި މަޝްރޫޢަކީ ރާއްޖޭގެ ހަކަތައިގެ ދާއިރާގައި އައު ހޯދުންތަކަށް މަގުފަހިކޮށްދޭނެ ކަމެއްގެ ގޮތުގައި ފަހުމީ ސިފަކުރެއްވިއެވެ. އަދި މިއީ ރައީސް ޑރ. މުޢިއްޒުގެ ވިސްނުންފުޅާ އެއްގޮތަށް ކުރިއަށްގެންދާ މަސައްކަތެއް ކަމަށް ވެސް އޭނާ ވިދާޅުވިއެވެ.
ސްޓެލްކޯއިން މި މަޝްރޫޢު ކުރިއަށް ގެންދިއުމަށް ނިންމާފައިވަނީ ރާއްޖޭގެ ތިމާވެށި ހިމާޔަތްކުރުމަށާއި، ދެމެހެއްޓެނިވި ގޮތެއްގައި ހަކަތަ އުފެއްދުމަށް ކުރަމުންދާ މަސައްކަތުގެ ތެރެއިންނެވެ. މި ދިރާސާގެ ނަތީޖާތަކުން ރާއްޖޭގެ ހަކަތައިގެ ދާއިރާއަށް އިތުރު ކުރިއެރުންތަކެއް ލިބޭނެ ކަމަށް ސްޓެލްކޯއިން އުންމީދުކުރެއެވެ.
