ރާއްޖޭގެ އެކި ކަންކޮޅުތަކުގައި ޑިވެލޮޕްމަންޓް ޒޯންތަކާއި އަރބަން ސެންޓަރުތައް ތަރައްގީކުރުމަކީ ފެށުނީއްސުރެ މި ސަރުކާރުން ގެންގުޅުއްވާ ސިޔާސަތެއް ކަމުގައި ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ވިދާޅުވެއްޖެއެވެ.
ރައީސް މިކަން ހާމަކުރައްވާފައިވަނީ އެމަނިކުފާނުގެ ރަސްމީ އެކްސް އެކައުންޓުން މިއަދު ކުރެއްވި ޕޯސްޓެއްގައެވެ.
މި ޕޯސްޓުގައި ރައީސް ވަނީ ދިވެހީންގެ ރާއްޖެ މެނިފެސްޓޯގެ 4 ވަނަ ބާބުގެ 12، 13 އަދި 14 ވަނަ ނަންބަރުގައި ހިމެނޭ ދިވެހިރާއްޖޭގެ ދެމެހެއްޓެނިވި ތަރައްގީއާބެހޭގޮތުން މެނިފެސްޓޯގައި ހިމެނޭ މައުލޫމާތުތައް ހިއްސާކުރައްވާފައެވެ. އެގޮތުން ދިވެހިރާއްޖޭގެ ދެމެހެއްޓެނިވި ސަރަހައްދީ ތަރައްގީގެ ސިޔާސަތުގެ ދަށުން މާލެ އަރބަން ރީޖަންގެ އިތުރުން އެންމެ މަތީ ފަންތީގެ ހުދުމަތްތަކާއެކު، އެންމެ އުތުރުގެ 3 އަތޮޅު ހިމެނޭހެން ނޮދަން އިންޓަރގްރޭޓަޑް ޑިވެލޮޕްމަންޓް ޒޯނަކާއި، އެންމެ ދެކުނުގެ 4 އަތޮޅު ހިމެނޭހެން ސަދަން އިންޓަރގްރޭޓަޑް ޑިވެލޮޕްމަންޓް ޒޯނެއް ތަރައްގީކުރުމަށް މެނިފެސްޓޯގައި ހިމަނުއްވާފައިވާނެ ކަމުގައި އެމަނިކުފާނު ވިދާޅުވެފައިވެއެވެ.
މީގެއިތުރަށް މާލެއިން އުތުރުގައި 3 އާރބަން ސެންޓަރާއި މާލެއިން ދެކުނުގައި 4 އާރބަން ސެންޓަރު ހިމެނޭހެން ޖުމުލަ 7 އަރބަން ސެންޓަރު ތަރައްގީރެއްވުމަކީ ސަރުކާރުގެ ސިޔާސަތުކަން ވަރަށް ސާފުކޮށް މެނިފެސްޓޯގައި ބަޔާންކުރައްވާފައި ވާނޭކަމުގައި އެމަނިކުފާނު ވިދާޅުވެފައިވެއެވެ. އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމައަށް އެތައް ޖަލްސާއެއްގައި އެމަނިކުފާނު އެކަން ތަކުރާރުކުރައްވާފައި ވާނޭކަމުގައިވެސް ރައީސްގެ ޕޯސްޓުގައި ފާހަގަކުރައްވާފައިވެއެވެ.
އަދި މިއީ، ކުރިއަށްއޮތް 20 އަހަރު ދުވަހަށް އެކަށައަޅުއްވަން މަސައްކަތް ފަށްޓަވާފައިވާ ތަރައްގީގެ މާސްޓަރޕްލޭންގައި ހިމެނުއްވުމަށް ގަސްދުކުރައްވާ ކަންތައްތަކެއް ކަމަށާއި، އެ ކަންކަން އެކަށައަޅުއްވާނީ، ފަންނީ ފަރާތްތަކާއި ކައުންސިލްތަކާއި ރާއްޖޭގެ ހުރިހާ ރަށެއްގެ ރައްޔިތުންގެ ހިޔާލުވެސް ހިމެނޭގޮތަށް ކަމާބެހޭ ހުރިހާ ފަރާތްތަކެއްގެ ބައިވެރިވުމާ އެކުގައިކަމަށްވެސް އެމަނިކުފާނު ވަނީ ވިދާޅުވެފައެވެ.
ދިވެހީންގެ ރާއްޖެ މެނިފެސްޓޯގެ 4 ވަނަ ބާބު (ގެދޮރުވެރިކަމާއި އަރބަނައިޒޭޝަން) ގެ ނަންބަރު 4.12 ގައި ވަނީ، މާލޭ އަރބަން ރީޖަންގެ އިތުރުން، މަތީ ފަންތީގެ ހިދުމަތް ލިބޭ ސަރަހައްދެއްގެ ގޮތުގައި ހއ. އަތޮޅާއި، ހދ، އަތޮޅު އަދި ށ. އަތޮޅު ހިމެނޭ އުތުރުގެ ތަރައްގީ ޒޯނުގައި، އިދާރީ މައި ހަބުގެ ގޮތުގައި ހދ. ކުޅުދުއްފުށި ހިމަނައިގެން، ބައިނަލްއަގުވާމީ ދޮރޯއްޓެއްގެ ގޮތުގައި ހދ. ހަނިމާދޫ ގާއިމުކޮށް، ހއ. އިހަވަންދިއްޕޮޅުގައި ބައިނަލްއަގުވާމީ ޓްރާންސްޝިޕްމަންޓް ބަނދަރެއް ގާއިމުކުރުމުގެ ތަސައްވުރެކެވެ.
ހަމަ މި ބާބުގެ 4.13 ގައި ވަނީ، މާލޭ އަރބަން ރީޖަންގެ އިތުރުން، މަތީ ފަންތީގެ ހިދުމަތް ލިބޭ ސަރަޙައްދެއްގެ ގޮތުގައި ގއ. އަތޮޅާއި، ގދ، އަތޮޅު އަދި ފުވައްމުލަކު ސިޓީ އަދި އައްޑޫ ސިޓީ ހިމެނޭ ދެކުނުގެ ތަރައްގީ ޒޯނުގައި، އިދާރީ މައި ހަބުގެ ގޮތުގައްޔާއި ބައިނަލްއަގުވާމީ ދޮރޯއްޓެއްގެ ގޮތުގައި އައްޑޫ ސިޓީ ހިމަނައިގެން، ބައިނަލްއަގުވާމީ ޓްރާންސްޝިޕްމަންޓް ބަނދަރަކާއި ސިނާޢީ މަސައްކަތްތަކާއި، މަސްވެރިކަމާއި، ދަނޑުވެރިކަމާއި، މެރިކަލްޗަރުގެ އިތުރުން ފަތުރުވެރިކަމުގެ ވަސީލަތްތައް ފުޅާކޮށް، ތަރައްގީކުރުމުގެ ތަސައްވުރެކެވެ.
އަދި ހަމަ މި ބާބުގެ 4.14 ގައި ވަނީ، މެދުމިނުގެ އިތުރު 7 އަރބަން ސެންޓަރު (މާލެއިން އުތުރުގައި 3 އަދި ދެކުނުގައި 4 ހިމެނޭގޮތަށް) ތަރައްގީކުރުމުގެ ތަސައްވުރެކެވެ.
