އިނގިރޭސި ޕްރިމިއާ ލީގުގައި ރޭގައި 2-0 އިން އެސްޓަން ވިލާ ބަލިކޮށް, ލިވަޕޫލުން ލީގުގެ އެއްވަނައިގައި ބޮޑު ލީޑެއް ނަގައިފިއެވެ.
ލިވަޕޫލުގެ އެންފިލްޑް ސްޓޭޑިއަމްގައި ކުޅުނު މެޗުގައި ލިވަޕޫލުގެ ފަރާތުން ފެނިގެންގޮސްފައިވަނީ ވަރުގަދަ ކުޅުމެކެވެ. މެޗުގައު އެ ޓީމުން ކާމިޔާބު ކުރި ފުރަތަމަ ލަނޑު ފެނިގެންދިޔައީ މެޗުގެ 20 ވަނަ މިނެޓުގައެވެ. މި ލަނޑަކީ, ލިވަޕޫލުގެ ހަލުވި ފޯވާޑުންގެ ވަރުގަދަ ކައުންޓާ އެޓޭކަކުން ޑާވިން ނޫނޭޒް ކާމިޔާބު ކުރި ލަނޑެކެވެ.
މެޗުގެ ދެވަނަ ހާފުގައި ވެސް ލިވަޕޫލުން ވަނީ އެސްޓަން ވިލާގެ ގޯލަށް ނުރައްކާ ކޮށް ލަނޑެއް ޖެހުމަށް ގިނަ ފުރުސަތުތަކެއް ފަހިކޮށްފައެވެ. އެ ގޮތުން މެޗުގެ 84 ވަނަ މިނެޓުގައި ލިވަޕޫލުގެ ތަޖުރިބާކާރު ފޯވާޑް މުހައްމަފު ސޮލާހު ވަނީ ލަނޑު ޖަހާ ލިވަޕޫލުގެ ލީޑު ދެ ގޯލަށް އިތުރު ކޮށްފައެވެ. މި ލަނޑަކީ, ވިލާގެ ޑިފެންޑަރުންގެ ގޯހަކުން ފައިދާ ނަގައި އޭނާ ކާމިޔާބު ކުރި ލަނޑެކެވެ. މި ލަނޑާއެކު އޭނާ ވަނީ މި ސީޒަނުގައި ހުރިހާ މުބާރާތެއްގައި ދިހަ ލަނޑު ޖަހާ, އަދި ދިހަ އެސިސްޓް ފޯރުކޮށްދީފައެވެ.
މި މެޗު ކާމިޔާބު ކުރުމާއެކު ލިވަޕޫލު ވަނީ މި ސީޒަނުގައި ކުޅުނު 17 މެޗުގެ ތެރެއިން 15 މެޗު ކާމިޔާބު ކޮށްފައެވެ. އެއާއެކު އާނޭ ސްލޮޓް ވަނީ ލިވަޕޫލުގައި މިހާތަނަށް އަލަށް އައި ކޯޗެއްގެ ހައިސިއްޔަތުން އެންމެ ފުރިހަމައަށް ނަތީޖާ ނެރުނު ކޯޗަށް ވެފައެވެ.
ވިލާ އަތުން ލިބުނު މޮޅާއެކު ލިވަޕޫލު ވަނީ ތާވަލުގެ އެއްވަނައިގައި ފަސް ޕޮއިންޓުގެ ލީޑެއް ނަގާފައެވެ. އެ ޓީމު އެއްވަނައިގައި 28 ޕޮއިންޓާއެކު އޮތް އިރު ދެވަނައިގައި އޮތް މެންޗެސްޓާ ސިޓީއަށް ލިބިފައިވަނީ 23 ޕޮއިންޓެވެ. ތިންވަނަ އަދި ހަތަރުވަނައިގައި އޮތީ މި ސީޒަނުގައި އާދަޔާހިލާފު މޮޅު ކުޅުމެއް ދައްކަމުން އަންން ނޮޓިންހަން ފޮރެސްޓް އަދި ބްރައިޓަންއެވެ.
