އިނގިރޭސި ޕްރިމިއާ ލީގުގައި ރޭގައި ބްރައިޓަން އަތުން 2-1 އިން ބަލިވެ, ޕެޕް ގާޑިއޯލާގެ އިރުޝާދުގެ ދަށުގައި ފުރަތަމަ ފަހަރަށް މެންޗެސްޓާ ސިޓީ ޖެހިޖެހިގެން ހަތަރު މެޗުން ބަލިވެއްޖެއެވެ.
ބްރައިޓަންގެ ފާމާ ސްޓޭޑިއަމްގައި ކުޅުނު ފޯރިގަދަ މެޗުގެ ފުރަތަމަ ހާފުގައި ރަނގަޅަށް ކުޅުނީ ސިޓީއިންނެވެ. އެ ގޮތުން އެ ޓީމު ވަނީ މެޗުގެ 23 ވަނަ މިނެޓުގައި ލަނޑު ޖަހާ މެޗުގެ ލީޑު ނަގާފައެވެ. މި ލަނޑަކީ, ލީގުގައި މި ސީޒަނުގައި އެންމެ ގިނަ ލަނޑު ޖަހާފައިވާ އާލިންގް ހާލަންޑް ކާމިޔާބު ކުރި ލަނޑެކެވެ. މިއީ, އޭނާ މި ސީޒަނުގައި ކާމިޔާބު ކުރި 12 ވަނަ ލަނޑެވެ.
1-0 އިން ބަލިވަމުން އައި ބްރައިޓަން ދެވަނަ ހާފުގައި ވަނީ އެ ޓީމުގެ ކުޅުން ރަނގަޅުކޮށް, ގޯލެއް ޖެހުމަށް ރަނގަޅު ފުރުސަތުތަކެއް އުފައްދާފައެވެ. އެ ގޮތުން މެޗުގެ 78 ވަނަ މިނެޓުގައި އެ ޓީމުގެ ޖައޮ ޕެޑްރޯ ވަނީ ލަނޑު ޖަހާ މެޗުގެ ނަތީޖާ ހަމަހަމަ ކޮށްފައެވެ. އޭގެ ފަސް މިނެޓު ފަހުން ޕެޑްރޯ ފަހިކޮށްދިން ފުރުސަތަކުން މެޓް އޯރައިލީ ވަނީ ލަނޑު ޖަހާ, މެޗުގެ ނަތީޖާ ބްރައިޓަންގެ ކޮޅަށް އަނބުރާލާފައެވެ.
މެޗުގެ ފަހު ވަގުތު ކާމިޔާބު ކުރި ދެ ލަނޑާއެކު ބްރައިޓަން ވަނީ އެންމެ ފަހުގެ ޗެމްޕިއަނުން ކަމުގައިވާ ސިޓީ ބަލިކޮށް, ތާވަލުގެ 4 ވަނައަށް ޖެހިލައިފައެވެ. އެ ޓީމު ހަތަރުވަނައިގައި އޮތީ ކުޅުނު 11 މެޗުން ހޯދި 19 ޕޮއިންޓާއެކުގައެވެ. 3 ވަނައިގައި އޮތް ނޮޓިންހަމް ފޮރެސްޓްއަށް ވެސް ލިބިފައިވަނީ 19 ޕޮއިންޓެވެ. މެޗުން ބަލިވި ސިޓީ އޮތީ 23 ޕޮއިންޓާއެކު ދެވަނައިގައެވެ. މި މެޗު ކާމިޔާބު ނުކުރެވުމުން ސިޓީ އޮތީ އެއްވަނައިގައި އޮތް ލިވަޕޫލަށްވުރެ ފަސް ޕޮއިންޓު ފަހަތުގައެވެ.
