ރޭގެ ވަގުތެއްގައި ހުޅުމާލެ ނެރު ކުރިމަތިން ދެ ލޯންޗު ޖެހި އެކްސިޑެންޓެއް ހިނގައިފި ކަމަށް ފުލުހުން ބުނެފިއެވެ.
ފުލުހުން މިހެން ބުނީ މީޑިއާތަކަށް ފޮނުވި މެސެޖެއްގައެވެ.
އެ މެސެޖުގައި ފުލުހުން ބުނީ ހުޅުމާލެ ނެރު ކުރިމަތިން ދެ ލޯންޗު ޖެހި ހިނގި އެކްސިޑެންޓު ރިޕޯޓް ކޮށްފައިވާ ކަމަށާއި އެތަނުން އެއް ލޯންޗުގައި ތިބި ދެމީހުންނަށް އަނިޔާވެގެން ހުޅުމާލެ ހޮސްޕިޓަލަށް ގެންގޮސްފައިވާ ކަމަށެވެ.
މި ހާދިސާ ހިނގާފައިވަނީ ރޭގެ 19:30 ހާއިރުއެވެ. ފުލުހުން ބުނީ އެކްސިޑެންޓުގައި އަނިޔާވެފައިވަނީ ދެ ފިރިހެނުންނަށް ކަމަށެވެ.
ރޭގަނޑުގެ ވަގުތުތަކުގައި މި ސަރަހައްދުގައި ދެ ލޯންޗު ޖެހި ދޭތެރެއަކުން އެކްސިޑެންޓްތައް ހިނގައެވެ. އެގޮތުން މިދިޔަ މަހުވެސް ގުޅީފަޅު ކައިރިން ދެ ލޯންޗު ޖެހި އެކްސިޑެންޓެއް ހިނގާފައިވެއެވެ. އަދި އެ އެކްސިޑެންޓުގައި ވިހި މީހުންނަށް އަނިޔާވެ ފަރުވާދީފައިވެއެވެ.
