ސްޕެނިޝް ލަލީގާގައި ރޭގައި ކުޅުނު މެޗުގައި އޮސަސޫނާ އަތުން 4-0 ގެ ތަފާތު ބޮޑު ނަތީޖާއިން ރެއާލް މެޑްރިޑް މޮޅުވެއްޖެއެވެ.
ސެންޓިއާގޯ ބާނަބާއޯ ސްޓޭޑިއަމްގައި ކުޅުނު މެޗުގައި ރެއާލުން ވަނީ ތަފާތު މޮޅު ކުޅުމެއް ދައްކާފައެވެ. ރެއާލުން މެޗުގެ ފުރަތަމަ ލަނޑު ޖަހާފައިވަނީ 34 ވަނަ މިނެޓުގައެވެ. މި ލަނޑަކީ އެ ޓީމުގެ ހުނަރުވެރި ވިންގާ, ވިނީޝިއަސް ޖޫނިއާ ކާމިޔާބު ކުރި ލަނޑެކެވެ.
ވިނީޝިއަސް ރެއާލަށް ލީޑު ނަގައިދިންތާ 8 މިނެޓު ފަހުން ޖޫޑް ބެލިންހަމް ވަނީ ލަނޑު ޖަހާ, އެ ޓީމުގެ ލީޑު ދެ ގޯލަށް އިތުރުކޮށްފައެވެ. މި ލަނޑަކީ ބެލިންހަމް މޮ ސީޒަނުގައި ކާމިޔާބުކުރި ފުރަތަމަ ލަނޑުކަން ފާހަގަކޮށްލަން ޖެހެއެވެ.
ރެއާލުގެ ތިންވަނަ ލަނޑު ފެނިގެންދިޔައީ މެޗުގެ 61 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބު ކޮށްދިނީ މެޗުގެ ފުރަތަމަ ލަނޑު ޖެހި ވިނީޝިއަސްއެވެ. އޭގެ 8 މިނެޓު ފަހުން ވިނީޝިއަސް ވަނީ އިތުރު ލަނޑެއް ޖަހާ, އޭނާގެ ހެޓްރިކް ފުރިހަމަ ކޮށްފައެވެ. މިއީ, އޭނާ މި ސީޒަނުގައި އޭނާ ކާމިޔާބު ކުރި ދެވަނަ ހެޓްރިކެވެ.
ވިނީޝިއަސްގެ ހެޓްރިކުން ރެއާލް ވަނީ ފަސޭހަކަމާއެކު އޮސަސޫނާ ބަލިކޮށް, ލީގުގެ އެއްވަނައިގައި އޮތް ބާސެލޯނާއާ އޮތް ފަރަގު ކުޑަކޮށްފައެވެ. ރެއާލު ތާވަލުގެ ދެވަނައިގައި 27 ޕޮއިންޓާއެކު އޮތް އިރު އެއްވަނައިގައި އޮތް ބާސާއަށް ލިބިފައިވަނީ 33 ޕޮއިންޓެވެ.
