ރައްޔިތުންނާ ގުޅިފައިވާ މުހިއްމު 3 ކަމެއް ނިންމެވުމުގައި ރައްޔިތުންގެ ވޯޓަކަށް ދާން ނިންމާފައިވާކަން ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު އިއުލާން ކުރައްވައިފިއެވެ.
ރައީސް މިކަން އިއުލާން ކުރެއްވީ މި އަހަރުގެ ޖުމްހޫރީ ދުވަހުގެ މުނާސަބަތުގައި ރޭ ދަރުބާރު ގޭގައި ބޭއްވި ރަސްމީ ހަފްލާގައި ވާހަކަފުޅު ދައްކަވަމުންނެވެ.
ރައްޔިތުންގެ ވޯޓެއް ނަގަން ރައީސް ނިންމެވި 3 ކަމަކީ ކޮބާ؟
1. ރައީސުލް ޖުމްހޫރިއްޔާ ހުވާ ކުރައްވާ ދުވަސް 11 އަށް ބަދަލު ކުރެއްވުން.
ރައީސް އަބްދުﷲ ޔާމީނުގެ ދައުރުން ފެށިގެން އިންތިހާބީ ރައީސް ހުވާ ކުރައްވަމުން ގެންދަވަނީ ނޮވެމްބަރު 17 ގައެވެ.. އެއީ 2013 ވަނަ އަހަރުގެ ރިޔާސީ އިންތިހާބުގެ މައްސަލައެއް ކޯޓުން ބަލައިގަނެ، ދެވަނަ ބުރު ބޭއްވުން ލަސްވެ، ނޮވެމްބަރު 11 ގައި ހުވާ ނުކުރެވުމުގެ ސަބަބުންނެވެ. ކުރީގެ ރައީސް އަބްދުﷲ ޔާމީނާއި ކުރީގެ ރައީސް އިބްރާހިމް މުހައްމަދު ސާލިހް ވެސް ރައީސް ކަމުގެ ހުވާ ކުރައްވާފައި ވަނީ ނޮވެމްބަރު 17 ގައެވެ.
ރައީސް ވިދާޅުވީ ނޮވެމްވަރު 11 އަކީ ޖުމްހޫރީ ދުވަސް ކަމަށްވެފައި، އެ ތާރިހުގައި ރައީސުލްޖުމްހޫރިއްޔާ ހުވާ ކުރައްވާ ގޮތަށް އޮތުމަކީ އެ މަނިކުފާނު އެދިވަޑައިގަންނަވާ ގޮތް ކަމަށެވެ.
2. ރިޔާސީ އިންތިހާބާއި މަޖިލިސް އިންތިހާބު އެއްކޮށް ބޭއްވުން
ރައްޔިތުންގެ ވޯޓަކުން ނިންމަން ރައީސް މުއިއްޒު ބޭނުންފުޅުވަނީ ދެވަނަ ކަމަކީ ރިޔާސީ އިންތިހާބާއި ރައްޔިތުންގެ މަޖިލިހުގެ އިންތިހާބު އެއްކޮށް ބޭއްވުމުގެ މައްސަލަ އެވެ.
ރައީސް ވިދާޅުވީ، ރާއްޖެފަދަ އާބާދީ ކުޑަ ގައުމަކަށް އެންމެ އެދެވޭ ގޮތަކީ ރިޔާސީ އިންތިހާބާއި މަޖިލިސް އިންތިހާބު އެކުގައި ބޭއްވުން ކަމަށެވެ.
3. ރިޔާސީ އިންތިހާބުގެ ދެވަނަ ބުރު އުވައިލުން
ރައީސް ވިދާޅުވީ، މަނިކުފާނުގެ އަމިއްލަފުޅު ވިސްނުމަކީ ރިޔާސީ އިންތިހާބުގައި ދެވަނަ ބުރަށް ނުގޮސް ފުރަތަމަ ބުރާ ހިސާބުން ބޭފުޅަކު ކަނޑައެޅުމެވެ. އޭގެ ސަބަބުން ދައުލަތަށް ޚަރަދު ކުޑަވެގެންދާނެކަން ރައީސް ފާހަގަ ކުރެއްވިއެވެ.
"މާނައަކީ އެއްބުރުން [ރިޔާސީ އިންތިހާބު] ނިމޭނެ. އެއްބުރުން އެއްވަނަ، ދެވަނަ ސާފުވާ ގޮތަށް، އަޅުގަނޑު ހިތުން ބައެއް ގައުމުތަކުގައި، އަވައްޓެރި ބައެއް ގައުމުތަކުގައި ވެސް އޮވޭ އެހެން. އެކަމަކު، ދިރާސާ ކޮށްފައި އަޅުގަނޑު ގަސްދުކުރަން އެއީ އަޅުގަނޑުމެންގެ ގައުމަށް އެންމެ ރަނގަޅު ގޮތް ކަމަށް ވަންޏާ ރައްޔިތުންގެ މަޖިލިސް މެދުވެރިކޮށް، އެކަން އެދޭ ކަމަށް ވަންޏާ ދެން އަންނަ ރިޔާސީ އިންތިހާބުން ފެށިގެން ދެ ބުރު ނޯންނަ ގޮތަށް، އެއްބުރުން މީހަކު ހޮވައި ނިންމޭ ގޮތަށް ކަންކަން ބަދަލުކުރަން،" ރިޔާސީ އިންތިހާބުގެ ދެވަނަ ބުރުގެ އުވާލުމާއި ގުޅޭ ގޮތުން ރައީސް ޤަބޫލް ކުރައްވާ ގޮތް ހާމަކުރައްވައި ރައީސް ރޭ ވިދާޅުވި އެވެ.
ރައީސް ވިދާޅުވީ، މި ނިންމެވުންތަކަކީ އެމަނިކުފާނު އަމިއްލައަށް ނިންމެވޭނެ، އަދި ރައްޔިތުން މަޖިލިސް މެމްބަރުންނަށް ވެސް ނިންމެވޭނެ ކަމަކަށް ނުވާތީ، މި 3 ކަންތަކާމެދު ރައްޔިތުން ނިންމަވާ ގޮތް ބެލުމަށްޓަކައި ވޯޓަކަށް ވަޑައިގަންނަވާނެ ކަމަށެވެ.
