ޔަހޫދީ ރޭވުންތެރިކަމާއެކު ނަތަންޔާހޫ ބުނަނީ ސަލާމަތީ ނުރައްކާތަކެއް ހުރުމުން، ޝަރީއަތުގެ މަޖިލީހަށް އޭނާއަށް ކޯޓަށްވެސް ހާޒިރުވެވެން ނެތް ކަމަށެވެ. ކޮރަޕްޝަންގެ މައްސަލަތަކެއް ނަތަންޔާހޫއާ ދެކޮޅަށް ހުށަހެޅިފައި ވާއިރު އެމައްސަލަތައް ކޯޓުގައި ނުހިނގައެވެ. މިހަފްތާއަށް ތާވަލް ކުރި އަޑު އެހުމަށްވެސް ނު ދެވޭނެ ކަމަށްބުނެ ނަތަންޔާހޫ ވަނީ އުޒުރުވެރި ވެފައެވެ.
އޭނާ އިތުރަށް ބުނެފައި ވަނީ ކޯޓަކީ ރައްކާތެރި ތަނެއް ނޫން ކަމަށާއި ކޯޓުގައި ބޮމުގެ ހަމަލައިން ސަލާމަތްވާނެ ބިންގަރާހެއްވެސް ނެތް ކަމަށެވެ.
ޒަޔަނިސްޓު ޔަހޫދުންގެ ޗެނަލް 12 އިން ނެރުނު ރިޕޯޓެއްގައި ބުނެފައި ވަނީ ނަތަންޔާހޫގެ ސަލާމަތީ ޓީމުން ދިން އިރުޝާދާއެކު އޭނާ މިހާރު އުޅެނީ ބިންގަރާހެއްގައި ކަމަށެވެ.
ސެކިއުރިޓީ އޮފިޝަލުންގެ އިރުޝާދުގެ މަތިން އޭނާ ދިރިއުޅެމުން ދަނީ ބޮޑުވަޒީރު އޮފީހުގެ ބިންގަރާހުގައި ހުންނަ ސިއްރު ކޮޓަރި ކިއްލާއެއްގައެވެ.
އެ ޗެނަލުން ހާމަކުރާ ގޮތުގައި، ސަލާމަތީ ފަރާތްތަކުން ވަނީ އޭނާއަށް ހުރި ނުރައްކަލުގެ ބޮޑުކަމުން ބިންގަރާހުން ނުނިކުތުމަށް އަންގާފައެވެ.
އޮކްޓޯބަރު 19 ވަނަ ދުވަހު ހިޒުބުﷲ އިން ދިން ޑްރޯން ހަމަލައިން ގައިސަރިއްޔާގައި ހުންނަ އޭނާގެ ގޭގެ ނިދާ ކޮޓަރީގެ ބިއްލޫރިގަނޑު ގޮއްވާލުމުން އޭނާގެ ނިތަށް ބިރުވެރިކަން ވަދެފައި ވެއެވެ.
ޔަހޫދީ ގާތިލު ނައްތާލާނެކަމުގެ ބިރު އޮތުމުން އޭނާގެ ސެކިއުރިޓީ ޕްރޮޓޮކޯލް ވަރުގަދަ ކޮށްފައި ވަނީ، ޑްރޯން ނުވަތަ އެހެން ވަސީލަތްތެއް ބޭނުންކޮށްގެން ހަމަލައެއް ދީފާނެތީއެވެ. އޭގެ އިތުރުން އޒްރޭލުގެ ޔަހޫދީންވެސް މިހާރު ބޭނުން ވަނީ އޭނާ ހަވަރަށް ދޭށެވެ. ކޮންމެ ދުވަހަކު މީހުން އޭނާއާ ދެކޮޅަށް މުޒާހަރާ ކުރަމުން ދެއެވެ.
