އިންޑިއާގެ ޓުޓިކޮރިންއިން ސީދާ ކުޅުދުއްފުށި ސިޓީއަށް ޕެރިޝަބަލް އަދި ޖެނެރަލް ކާގޯ އުފުލާ ބޯޓުތަކުގެ ދަތުރުތައް ފެށުމާ ގުޅޭގޮތުން މަޝްވަރާ ބައްދަލުވުމެއް ބާއްވައިފިއެވެ.
މި ބައްދަލުވުމުގައި މޯލްޑީވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މޫސާ ވަޖީހު އަދި ކުންފުނީގެ އިސްވެރިން، ކުޅުދުއްފުށި ސިޓީގެ ވިޔަފާރިވެރިންނާ މަޝްވަރާކުރެއްވިއެވެ.
މީގެ އިތުރުން، ކުޅުދުއްފުށި ސިޓީގެ ބަނދަރު ތަރައްޤީކުރުމުގެ މަސައްކަތްތަކެއް ކުރިއަށްދާކަން އެމްޕީއެލްއިން ފާހަގަކުރެއްވިއެވެ. ވޭތުވެދިޔަ 19 ވަރަކަށް އަހަރު ވަންދެން ބަނދަރަށް އެއްވެސް ތަރައްޤީއެއް ގެނެވިފައިނުވާކަމަށާއި، އެތަން ހިންގަމުން އައިސްފައިވަނީ ގެއްލުމުގައި ކަމަށް އެމްޕީއެލްއިން ވިދާޅުވިއެވެ. ނަމަވެސް، މިހާރު އެ ބަނދަރަކީ ފައިދާ ލިބޭނެ ތަނަކަށް ހެދުމަށް މަސައްކަތްތަކެއް ފެށިފައިވާކަމަށް އެކުންފުނިން ހާމަކުރެއްވިއެވެ.
ކުޅުދުއްފުށީ ޕޯޓުގައި ބޯޓު ޔާޑެއް ޤާއިމުކުރުމުގެ މަސައްކަތްތައްވެސް އެމްޕީއެލްއިން ދަނީ ކުރަމުންނުންވެ. މި ޔާޑު ޚާއްޞަކުރެވޭނީ ފައިބަރުން ބޯޓު ބަނުމަށްކަން އެމްޕީއެލްއިން ހާމަކުރެއްވިއެވެ. އަދި ބޯޓުފަހަރު ފަސޭހައިން ގާތްކުރެވޭނެ ގޮތަށް ޖެޓީއެއް ހެދުމުގެ މަސައްކަތްވެސް ކުރިއަށްދާކަމަށް އެމްޕީއެލްއިން ވިދާޅުވިއެވެ.
މި މަޝްރޫޢުތަކުގެ ސަބަބުން ކުޅުދުއްފުށި ސިޓީގެ އިޤްތިޞާދަށް ބޮޑު ކުރިއެރުމެއް ލިބި، ވިޔަފާރިތަކަށް އިތުރު ފުރުޞަތުތަކެއް ހުޅުވިގެންދާނެކަމަށް ބެލެވެއެވެ.
