މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) ގެ ސީ.އީ.އޯ މުޙައްމަދު ވަޖީހް އަދި ކުންފުނީގެ އިސްވެރިން ހއ. އުތީމު ރަށު ކައުންސިލްއާ ހއ. އިހަވަންދޫ ކައުންސިލްއާ ބައްދަލުކުރައްވައިފިއެވެ.
އުތީމަށް ކުރެއްވި ޒިޔާރަތުގައި ސީ.އީ.އޯ ވަޖީހް ވަނީ އުތީމު ކައުންސިލްގެ މެހެމާނުން ސޮއިކުރައްވާ ފޮތުގައި ސޮއިކުރައްވައިފައެވެ. މީގެއިތުރުން، އުތީމު ކައުންސިލްއިން ވަނީ އެމް.ޕީ.އެލް އިން ދެމުންދާ އެހީތެރިކަމާއި އެއްބާރުލުމުގެ އަގު ވަޒަންކޮށް، އެމް.ޕީ.އެލްއަށް ހަނދާނީ ފިލާއެއް އަރުވައިފައެވެ.
އިހަވަންދޫ ކައުންސިލްއާއެކު ބޭއްވުނު ބައްދަލުވުމުގައި އުތުރު މެރިޓައިމް ސަރވިސަސް (ޔޫ.އެމް.އެސް) ގެ ތެރެއިން އިހަވަންދޫގައި ފޯރުކޮށްދިނުމަށް ހަމަޖެހިފައިވާ ޚިދުމަތްތަކާއި ގުޅޭގޮތުން މަޝްވަރާކުރެވުނެވެ.
މި ދަތުރަކީ އުތުރުގެ ރަށްތަކަށް އެމް.ޕީ.އެލްއިން ފޯރުކޮށްދޭ ޚިދުމަތްތައް އިތުރަށް ހަރުދަނާކުރުމަށާއި، ރަށްރަށުގެ ކައުންސިލްތަކާއެކު ގުޅުން ބަދަހިކުރުމަށް ކުރެވުނު ދަތުރެއްކަން ފާހަގަކުރެވެއެވެ. އެމްޕީއެލްއިން ވަނީ ހދ. ކުޅުދުއްފުށްޓަށްވެސް ޒިޔާރެއްކުރައްވާ އެރަށު ވިޔަފާރިވެރިންނާއެކު މަޝްވަރާ ބައްދަލުވުމެއް ބާއްވާފައެވެ.
