ޖަޕާނު ބޮޑު ވަޒީރަށް އިތުބާރު އޮތްތޯ ބެލުމަށް ވޯޓަށް އެހުމަށް ތައްޔާރުވަމުން ދަނިކޮށް، އިދިކޮޅު ޕާޓީގެ ލީޑަރުގެ ހިލޭ އަންހެނަކާއެކު ގުޅުން ބާއްވާކަމުގައި ރިޕޯޓުކޮށްފިއެވެ.
ޑިމޮކްރެޓިކް ޕާޓީ އޮފް ދަ ޕީޕަލްސް (ޑީޕީޕީ) ގެ ލީޑަރު ހިލޭ އަންހެނަކާއެކު ޓޯކިޔޯގެ ޝިންޖުކޫ އަވަށުގެ ބާރަކުން ނިކުންނަ މަންޒަރު ފޮޓޯއާއެކު ނޫހެއްގައި ރިޕޯޓު ކުރުމުން ޔޫޗިރޯ ޓަމާކީ ވަނީ ނޫސްކޮންފަރެންސެއް ބާއްވައި ރައްޔިތުންގެ ގާތުން މައާފަށް އެދިވަޑައިގެންފައެވެ. އޭނާ ވަނީ އޭނާގެ އަންހެނުންނާއި ފިރިހެން ދަރިފުޅަށްވެސް އެވާހަކަ ކިޔައިދީ އާއިލާއިންވެސް މައާފަށް އެދިވަޑައިގަތް ކަމަށް ވިދާޅުވެފައެވެ.
ޔޫޗިރޯ ވިދާޅުވީ ރައްޔިތުން އޭނާގެ ކިބައިން ހެޔޮކަންކަމަށް އުންމީދު ކުރާއިރު އޭނާގެ ފުށުން ފެނިފައިވާ މި އަމަލަށް އޭނާ ނިހާޔަތަށް މައާފަށް އެދިވަޑައި ގަންނަވާ ކަމަށެވެ. އަދި އޭނާގެ ސިޔާސީ މުސްތަގްބަލާމެދު ގޮތެއް ނިންމުމަށް އޭނާގެ ޕާޓީގެ މެމްބަރުންނަށް ދޫކޮށްލާފައިވާ ކަމަށްވެސް ވިދާޅުވިއެވެ.
ޑީޕީޕީގެ ލީޑަރު ހިލޭ އަންހެނަކާ އެކު ގުޅުން ބާއްވާކަން މީޑިއާއިން ބޭޒާރުކޮށްލީ، އާންމު އިންތިޚާބުގައި ވެރިކަން ކުރާ ޕާޓީއަށް މަދުން ގޮނޑިތައް ލިބި، ބޮޑު ވަޒީރު ޝިގޭރޫ އިޝިބާއަށް ސަޕޯޓު ހޯދުމަށް ޑީޕީޕީއާއެކު ވާހަކަ ދައްކަމުން ދަނިކޮށެވެ.
