ގޭންގްތަކުން ބާރު ދައްކަމުން ގެންދާ ހެއިޓީގެ ވަގުތީ ސަރުކާރުގެ ބޮޑު ވަޒީރު މަގާމުން ދުރުކޮށް ވިޔަފާރިވެރިއަކު އެމަގާމަށް އައްޔަންކޮށްފިއެވެ.
ހެއިޓީގައި ސަރުކާރުގެ ބާރެއް ނޯވެއެވެ. ގައުމުގެ ކަންކަން ހަމައަކަށް އެޅުވުމަށް މަސައްކަތް ކުރަމުން ދަނީ 9 މީހުންގެ ވަގުތީ ކައުންސިލަކުންނެވެ. އެ ކައުންސިލުން ވަނީ ބޮޑުވަޒީރު ގެރީ ކޮނިލް މަގާމުން ދުރުކޮށް، ވިޔަފާރިވެރިޔާ އެލިކްސް ޑިޑިއާ ފިލްސް އައިމޭ ބޮޑު ވަޒީރު ކަމަށް އައްޔަން ކޮށްފައެވެ.
ހެއިޓީގައި އިންގިލާބުތައް އައިސް، އަވަސް އަވަހަށް ސަރުކާރުތައް ބަދަލުވަމުން ގޮސް އުފެދެމުން ދިޔަ ހަލަބޮލި ކަމާއެކު، 2016 ވަނަ އަހަރުން ފެށިގެން އިންތިހާބެއް ބާއްވާފައެއް ނުވެއެވެ. އެގައުމުގެ މުއައްސަސާތަކާއި ޚިދުމަތުގެ ނިޒާމު އެއްކޮށް ވަނީ ބޮއްސުންލާފައެވެ.
ގައުމުގައި ވެރިކަން ކުރަނީ އެކިތަންތަން ކޮންޓްރޯލު ކުރަމުންދާ ގޭންގްތަކުންނެވެ. ފުލުސް ފޯސްއެއް ނެތެވެ. އެހެންވެ، ވެރިރަށުގައި ސަލާމަތީ ކަންކަން ބަލަހައްޓަނީ ކެންޔާއިން ފޮނުވާފައިވާ ޕޮލިސް ފޯސްއަކުންނެވެ.
ޖުލައި މަހުން ފެށިގެން ސެޕްޓެމްބަރު މަހުގެ ނިޔަލަށް 1،200 އަށް ވުރެ ގިނަ މީހުން ގޭންގް ހަމަލަތަކުގައި މަރާލާފައި ވެއެވެ. އަދި 7 ލައްކަ މީހުން ވަނީ ވިއްސިވިހާލި ވެފައެވެ.
ވެރިރަށް ޕޯޓްއޯޕްރިންސްގެ 80 ޕަސެންޓް ކޮންޓްރޯލު ކުރަނީ ގޭންގްތަކުންނެވެ.
