ފަލަސްތީނުގެ ރައްޔިތުންގެ ހައްޤުގައި އިތުރަށް މަސައްކަތްކުރުމަށް ދިވެހިރާއްޖޭގެ ޚާރިޖީ ވަޒީރު ޑޮކްޓަރ ޢަބްދުﷲ ޚަލީލް އިލްތިމާސްކުރައްވައިފިއެވެ.
ވަޒީރު މިހެން ވިދާޅުވީ ސައުދީ ޢަރަބިއްޔާގެ ރިޔާދުގައި ބޭއްވުނު ޚާރިޖީ ވަޒީރުންގެ ބައްދަލުވުމުގައިއެވެ.
މި ބައްދަލުވުމުގައި ޑޮކްޓަރ ޚަލީލް ދެއްވި ތަޤްރީރުގައި، އިސްރާއީލުން ފަލަސްތީނަށް ދެމުންގެންދާ ހަމަލާތަކާއި ނަސްލުނައްތާލުމުގެ ޢަމަލުތައް ހަރުކަށި އިބާރާތުން ކުށްވެރިކުރެއްވިއެވެ. އަދި ފަލަސްތީނުގެ ރައްޔިތުންނަށް ކުރިމަތިވާ އަނިޔާތަކަށް ލުޔެއް ލިބިފައިނުވާތީ އެކަމާމެދު ކަންބޮޑުވުން ފާޅުކުރެއްވިއެވެ.
ޚާރިޖީ ވަޒީރު އިތުރަށް ވިދާޅުވީ، ފަލަސްތީނުގެ ރައްޔިތުން ތަހައްމަލްކުރަމުންދާ އަނިޔާތަކުން އަރައިގަތުމަށް އެހީވުމަކީ މުޅި އިސްލާމީ އުންމަތުގެ ޒިންމާއެއްކަމަށެވެ. އަދި އިސްރާއީލުން ބައިނަލްއަޤްވާމީ ޤާނޫނާ ޚިލާފަށް ހިންގަމުންގެންދާ ޢަމަލުތައް ކުށްވެރިކޮށް، ވަކި ޤައުމެއް އިސްތިސްނާ ނުވާނެހެން ބައިނަލްއަޤްވާމީ ޤާނޫނު ތަންފީޒުކުރުމަށް ގޮވާލެއްވިއެވެ.
މީގެއިތުރުން، އ.ދ. ގެ ސަލާމަތީ މަޖިލިސް އަދި އިންޓަނޭޝަނަލް ކޯޓް އޮފް ޖަސްޓިސް (އައި.ސީ.ޖޭ.) ފަދަ ޕްލެޓްފޯމްތަކުގައި އިސްރާއީލް ޖަވާބުދާރީކުރުމަށް ކުރަންޖެހޭ މަސައްކަތްތައް ކުރުމަށްވެސް ޑޮކްޓަރ ޚަލީލް ގޮވާލެއްވިއެވެ.
ޚާރިޖީ ވަޒީރު އިތުރަށް ވިދާޅުވީ، ފަލަސްތީނުގެ ހައްޤުގައި ވަކާލާތުކުރުމުގައި ދިވެހިރާއްޖެއިން އަބަދުވެސް ދެމިއޮންނާނެކަމަށާއި، އިސްލާމީ ޤައުމުތަކާއެކު ފަލަސްތީނުގެ މައްސަލައަށް ހައްލެއް ހޯދުމަށް މަސައްކަތްކުރުމަށް ފަސްނުޖެހޭނެ ކަމަށެވެ. އަދި މި ހަނގުރާމައަށް އޮތް ހަމައެކަނި ދެމެހެއްޓެނިވި ހައްލަކީ 1967 ގެ ކުރިން ފަލަސްތީނުގެ ބޯޑަރުތަކާ އެއްގޮތްވާ ގޮތުގެމަތިން، އިރުމަތީ ޤުދުސް އަކީ އެ ޤައުމުގެ ވެރިކަންކުރާ ރަށް ކަމަށް ކަނޑައަޅައި، ފަލަސްތީން އިސްރާއީލުގެ އަތްދަށުން މިނިވަންކޮށް، އެއީ މިނިވަން، މުސްތަޤިއްލު އަދި އަމިއްލަ ސިޔާދަތީ ބާރު ހިނގާ ޤައުމަކަށް ހެދުންކަމުގައި ޑޮކްޓަރ ޚަލީލް ވިދާޅުވިއެވެ.މި ބައްދަލުވުމަކީ ނޮވެމްބަރު މަހުގެ 11 ވަނަ ދުވަހު ބޭއްވުމަށް ހަމަޖެހިފައިވާ "އެކްސްޓްރާއޯޑިނަރީ ޖޮއިންޓް އަރަބް-އިސްލާމިކް ސަމިޓް" އަށް ތައްޔާރުވުމުގެ ގޮތުން ބޭއްވުނު ބައްދަލުވުމެކެވެ. މި ސަމިޓަކީ ސައުދީ އަރަބިއްޔާގެ ސަރުކާރާއި، އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ.) އާއި ލީގް އޮފް އަރަބް ސްޓޭޓްސް އާ ގުޅިގެން އިންތިޒާމުކުރާ ބައްދަލުވުމެކެވެ.
މި ސަމިޓުގެ މައިގަނޑު މަޤްޞަދަކީ ފަލަސްތީނާއި ލުބުނާނަށް އިސްރާއީލުން ދެމުންގެންދާ ހަމަލާތަކަށް ހައްލެއް ހޯދުމަށް މަޝްވަރާކުރުމެވެ.
